文：本香猛
終於等到喇！當年細路仔最恨要的「怨念神物」黃金神終於要推出 SDX 了！喜歡 BB 戰士的 Kidult 們，相信之前兩隻 SDX 黃金龍都已經入手，今次再出人氣最高的神級角色，雖然價錢貴上不少，但儲開沒有理由不儲下去！（編按︰所以 SDX 系列千祈咪入坑呢！）
黃金神最早出現於新 SD 高達外傳《黃金神話》裏，原著是真正光之化身，騎士世界的「神明」。Bandai 早於 20 年前已出過同名 SD 高達模型，不過當時售價比一般 BB 戰士貴得多，並非個個細路買得起，大家只能透過抽 BB 戰士閃卡滿足自己。如今個個長大變了 Kidult，是時候幫自己圓夢！
今次由 Bandai 開訂的 SDX 黃金神超級凱撒（GOLD GOD SUPERIOR KAISER），全高約 190mm，極具份量，並以 SDX 黃金龍小人型插入正常母體之「合體」結構重現，最正是母體無需拆件，就可變成「暴龍凱撒翼龍」（KAISER WYVERN）之雙頭龍形態，玩味十足！用料方面，全隻以 ABS 塑膠混合合金打造，要比 20 年前紮實襟玩得多；當然塗裝也不可同日而語，表面鍍有多層金油，金光閃閃，細心睇更發現金油具有濃淡兩色，令成品立體感更出，與 METAL BUILD 等產品放在一起也毫不輸蝕！
黃金神現正於日本 Premium Bandai 開訂，預計今年 9 月派貨，連稅賣 29,916 日元。
訂購網址︰http://p-bandai.jp/item/item-1000101809/?rt=pr
