話說初初接觸攝影三四年前,好多時候淨係識用wide鏡影相影大景,越wide越好~開頭我影相只係對風景拍攝有興趣,逐漸覺得wide鏡影相無重要,開始進入35mm同50mm迷思,接觸左攝影兩三個星期,我就買入左Nikon 50mm 1.4G,開頭上網睇好多評測,最後因為散景奶油d關係於是買左1.4G而唔係1.8G。當我買入呢支鏡時候,都唔係好明白咩唔同焦距對散景有咩分別,直至到我有機會擁有第一枝神奇老鏡 - Nikon 55mm f1.2 S.C,先開始明白唔同既焦距壓縮感都唔同,散景係老鏡係幾咁好味道,對焦距離遠好多先到無限遠果種優越感。於是,我放咗手頭上兩枝現代金圈變焦鏡皇Nikon 17-35mm 2.8D & Nikon 24-70mm 2.8G & Nikon 50mm 1.4G,愛黎換哂老鏡^.^v
自此之後,不斷購入老鏡,NIKKOR-H Auto 85mm f1.8 根本唔知係第幾枝買入黎。開頭有位師兄話我知,呢枝係好鏡頭,比其他鏡頭進光量高。當時既我,根本唔明白當中意義,直到我上年去完台灣一轉之後,真真正正明白到呢枝鏡好處、特點。
我地先睇Nikon 85mm 1.8 H 對焦距離40米。由H>H.C>K版本,對焦距離保持40米先無限遠。(口徑:52mm)出產年份:May1964 - Feb 1977
跟著,Nikon ai 85mm f2,對焦距離維持不變,但光圈略略縮小1/3級。(口徑:52mm)出產年份:Apr 1977 - Sep 1981
再去,Nikon ais 85mm f2,光圈不復再f1.8,對焦距離大為縮水,20米就無限遠。(口徑:52mm)出產年份:Aug 1981 - Mar 1995
就算Nikon ais 85mm 1.4,鏡皇f1.4光圈也好,對焦距離仍然只得20米就無限遠。不過鏡頭大左咁多(口徑:52mm > 72mm),對散景景應該有增加波波散景效果,對焦距離依舊縮水。出產年份:Mar 1981 - 2005
進入自動對焦年代,Nikon af 85mm f1.8D,對焦距離又縮水,唔知道係咪因為要自動對焦夠快而縮減對焦行程。只淨16米就無限遠。(口徑:62mm)出產年份:Dec 1987 - 2013 >
同樣都係 D鏡,鏡皇Nikon af 85mm 1.4D,鏡皇有點誠意,保持ais版本20米(口徑:77mm)。出產年份:Nov 1995 - Jul 2010
到真正現代鏡了…慘不忍睹Nikon af-s 85mm 1.8G,超聲波馬達,對焦好很快,不過對焦距離再縮水… 只淨8米就無限遠(口徑:67mm)。出產年份:Jan 2012 >
現今鏡皇,Nikon af-s 85mm 1.4G,10米對焦距離才到無限遠,有點良心...哈哈~(口徑:77mm)出產年份:Aug 2010 >
再到依家無反新鏡頭,NIKKOR Z 85MM F/1.8 S,只話俾大家知最近對焦距離0.8m,但最遠對焦距離到幾多係無限遠不得而知...(口徑:67mm)出產年份:July 2019 >
好!鏡頭屎介紹完畢!正式去相!由風景相開始!
(新增30-7-2020)前幾日曬咗菲林,upload埋上嚟俾大家睇~
正如一開始講去台灣旅行,隊友帶55mm f1.2,我就帶85mm 1.8,係剛開始時,我都未用上佢既好處,直到… 到池上影到呢位哥仔開始!隊友用55mm 1.2無論點構圖,都影唔到我呢種效果。
iso64 f1.8 1/1000
一排排單車,散景幾有feel!
iso64 f2.8 1/1600
最深刻一張,竟然冇用追星儀,6秒能夠打到銀河!
iso2500 f2.8 6s
小霧海斜照日出!6角flare出現了!
iso64 f8 1/640
我的電動車!有flare!
iso64 f1.8 1/5000
代表作大概如此!由於台灣旅程後段用85mm幾多,加上之前dcfever出過文章,所以呢度唔再出相。想睇更多旅行用85mm相,請tick台灣之旅 7-14 Sep 2018 (第一天至第四天)、台灣之旅 7-14 Sep 2018 (第五天至第六天)、台灣之旅 7-14 Sep 2018 (第七天至第八天)。
戰場移番香港先!
幾年前,唔知呢枝鏡好處,認為岩焦距,就帶去沙螺洞影螢火蟲~好可惜此景不復再...
