文：本香猛
世界盃即將舉行，LEGO 早前天價請到美斯、C 朗、麥巴比、雲尼素斯四大球星拍廣告，齊齊爭砌積木版大力神盃。當你以為合作已經結束，原來 LEGO 還會推出四款以他們為主題的「足壇焦點」（Soccer Highlights）新作，編號分別 43011、43012、43013 同 43027，預計 2026 年 5 月 1 日正式發售。
今次「人偶化」的四位球星，分別是阿根廷的美斯、葡萄牙的 C 朗、法國的麥巴比，以及巴西的雲尼素斯。四位無論球場內還是球場外都是風頭躉，均屬當今足壇的頂尖代表。LEGO 將他們變成人偶，再連場景一齊呈現，絕對是粉絲的收藏夢幻組合。
每款套裝都充滿向球星致敬的細節設計。先睇 43011 美斯，全套 500 件零件，組裝後高約 13 cm、闊約 24 cm。「M」字形底座採用阿根廷招牌藍白配色，可砌出經典「10」號波衫號碼及 Messi 字樣，名牌印有球員統計數據同簽名，並隨附藍色射門特效配件及縮細版足球。人仔用上鬍鬚佬造型，細緻到紋身都印埋，藍色阿根廷波衫亦像真度高，單是這人仔就值回票價。
另一球王 C 朗拿度變成 LEGO 後編號 43012，共有 490 件零件，組裝後高約 11cm、闊約 21cm。「R」字形底座採用葡萄牙國家隊的酒紅配綠，仲有大大個「CR7」字樣，名牌印有佢老哥統計數據同簽名。人偶刻劃了 C 朗的自信神情，提供微笑及 O 咀表情，特效配件更塗上金色，擺 Pose 甚具氣勢。
LEGO 麥巴比編號 43013，全套 490 件零件，組裝後高約 13cm、闊約 24cm。跟美斯撞字母，同樣用上「M」字底座，但換上法國隊的深藍色系。為了突顯「忍者龜」速度，組件加入不少踢球特效件，營造臨門抽射的衝擊力。美中不足是人仔造型相對美斯、C 朗簡單，神似度亦一般，Fans 們未必滿意。
雲尼素斯編號 43027，零件共 510 件，組裝後高約 10cm、闊約 19cm。「V」字形底座採用巴西國家隊的黃配綠經典配色，可砌出 ViNi JR 7 字樣兼附有個人資料名牌。人偶加入伸脷表情，雖然頗為生動，但跟射門姿勢就好唔大夾。
以上四款作品全屬 LEGO Editions 系列，售價同為 US$ 29.99，折約 HK$235，全套都是一千銀，至啱球迷平平哋買來看門口！
