搭車去旅行－寮國篇
(Day 9)琅橋—>琅巴班(Luang Prabang)
早上瞓醒後，係美景下享受一頓豐富早餐先～ 計計吓停留了小村好幾日，係時候要走了! 食完早餐係露台呆坐，唔上網，唔做任何野，靜靜感受最後既寧靜...
搭船漂流落Luang Prabang，被LP喻為必定要搭既旅程! 1100到達碼頭，但無船落琅巴班，佢話唔夠人所以無開，再問之後幾日都無⋯ 其實好多乘客都想坐船落Luang Prabang，起碼十幾人! 咁多人都話無! 不如唔好辦呢條航線啦！ 其實都幾失望，最想就係坐呢程船嘛… 眾人當知道無後，全部人坐篤篤車去琅橋巴士站（$5-HKD) 再轉小型巴士往Luang Prabang（$40-HKD)
4小時車程，係1410到達琅巴班南站，去市中心只係5分鐘車程，篤篤車兜客竟索取每人$20-HKD，價錢係剛才坐5小時車程既一半呀！ 離晒普! 我咁有性格梗係唔坐拉，烈日當空下步行去，而老外們就上晒車了～
其實步行十分鐘就到市鎮邊皮範圍，20分鐘就到中心區域，一直想搵早前新加坡人及內地遊客所講既PDQ Guesthouse，但都未搵到，天氣嚴熱背住沈重背包下求其搵左間Guesthouse，叫Thony 1 Guesthouse，屋住係一位婆婆，三代同堂一齊經營，一間房$90000-KIP($90-HKD)
Luang Prabang這裡有個傳統，僧人每朝都於街上接受民眾用造好既飯來佈施，而遊客可以買定d生果作佈施之用； 我便突發奇想想學當地人咁親手造一頓飯來報施，並向婆婆提及明早想佈施一事，婆婆話聽朝會好似媽媽咁叫我起床，造埋飯比我一齊去佈施喎！ 佢個孫話婆婆是風雨不改的！
於是放低行李去今日算係唯一要去既景點，普西山Phousi 一出路口問正在落客，騎著電單車既學生妹普西山方向，仲順風車車埋我去tim~ 太好了~
普西山上有彿寺彿塔，景觀一流，望到整個城鎮，眉公河及南汗河。寺內既僧人太多會講普通話，仲遇到兩名國內漢語年青老師，話來交流，當我講出我既心聲時，話咁好傳統要保持落去，現在地球一體化既同時好多傳統正在消失，即係我成日係遊記提及既，又係果句"慎終追遠" 囉！老師聽完即時話很喜歡，並很同意我講既說話，仲話好欣賞我，話呢D說話通常出自老人既口中，好難想像出自我後生仔既口中喎！ 我仲後生咩！ 人到中年三十幾啦！
日落時遊人聚滿山頂，其實日落既位置唔太好，構圖也不美，以我既技術影唔到靚相，所以我放棄影，用眼睛親身來感受，回想自愛上攝影後，真的無乜邊幾次用親身來感受，既迅速又動人既日落了～
再等埋magic moment後我都落山了，從另一面通往夜市既樓梯落山，樓梯無街燈，要開電話照明。係夜市行左一圈後，有好多手工藝品，又有傳統食物，但寮國傳統食物全是燒烤，怕熱氣既我都係算吧... 求其係一間餐廳食飯，便步行回程。
(Day 10)Luang Prabang
晨早5點，住宿既婆婆叫醒我起床，其實我已被傾盆大雨所嘈醒，婆婆為我準備好飯，用傳統既竹製飯壺裝住，並為我帶上像頸巾一樣既巾打斜咩住，就冒雨出發去布施！布施時每人都要抵過僧人以示尊敬，所以我學婆婆咁去到有瓦摭頭既簷蓬，搵野蓋住濕地坐係度； 以我所見布施既人大部份是長者，睇來新一輩已不再虔誠，可能不久將來又一個傳統消失了… 而今天不知是否落雨關係，也見不到遊客，今天的僧侶可能無飽飯食了… 清晨時份一隊隊既僧侶，一個跟一個於街道上接受布拖，布施時用手攞一細舊米飯放入齋鉢，直到最年老既僧人都經過後就布施完畢！
布施完再瞓，瞓到0900食個唔飽既湯麵，食完租電單車$120/per day，去南部既Kuang Si 瀑布；呢度租電單車唔需要車牌，而騎電單車算是我第二次吧！ 對上一次一年前回鄉探患病既姑媽，試揸過約30米咁大把！ 取車時雞手鴨腳，之後好快純熟了，其實跟踩單車差不多，只不過行機器啫～ 先去入油，$25-HKD已可打爆油缸，好抵！ 之後路經參觀兩間寺廟，食埋午飯就出發去三十多公里外既Kuang Si瀑布了！
一路無事，只是路面偶爾有凹陷情況，問題不大； 約一個小時車程就順利到達瀑布，泊車$2-HKD，入場費$25-HKD，正進場時聽到打雷聲在山頂發出，並下起微雨來… 勢估唔到呢場雨將帶來不幸…
