Nikon Coolpix P610

雖然機身大，但相當輕巧，同一般prosumer的重量差唔多，而且外型靚目又專業。

相片質素有驚喜，雖然細CMOS始終都會令白天成像受noise影響，但影響比想像中微，當相片縮細到1920*1440左右時都不太覺noise存在，後製時清noise都不會喪失大量細節。(純以日景計) 成像的細節亦比想像中細緻。

成像顏色亮麗動人。在各焦段對焦算快，未見有拉風箱情況。

防震功能可以講係呢部機最癲的功能，試過黃昏開盡1440mm，只得1/8秒，我對手都有點郁，影出黎雖然見到震，但主體仍算清晰，呢部機的5軸4級防震絕非吹水。

仍然有「變焦記憶」功能，逐級上到1440mm，各級焦距同定焦鏡看齊，而且可以選擇只記憶邊一級，當定焦鏡咁用。

可用手機尿袋充電(5V 1A)

睇過好幾篇測試文章，P610在焦尾的成像的確比P900軟，真係一分錢一分貨。

冇hot shoe，其他對手都有。冇RAW輸出，對手有。

焦尾光圈細，影定的物件就靚，影高速移動物件就算去到1/800s 都有點郁鬆矇，不過又咁講，咁大焦距，焦尾唔係咁細光圈支鏡又太大，有時玩得呢類機真係要犧牲少少。

講少少購買經歷，唔知係未呢部機利潤唔高，去過大行細行問，大行多數聽到我問呢部機態度就好惡劣，上去華_見佢平D，個sales竟然機都唔比我試，仲話唔該去朗豪Nikon showroom試完才搵佢，咁的態度我當然唔買，個PK sales佬係我等lift個陣仲要唔講野望住我，好似想打交咁，我心唸係冇錢賺的就咪L賣，我又冇揸槍去搶，我係大行買RX100 III 個陣班PK 又鬼咁好態度，咁PK不如轉去金舖或者地產做啦！

跟住落左一層遇上個差唔多年紀的女sales才入手，講真個位女仔都冇同我set部機，但起碼有返基本禮貌，買野從來就係為左大家開心，要同客反枱的就唔好後悔，只係一個sales佬，佢真係以為所有買相機的都一定係斯文人比佢洽？佢真係唔好傻啦唔該，一個客爛係上黎把口有咩講唔出？

言歸正傳，我最初都好擔心 1/2.3" CMOS機會唔會部部都好差，都考慮過好幾部，睇過C記個部SX60，係某大行試過好似幾好，但係外國網一睇就冇再唸，用開Sony都有考慮過HX400V，但睇到部QX30的質素就唔再對Sony的細CMOS有信心，最後就揀Nikon，果然都冇揀錯，成像比QX30贏好多條街，起碼唔係日間相都睇noise多過睇相。當然係陰天都係唔好對呢部機要求太高了，陰天成像必定係被noise包圍，真係要認真後制才出到靚相。

1440mm我試過都幾難用得盡，係尖咀影維港對岸摩天輪都用唔盡，我唸遲一點去濕地公園打雀都唔多似唔夠焦段用。而且最緊要輕，掛係頸都唔多覺有部機係度，揸手位又正，唔跣手。

用左兩個星期去過影釣魚同飛機，印象都唔太差，係大廟個日有帶腳架，zoom到1440mm影人捉海膽都幾交到貨，人面的膚色都出得好靚，衫的色都好sharp，detail就中規中矩啦，係焦尾收唔收光圈景深都係咁窄，焦外遠一兩尺的野已經開始唔sharp。

有日去了機場影飛機，本來對呢部機期望都幾大，但雖然已快門先決set到1/800 - 1/1000s，而且Auto ISO都係ISO 200樓下，但成像的銳利度就真係麻麻地，係iPhone 6+睇就覺得幾好，但係電腦睇就比較誇啦啦，始終呢部機追焦技術麻麻，我只能係影之前一刻單次focus，同埋係機場影機始終要長焦，光圈全開都始終係F5.6以上，要追住高速的飛機focus再影就有點吃力，加上太耐冇影自己技術麻麻，成功的張數唔算多。不過好在呢部機的鏡頭靚，成色都好在交到貨，自己再磨練下技術應該可以影到更靚的飛機相。

講左一堆優點又講左一堆缺點，網上都有好多人講呢類機焦尾唔sharp云云，但已擁有APS-C機的我仍然鍾情呢部機，何解？其實有時反返轉去唸，點解唔買支大大炮而買呢種長炮天涯機？目的只有一個，就係想一部機咩都做哂，而且更重要的，就係唔想帶太重的機同配備出街，但求一部輕身又唔太大的機，一拔出袋就影相。

咁唔太大又要咩焦距都齊的機，可以點樣做到？就係細CMOS，如果唔係用1/2.3" CMOS，有咩可能一支只有4.3mm - 258mm 的鏡，就比到1440mm的視角你？用RX10或FZ1000 去比1440mm視角，我唸呢兩部機要比依家大兩三倍先至擺得落支鏡頭，做到咁大架所價又不菲，萬萬聲又可以倒返轉去買支100-500鏡。所以質素同輕巧有冇可能完全共存，大家估到！

所以係三千頭可以玩盡遠近攝，而且呢部機影人像比S記靚好多，我覺得一百分我比到80分啦。