Sigma 18-35mm f/1.8 DC HSM | Art

評測報告

實拍照片

咁首先講下佢衰咩啦

第一係真係幾重，800G連埋body完全違反方便帶呢個原則
第二就係Range有限，18-35mm……
第三就係有時對唔準，用80D八成多少少準，用7D2七成準，影玩具還可以，影人就真係有啲……
缺點大部分係咁多

然後講下佢有咩咁正
第一就係F1.8，光圈大 散景正到阿媽都唔認得，後面如果有燈嘅話個效果好正
第二就係好Sharp，F1.8都已經利得好緊要，都唔知點解佢哋整到咁恐怖 根本冇收光圈嘅需要
第三就係手感好正，成支嘢係鐵，然後嗰兩個Ring都好實淨，支嘢都好有霸氣

然後講下自己感想先
如果你話佢重我真係覺得可原諒，始終呢啲係第一支有Zoom嘅Constant F1.8，仲要係因為鐵造……成個手感好好
另外就係Range太少，咁呢樣就真係GG，因為放上Crop變成28-56mm，真係唔係好夠嘅
但係諗一諗如果變成18-50F1.8……我諗會超大支

另一樣，呢樣比較特別
其實原廠嘅大光圈鏡，尤其大過F2部機都會有少少難對焦，莫講全部都係定焦……
你話呢支鏡又有Zoom同F1.8，對焦有七成中嘅我都可接受 何況佢仲要平過一堆定焦L鏡，成像仲要sharp得咁緊要，好過一大堆L鏡，咁對焦呢樣嘢我就隻眼開隻眼閉啦

總括你講四千六抵到爛，夜晚唔使咁快收皮，室內慢慢用的確唔錯，對我嚟講用佢影玩具簡直係享受……

1.8光圈對於sigma機用家好重要
夜晚冇腳都未洗收機
對焦快，準 (sigma機)
其他方面上面d師兄已講

sa mount揾唔到二手
行貨間間舖要訂同等

堅持原廠 (好難得喺sigma度聽到)
只因其他廠冇出sa mount
Sdq 配呢支18-35 已經等於dp1q+ dp2q再幫你加大一級光圈
玩sdq師兄都可以用呢支鏡，基本上支鏡係跟到你唔再用sigma機 或者 拎上cs度比錢轉mount
可以將sigma粒x3推到另一個境界

高畫質 全開全段都極銳利 唔使收細光圈就畫質
散景 柔美 夠化
色忠實
做工靚 內變對焦防塵 冇垂頭 冇吸塵機效應 實淨

重
大枝野

A6000+mc11+佢
對焦準 速度迅速 全部af mode可用
出遊一枝開三枝 18 24 35 配枝長焦夠影曬 方便
但有時想50時會懶換鏡用腳就
需要一定體力 真係大枝又重 夜晚手夠定有1.8光圈都影得清晰(要定 但佢真係重）
建議配大機身會有較佳平衡感
帶佢同sigma 60 2.8去左一次旅行 九成時間用佢 返黎睇返d相 絕對收貨
純論畫質 強烈推薦

剛買了配canon m5, F1.8, 非常sharp, 對焦也非常快, 而且無反沒有走焦問題, sigma 18-35夾m5簡直是絕配，人像風景也能兼顧, 唯一是貴了少少和重了少少… 但畫質真的愛不釋手, 冇得講五粒星

重了少少和貴了少少

外形和畫質一樣咁靚

優點好多，師兄網上資訉都講左好多，不必重複。

唯一缺點是『自由走焦』，是新名詞。Sigma 出支鏡到現在已兩年，到現在都唔出firmware 解決走焦問題，要新舊鏡主自己負責，即使免費調都無效，除非鏡機在好巧合合一唔駛調焦，否則都係自己搞，我覺得用料幾好都無用。

我買枝镜是俾7D2用，由於一早知會走焦，加上之前買的Sigma 150-600C 配7D2 對焦十分準，又有個dock 在手，所以入手。入手前已經上網爬文，睇睇點用dock 調焦。入手後第一件事上代理要求測試対焦，結果話有走焦，放低俾佢地慢慢調，話明晤急。一星期後拿返家，試試重有走焦，發現情況比未調前好左，但影景就時淮時唔淮，已經用5.6光圈以上。唔怕，拿dock 加大量資料參考後開工自己調焦，花左幾個鐘工夫，再試，情況再轉好，漸入佳境，開心。不過，影景都係唔sharp，再調，再試，如是者重覆了六天（六次自己調）。好野，影景都好淸又sharp。於是由頭開始再度全面試鏡，嘩，點解18-24段啲相唔sharp 又走焦。於是花費買Lenscal 再次調，於是故事再重複，結論是，你點調支鏡在各焦段光圈都會有不同情度失焦，用佢的信心已大幅下降，所以我叫佢自由走焦。把火，去買支佳記16-35 f4，一試便知龍與鳯，全程各焦段光圈極極極准焦又sharp。火都黎，買左支18-35兩星期立即出讓。點解，支野幾好都好，無信心用佢。