一進園內先經過熊保育區，黑熊真係第一次見咋！ 這個保育園，列出熊不人道既待遇，這些電視也睇過，困係好細個鐵籠裡，被鐵通插穿膽囊取膽汁，雖然無講邊個國家，但係唔使講到明啦！ 離開時經過一個捐款箱，放下少少心意，為國民積點陰德吧… 沿小徑一值上山，水流經一個個既水池拾級而下，有點像九寨溝，不過我相信世上類似這類的自然景觀都好多既，就像克羅地亞也有一個～ 最低既水池可以游水，所以濟滿了人，而我則繼續前行，沿途不停看見港人口邊常覺得優越民族既西人，係不準游泳既池游水！於是上到一個近瀑布既位置就唔打算登頂了！沿路落山，拍了幾張滿意照片，並係璧綠既水池中浸一浸，雨開始越來越大時，就離開瀑布公園了。
冒雨回程，開頭仲開得幾快Tim! 到後來多灣並落斜反而慢了下來； 睇住路旁既石柱，距離Luang Prabang開始進入倒數十公里八公里階段，而雨帶亦被我穿越，雨停了，只淨下路面濕滑； 其實這時已經放慢車速了，一個不留神見路面有個缺口想收慢車速之際，冼軚倒下了… 記得當時係滿佈碎石既路上左邊身落地滑行左一段，個人都暈暈地呆在地上，望著身體各處既傷口，血，開始流出來了，地下小水氹漸漸變為血水... 而斜咩既相機袋亦在我身邊只是打開了... 不一會感覺有人從後夾住我格勒底扶我起身，原來是頭先曾被我爬頭既當地人；後來再有接滿遊客既專車停下來協助，車上有兩名熱心外國女子用水幫我清洗傷口，傷口上也佈滿了沙石，沖洗時痛得死去活來！
感謝剛才兩個當地人、兩名替我洗傷口既女遊客，也感謝旅遊專車送我到醫院。去到醫院醫護人員第一時間替我治療，脫衣服時發現整個左邊身，由膊頭到左腳，及右手掌全是傷口，範圍都幾廣！ 第一樣就係洗傷口啦！ 再次痛到叫苦連天，真係非筆墨所形容呀！洗傷口都起碼洗左成個小時呀！ 由於言語不太溝通到，我依稀聽得明好似問我有無錢，如肯pay就幫我打針及開藥，我當然pay啦！最後拮左兩針，一針pat pat，一針手臂，而藥也是兩種，相信是止痛藥及消炎藥； 最後賣單都只係$179000-KIP即$179-HKD，真係好抵呀！
係第三世界既國家來講，也不是大城市，這樣服務好過好多地方了！ 記起不時聽到國內新聞，醫院要先付錢，無錢值頭唔理你，話之你死！ 呢度算係咁，先做左D基本幫你洗傷口，才問你需唔需要付錢注射藥物。
我相信好多港人去到落後國家，未必夠膽食或注射當地處方既藥物，但以我所見這個國家人人心地善良，大部份都不貪錢，所以我好放心將身體交給醫生！
當我治療完後，原來既衣服，褲也佈滿泥濘，都費事著上身，就咁著住條孖煙通出去由醫院職員替我截車，起碼等左十分鐘職員先幫我找到架篤篤，這時肉隨針板上，篤篤開價$50000-KIP ($50-HKD) 我都無心機還價了…
十分鐘車程送到住宿既路口，著住條孖煙通一拐一拐咁行返住宿，當返到住宿，個個都上前慰問，婆婆仲好關心，替我帶上幸運手繩，並諗經保佑… 回到房間看看自己半邊身既包紥，覺得無斷骨，無傷及頭部毀容已是不幸中之大幸啦！唔通今早既布拖帶來保佑？
半邊身損晒，最難莫過於沖涼洗頭，唔沖又成身污糟，最後都千辛萬苦沖完瞓覺…
(Day 11－15)Luang Prabang
由於尋日買定今日既巴士票去”風沙灣”Phonsavan，我咁樣傷法邊度都唔使去啦，比左張票比婆婆個仔，佢話幫我改期喎，我話唔使啦，自己盤算休養耐D，唔再四圍去啦!
早餐後去租車既舖頭，原來間舖頭只係Agent黎，話要帶我去租車公司相討賠償，我話周身傷唔想去，要幾多迷賠囉! 唔知佢聽唔明定一定要我去，就用電單車載我到不遠處既租車公司，見返尋日架電單車，好唔係好傷，甩左兩個燈蓋，同左邊車身有點花，經尋日個年青職員點算後，賠左$400多港幣。
及後有個漂亮女孩出來，細看下那女孩長髮披肩，皮膚雪白，穿一條白色連身裙，感覺清新淡雅，長相有點像香港既黃翠茹！這種女孩來到寮國未曾見過的，當地女孩通常皮膚微黑，所以佢有種萬中無一既感覺！當然不是驚為天人果種啦！但佢竟然係一家租車公司既老師闆更難以置信！ 佢先講解電單車話損毀不太嚴重，賠償不太貴，及後關心我傷勢，並留我同職員們一同食午飯Tim~ 太好了，免費梗係食飽佢啦！ 午餐係寮國style，與老闆及職員們一齊食，當地人主要食糯米，用手拿一舊飯再加點餸就放入口，餸就係牛雜。
如是者休息了足足五日後，自受傷後終於再次拿起相機。 0515起床出發影布施！ 因為幾日前只係布施，無乜點影相。雖然早幾日前已親身布施，今日以第三者身份再感受，回想返當日既布施，真係施比受更有福呀！ 最後影了張自己非常滿意既照片~ 我留在琅巴班（Luang Prabang）算是尾聲，所以黃昏時老闆娘提議上Posti普西山，於是同埋靚仔職員，三人一齊去，當地人上Posti係唔使錢的! 上到去頂部既Posti塔內，老闆娘替我們每人買了每人兩盤花，他們原來都好誠心拜神架，仲求籤Tim！
