優點:
1.機仔細細,但做到好多單反做到嘅嘢,成像真係直迫5D mark2!!!
2.顏色靚到絕,呢點更加係富士獨有,上電腦都冇嘢要執!!!
3.白平衡超準,除非想要某啲特別效果要較偏色,如果唔係信晒部機都無防!!!
4.定焦鏡嘅成像原來真係靚過一般變焦鏡好多,我而家明點解定焦鏡隨時貴過支變焦鏡嘅原因!!!
5.冇多餘嘅場景效果,呢樣對我嚟講絕對係優點,可以專心影幅靚相!!!
6.傳統菲林相機嘅造型,呢樣最緊要,我就係因為咁而中毒,型到炸開!!!
缺點:
1.定焦鏡係優點又係缺點,冇得zoom企喺條橋上面要影河面朵荷花真係冇計,影出嚟粒豆咁細!!!
2.觀景窗勁易入塵入水,買番嚟兩日已經發現,觀景窗有入塵嘅情況,不過一早知部機冇防塵防水滴唯有接受,有次落微雨帶佢出街玩完返屋直擺入防潮箱冇理佢,第二日攞嚟抹至發現觀景窗裡面有幾點水漬,跟住攞上富士維修中心個師父話冇得拆開嚟抹,要回復原貌只有成組鏡頭連觀景窗一齊換,要三千幾!!!勸告所有X 100愛好者要小心呢點!!!
3.個hood內框鍍咗層黑鉻用嚟防側光,但唔搞佢都會甩,仲賣成九百幾,差!!!
4.個鏡個蓋冇鎖,好易唔見,不過查實落咗filter鏡之後都冚唔番個蓋,而家擺埋一邊完全冇用!!!
評價:
我鍾情X 100嘅原因最主要係因為佢擁有傳統旁軸菲林相機嘅外表,真係型到炸開!!!
不過我又冇因為咁而將佢攞嚟同Leica M系相機比較,大家定位唔同檔次又相差太遠根本
冇嘢好比,我只係好單純咁鍾意X 100本身!!!
呢部機我入手只係兩個月,但就幾乎日日陪住我周圍去,掛住佢出街經已成為我個人標記
咁滯!!!部機喺百記walk in買,試機嗰陣根本冇留意過啲功能,我根本就唔識,淨係比佢外表吸引住就已經毫不猶疑俾錢帶佢走喇,跟住當晚即時帶佢出街玩,發覺自動對焦奇慢,我部三星gs2電話可能仲要快過佢,跟住我仲未識用手動光圈快門,就索性全部較auto用,點知室內唔夠光又唔想用閃燈佢會自動轉落慢快門,部機又冇防手震功能,影出嚟啲相吓吓迷焦,嗰吓真係想喊!!!不過冇辦法,我真心鍾意呢部機,唯有項硬上的起心肝上網學吓啲攝影知識!!!到現時為止,我已經習慣用全手動喇!!!“全手動”真係帶俾我嘅無窮無盡嘅樂趣,令到攝影對我嚟講唔再係單純按快門咁簡單,係以前用dc仔影相冇可能有嘅感覺!!!
而喺擁有佢之前我根本冇認真去研究攝影係咩一回事,咩光圈、快門、曝光等嘅攝影常識可以話係一竅不通!!!
見過好多前輩嘅文章話呢部機會令人回到攝影嘅原點,而我更因為呢部X 100燃起我對攝影嘅熱情!!!
由於小弟只係一個初哥,以前只係會用傻瓜dc仔同電話影相,所以冇專業意見可以提供,望各位前輩指教!!!