【戶外郊遊樂】香港10大遠足行山好去處
無論係天朗氣清定係秋高氣爽，總之係冇雨落嘅好日子，最適合就係約埋親朋友好友去行山遠足，親親大自然！香港雖然素有石屎森林之稱，但其實全港各區都設有多條家樂徑、自然教育徑同郊遊徑，交通方便，景色怡人，適合唔同年齡層嘅人士挑戰。HelloToby就為大家精選10大遠足行山好去處。
★☆☆☆難度之選
1）香港仔自然教育徑
起點：香港仔下水塘 → 終點：香港仔上水塘水壩
長度：1.2公里
需時：1小時
難度：★☆☆☆
交通：香港仔交通四通八達，可乘搭城巴7、70、71、72、76或70M號，過海隧道巴士107、170或970X，或專線小巴4C、5、35M、52或58號。
行山經驗唔多，又或者想帶同家中老幼一齊行山遠足？道路平坦易行嘅香港仔自然教育徑係唔錯嘅選擇。從香港仔郊野公園出發行至下水塘東岸，就係教育徑嘅起點。沿途可欣賞香港仔全景，亦設有香港仔樹木研習徑，又有機會見到麻鷹、畫眉、穿山甲和松鼠等小動物，行完見肚餓仲可以順便喺園內享受燒烤樂。
2）薄扶林家樂徑
起點：薄扶林水塘郊野公園管理站 → 終點：薄扶林水塘道
長度：3.5公里
需時：1 – 1.5小時
難度：★☆☆☆
交通：乘搭新巴4、43X、91或970號等路線，又或者城巴7、37A或40號等路線，於薄扶林水塘道巴士站下車，沿水塘道向上步行5分鐘左右，就可見郊野公園管理站旁嘅家樂徑入口。
薄扶林家樂徑全程只有3.5公里，山路平坦易走，係適合一家大細嘅行山路徑。沿途經有「香江第一古塘」之稱嘅薄扶林水塘區，景色怡人，又可欣賞到各種植物同雀鳥。
3）麥理浩徑（北潭涌至浪茄）
起點：北潭涌停車場 → 終點：西貢浪茄沙灘
長度：10.6公里
需時：3小時
難度：★☆☆☆
交通：乘搭巴士92、299X，或專線小巴路線1A、9或7號至西貢市中心，再轉乘巴士94號至北潭涌。
由北潭涌起步走至浪茄沙灘，呢段程係麥理浩徑第一段路，由於大部分山路平坦，所以適合行山新手或者一家大細。沿住西貢萬宜路走，途經萬宜水庫、六角形岩柱、海蝕洞同破邊洲等萬宜地質步道嘅獨特自然景點。遇上日間無風嘅日子更可於萬宜水庫東壩底拍「天空之鏡」。終點浪茄沙灘亦被人稱為全港最靚嘅沙灘。
★★☆☆難度之選
4）東涌石門甲
起點：東涌石門甲 → 終點：昂坪市集
長度：約5公里
需時：4小時
難度：★★☆☆
交通：從東涌市中心巴士總站，乘搭新大嶼山巴士34號，可直達石門甲。
由為位大東涌石門甲出發，沿途經過佛門清淨嘅羅漢寺，再行經地塘仔抵達昂坪，途中仲可順便到心經簡林、寶蓮寺、天壇大佛、昂坪市集等景點觀光。要留意嘅係呢條行山徑全程為上坡路，沿途多為斜路和梯級，行山時宜分段休息。
5）大棠自然教育徑
起點：大棠燒烤場 → 終點：郊野公園大棠管理站
長度：3.2公里
需時：2小時
難度：★★☆☆
交通：從朗屏或元朗西鐵站，乘搭港鐵巴士K66到大棠山道口，或於元朗紅棉圍小巴總站乘搭公共小巴元朗至大棠線。
從大棠山道往上走約30分鐘，就會抵達大棠燒烤場，亦係大棠自然教育徑嘅起點。沿途可遠眺元朗平原、元朗同天水圍新市鎮景色，又穿過紅葉勝地楓香林，秋天時就可以欣賞漫山紅葉嘅美景，尾段更有受保護嘅油杉植林區。教育徑不時有上落斜路段，而且路面有少少濕滑不平，行山時宜量力多作休息。
香港仲有好多適合登山遠足嘅好地方，想知更多好介紹，立即去HelloToby.com閱讀全文啦!
以上原文轉自HelloToby.com
