台灣Cx3 "Colour Camp Carnival 2015" 玩樂後記 - Part 2

天氣非常舒服，預先預備0既營被都唔駛用就可以好好瞓到天光，然後俾晨光照醒。 
“晨早起床清新開朗” 完全形容晒個感覺，好早起身，但賣食物， 賣營具0既攤位都未開有咩好做？ 
唔係再瞓過， 懶瞓留返在屋企張軟床先慢慢瞓。 
去到老官道早起最好就係出去跑步，唔跑都可以漫步附近0既大水塘。 
我就邊影相邊漫行，遇到營友跑到過來就順便扮一陣馬拉松攝影師拍下朋友跑出香港0既情況。

跑完返到營地時間都差不多，先開檔0既就係賣早餐0既檔口，手工面包、 開胃菜湯、 特調咖啡。 
只要你有錢， 大把好嘢食 （但不要預期似台北台中市中心0既NTD100連飲品食得飽0既早餐，價錢可能係同香港食類似食物差不多價， 但絕對值得!）

食飽早餐之後，精彩環節就慢慢開始啦。 
賣營具0既攤位排晒d精選產品，特選限量聯名產品，會場特別價0既平貨，仲有未賣街0既新品預覽都有好多，好似同露營唔太有關係0既電動單車、房車都有得試吓玩吓，應有盡有。

最前0既大舞台輪住有人獻唱表演，下次要帶把大傘擋烈日，然後拉埋張椅去台前坐低慢慢聽，或者幾個嘉賓圍埋坐談分享，最有印象係一位台灣生態攝影師Asuka chen小姐分享開始露營0既經過。她話：因為想拍攝清晨和黃昏0既動物活動，所以開始露營，然後愛上露營，她現在可能因為喜愛攝影而露營，亦可能係因為喜愛露營而攝影。 
我覺得同喜愛旅行和攝影一樣，可以共融！

台上表現，講talk，我哋就在台下兩排十幾廿間攤檔喥shopping睇嘢，在大熱天逐檔尋寶試新夾價問價，好快就會出晒汗開始好想飲凍嘢。 
好不幸我係個少少愛酒0既人，所以面對幾檔cocktail同啤酒0既攤位都難以抗拒，買杯whiski with coke在樹陰底坐下飲下望下，十分＂梳乎＂，hea吓hea吓，炎熱就盡消，而且老官道始終都算半個山上地方，空礦好好風。 
好似我哋無準備食材嚟自己煮，lunch， dinner 可以叫下美味0既pizza， 燒雞或者走落少少去小鎮路邊餐館食下地道餸菜美食，就非常滿足！

我估大部份香港人露營都係帶好少同盡小0既器具， 盡量有得唔帶就唔帶。因為在香港大部分人都係自己背個大背囊上山下海去露營，即使同行但人人都會自成一帳，最多圍埋一齊扎營。 
見過成班friend各自縮入帳中，伸出半個身出來圍住傾偈， 煲咖啡。

但今次參加台灣CX3活動0既當地朋友大部分都係一家大細揸車而來，幾大0既營都可以帶來！ 
甚至唔少人除咗扎個瞓覺0既4，5人大帳幕外，還會起多個一樣大甚至更加大0既天幕做廳，然後放地墊地布、矮台、 坐墊、爐具........ 
但這些全都係家具 唔係營具，甚至見到個牌仔寫住係在ikea買0既家具！

第一日到步後快快手扎起自己個營後去巡場參觀，在場看到都係早到0既fans或不用上班0既早到參加者0既營友，已完全不能置信，你屋企有0既可能這裡有一個營都有

入夜後 更誇張 ！ 一個個 “客廳” 0既燈光亮起，雖不是水晶燈飾，但萬家燈火絕無誇張（除咗我哋香港人果邊比較暗d） 
而且再次走走細看，好多營主吃完前夜祭bbq同我哋炮製0既港式黑毛豬叉燒後，一家大細都返晒來，坐在天幕大廳飲酒傾偈，你漫步左望望右望望，佢哋就都會同你say hello，你又會同佢哋say 返hello。 
感覺就好似以前住舊式公屋，晚飯時間都唔關木門。 
當你放工回家路過鄰居屋企，或都 鄰居 路過你屋企咁。 
見到會問下食咗飯未呀？ 好香喎係咩好餸呀? 咁夜放工？ 昨晚電視劇點點點.... 
一啱傾就唔只傾兩咀，直頭可能入埋去加雙筷一齊食飯飲啤酒睇電視，開台打麻雀，（係喎唔見有人在cx3打牌） 
就好似今年在我哋旁邊扎營0既一對台灣退休夫婦（之後熟了傾偈知道佢哋的子女係好大，廿幾歳未結婚，望返佢哋都好後生，咁早就可以退休然後一至五就四圍去露營，六日就返屋企陪子女，真好～）佢哋非常熱情，又好客，又有個猶如家0既客廳布置，我哋成村人路過，正在欣賞由太太布置0既帳篷裝飾和陣設，然後大家互相say hi後，就被邀請入晒去坐，大班人埋圍住張6，7人矮台傾偈， 飲酒， 分享大家0既送酒美食。 
老公和一班我哋成班男0既自動圍一邊飲酒吹水，太太和各位女生、媽媽自動圍埋一邊傾小朋友傾飲食烹調，草哥同我哋分享咗好多台灣0既特式文化，例如原住民0既小米酒，敬酒文化，部落0既音樂CD，故事.....　一起吃， 一起喝， 一起笑， 一起醉 ！ 
感覺真係好似舊時0既屋村街坊幾家人圍住一齊開飯， 
不同0既是以前0既香港公屋 和 今日0既苗栗cx3； 
不同0既是以前除鞋跨過度鐵閘木門 和 現在除鞋踩進天幕和地墊！

身處現在0既香港，踏進冷冰冰0既全豪宅年代， 人人爭住買500萬上車盤/二手居屋0既年代，問心一句：你知道幾多個鄰居貴姓呀？ 
你又會唔會想重溫一下行過say hi講下講下就入咗“屋” 同鄰居圍埋吹水談笑風生0既感覺？

今次我深深覺得自己得到咗唔只第一套屬於自己的營帳營具，唔只兩日在台灣大吃大喝好味0既嘢，仲體驗咗好多人情味，兩地文化縱有不同，但用善良的心和開放的心，憑我0既核突普通話，都可以同台灣0既朋友交到朋友， 返來第二日將相機入面靚d 0既相放上友營人的group入面，轉眼半日已被人like爆咗，我自己不停check電話就不停有notice, 我估可能一日內就超過500個like同comment。
新加我的朋友也有好多, 大部份都係台灣0既。
新加我的朋友，唔少都話欣賞我拍0既相片，亦有繼續在Fb messager詳談在CX3的回憶。
用咗fb 6,7年都未試過
原來結合外國友好勢力真係咁犀利
真的很感謝like過，在Camperism友營人俱樂部 Fb group留言過0既香港和台灣朋友
感動又窩心!