1. F/1.8嘅已畫質非常高，收光圈只為控制景深
2. Sigma Art嘅APSC鏡好似比C記嘅鏡吸多3份1至2級嘅光
3. 抗耀光能力強，色散控制幾好，F/1.8對強光只有少許色散
4. 夠光下對焦幾快
5. 18-35焦距大光圈變焦，影室內或Event一流
6. 全黑金屬鏡身，超型，手感極佳
7. 鋼炮一支，跌都唔爛(試左)

1. 弱光對焦弱少少，容易迷焦，C記1755USM暗位對焦明顯快好多和準
2. 18-35焦距街拍好好用，不過對街拍來講大支左少少和重，快拍冇㩒容易，同咪支鏡都屬於高收視類別
3. 點解Sigma 挾 Canon都係一定要移焦，有USB Dock都係麻煩，因為點調都只係可以對應一部機，唔可以同時同其他機共用

我一向都係用開APSC 機和鏡，而為左滿足自己嘅鏡頭擁有欲，就買左呢支1835比女友用。經過一大輪調焦後，終於調好，因為女友用760D，冇機身微調，要每一段焦距和距離不停地試，不停地插機身和USB Dock試每個位調幾多，大工程(幾個鐘不停插)。調好後，諗住女友會好開心，好中意啦，傳說中最靚嘅APSC鏡喎。點知女友影左幾張後就放低左部相機成個月，之後再用都只用24餅，原來佢覺得太重了，我本身亦用慣左1755，更唔想再調焦，所支鏡就係防潮箱電藏左一段時間。一段時間之後，心熱來潮，調返支鏡比自己玩下啦。哦，原來有機身微調易調好多，試數值勁容易(半個鐘搞掂)。
我用開1755，本來都好怕用1835，因為覺得焦距短左，會唔夠用，但用落反而完全相反，我覺得支鏡用落其實好似用緊35mmAPSC標準鏡，迫你構圖先決，退無可退才選擇轉落廣角，同1755睇嘅野完全唔一樣。F/1.8，對APSC來講應該已足夠應付9成環境，比2.8實用好多，令外一提，Sigma 嘅F/1.8比Canon好似吸多3份之1-2級光，變相ISO可以降低3份之1至2級。論畫質，1755係C記嘅APSC 鏡皇，亦係我本身最中意嘅鏡，我一向覺得1755好平均，唔輸其他鏡(紅圈，金圈)，但面對呢支變焦高畫質加大光圈，真係輸好遠。講利度，F/1.8嘅中焦位置非常細膩，不過前提係要100%準焦和中焦。抗耀光，強光加最大光圈下色散控制非常好，高反差位只有輕微紫邊，發色仍然好濃。而鏡身造工方面，呢支鏡更加冇得輸，話說係我插來插去調焦嘅時候，唔小心成支鏡跌左落地，嗰吓真係嚇死，攞返起竟然冇花冇爛喎，用落又完全冇問題。不過輪靈活性，呢支鏡就輸少少了，支鏡其實都幾大支，同咪都有返㩒上下重量，快拍起上來有少少唔方便，同咪都幾搶眼(可能支鏡太型)。由畫質，景深，色散，鏡身造工，呢支鏡係冇得輸，唯一輸嘅應該係對焦，個人覺得HSM嘅對焦速度，準繩度和暗位對焦係明顯比USM弱好多，不過應該比STM快少少，但輸準繩度，準繩度對呢支鏡好重要，因為景深非常淺，而且利度極高，輕微移焦成張相就唔同晒。令外機身微調對Sigma鏡來講可能好緊要，因為我相信大部分Sigma鏡挾其他廠嘅機都會有唔同焦距和距離嘅移焦，機身微調方便過用lenscal測焦好多。呢支鏡嘅靈活性和焦距就好睇個人需要，有人覺得ok，有人覺得差d。整體而言，呢支鏡絶對係暫時所有APSC鏡中最好幾支之一，錯就一定冇買錯，唯一係適唔適合自己用。