文：本香猛
各位太空迷、LEGO 發燒友，是時候摸摸荷包，看看仲有幾多錢剩！向來被戲稱為「成人吸金系列」的 LEGO ICONS，最近又有新搞作。今次瞄準在太空服役超過 35 年、幫人類影過無數震撼靚相的哈勃太空望遠鏡（Hubble Space Telescope），以另類方法向偉大科學致敬。
哈勃太空望遠鏡自 1990 年由發現號太空梭送上天空後，在離地 540 公里軌道運行多年，曾影過恆星誕生的「創生之柱」，證實黑洞存在，又拍攝過瀕死恆星爆炸後的殘骸，如「蟹狀星雲」與「貓眼星雲」等，以深空影像改變人類對宇宙的認知。
有記性的 LEGO 玩家應該記得，2021 年的「NASA 發現號太空梭」入面，哈勃已經出場過，不過當時只是 382 塊零件的「附屬品」，縮在太空梭肚入面。今番 LEGO 決定將佢「升格」單飛，編號 11382，零件量暴增至 1,252 片，全高約 32cm、長約 38cm、寬約 38cm，體積大幅膨脹，砌好之後絕對面對土地問題。
此作定位為「18+」級數，換句話說「砌到你眼花」，而且細節上交足功課，例如外殼採用深灰色同銀色零件，望落去擺脫廉價塑膠質感；外部面板可以拆出，讓人一窺內部的陀螺儀、主鏡、副鏡等儀器；太陽能板同天線可以手動調校角度，孔徑門亦可以打開，等玩家過足手癮模擬探測太空。配件包括黑色 Icons 展示台、印刷資訊銘牌，仲送一隻同比例太空人 Minifigure，增添展示趣味。
推出日期方面，預計 2026 年 8 月 1 日正式發售，官網定價 US$139.99 美元，折合約 HK$1,097，坦白講不算平，但一千多元就能把科學奇蹟帶回家，仲想點？