f1.8 30~45mins
獨家攝影人數唔超過10個!13 Jan 2019 - 鳳凰山之雲海日落,又出過文章,有興趣可睇番果日旅程~
iso64 f11 1/125
四方山日出,85mm壓景突顯山勢~16 Feb 2019 - 大帽山黑夜霧海、四方山日出小燒天、三門仔日落magic moment
iso64 f11 1/80
真.高清盧吉道夜景,18 Feb 2019 - 真·高清維港景+雲霧,又出過文章,有興趣可睇番果日旅程~
iso64 f11 20s
大東山芒草平凡日落~睇下前方個散景^^
iso64 f4 1/800
去到烏溪沙打卡位,唔知點解有架單車,幾有feel,加上天頂有厚雲,不如用85mm重點構圖構架單車。加上慢快門,令海水流動,更加反射天色~
iso64 f11 20s
大帽山與陰影,5 Nov 2019 - 郊遊篇:麥理浩徑八段,又出過文章,有興趣可睇番果日旅程~
iso64 f4 1/1600
85mm構圖構埋海水暖流!夜景神器 - H&Y Pure Night Filter,想睇下Night filter點提升夜景實力,tick入去睇下啦~
iso250 f5.6 30s (H&Y Pure Night Filter + Fotopro X-go Max)
六角星芒時間!全因老鏡唔追求完美波波散景,六塊光圈葉,先能夠做出額愛有味道六角星芒!開波~
大山雲海日出小星芒,全民參與12 Jan 2019 - 大帽山之雲海日出,又出左文章,有興趣可睇番果日旅程~
iso64 F11 1/50
無聊經過馬鞍山,見有機會影星芒太陽,緊係唔會任何放過機會,但陽光係雲隙滲出,光差極大,故用上GND幫助控制光部!
iso64 f22 1/60 (H&Y GND 0.9 Soft + Fotopro X-go Max)
果日係馬料水回程,隊友話影車軌wo~睇下,係六角星芒!重遊舊地 - 香港地質岩石公園:荔枝莊,又出過文章,有興趣可睇番果日旅程~
iso31 f22 115s
未上到呢個位年宵打卡位之先,個心已經預測到85mm fit 爆!
iso400 f22 1/3
飛鵝山一般打卡夜景,已經滿足唔到朕喇!多重曝光!六角散景!
唔記得兩張相點設定~
(新增30-7-2020)展示街拍0.02秒手動對焦,快過自動對焦~呢張相係我等緊過馬路嘅時候,眼前側邊突然有個人踩單車,即刻拎起部相機手動對焦按下快門。只要心入邊有把距離尺,手動對焦不成問題~反觀係一種優點!
iso2000 f2.8 1/160
(新增30-7-2020) 行過金魚街,想展示一下散景味道!½構圖,左邊散景,右邊主體。
iso100 f2.8 1/250
天堂之路!行緊上大石磨,陽光突入!4 July 2019 - 大石磨之雨中彩虹、日落,又出過文章,有興趣可睇番果日旅程~
iso400 f5.6 1/200
距離主體散景
iso160 f2 1/250 (道具Fotopro X-go Max)
自拍時間!近排愛上自拍~不過用85mm有點遠,所以用黎自拍果時,最好有同伴或者隊友幫手協助。
大帽山例位自拍,全開光圈,盡顯波波散景!
iso1600 f1.8 1/8 (Fotopro X-go plus)
落日歸途~ Thank you!同伴!
iso64 f2.8 1/4000
影影下架單車,突然自拍癮發作,即刻教大光圈,推高iso,衝埋㗎單車度擺pose!
iso400 f2.8 1/100
自殺崖自拍,由於果日天色麻麻,不如用85mm拉近與城市壓境!幸遇上幾位都忙緊互相自拍師兄,大家輪住幫忙禁制,先成功打卡!睇下,筆者距離2x~3x米,後面仍然有散景。此老鏡有40米對焦距離,玩散景真係有排玩!
iso64 f1.8 1/80
大東山日出後,人景合一,可算是這種XD。 影男仔唔好咁blur,因此設定光圈f4。Thanks 隊友!Ps:連隊友都俾我毒害埋,購入左呢支神奇老鏡^.^v
iso64 f4 1/400
行行下~隊友突然靈感到,叫我chok!隊友話:果刻我喺觀景器睇都好有Feel!
iso64 f4 1/400
用後感:
呢支鏡頭,令我對影相興趣進入另一個層次,40米對焦距離,喺創作性帶來更多以想不到效果。雖然現代鏡頭,將鏡頭越做越大,係有利波波散景,不過好可惜對焦距離越來越短。令現代新手有種錯覺(包括曾經既我),要影有散景一定要影小朋友,一定要小物件,一定要好痴到埋,先至有散景先夠blur。呢個係一個好錯諗法,係唔知道而家d鏡頭廠商,為咗降低成本,為咗加快對焦,依家啲鏡片越做越輕?依家潮流興冇散景?新出啲鏡頭連對焦距離都唔show出黎=.='' 每個人心中自有答案~
如果大家想真心、交心影相,最好用老鏡手動鏡。因為手動對焦時候,先能夠慢慢細味構圖,構出更有品味、更獨特既相。如果只係靠自動對焦嘟嘟叱擦咁影相,在筆者角度,只不過貪圖快靚正,欠缺全程構圖thinking過程。
倘若大家想更加細味沿途風景或人像,更加應該用上老鏡,因為呢個係休閒時候。休閒時候更應放鬆心情,慢慢手動對焦,細看觀景器逐步變化~手動不同光圈,控制唔同景深、散景效果,拍攝出與眾不同作品。
『用心看世界』成為我行山、影相和做人宗旨。行山影相,抱着欣賞大自然美既心態,就算有時遇唔到靚景,我都冇咩所謂。因為最緊要過程,你同咩人行,每次旅程交談之中有咩得着?有咩見解交換?有咩需要進步?就算一個人行山也好,自己能夠諗嘢,釋放心中煩惱,亦都係一件賞心樂事~
希望黎緊有機會或者有mood分享其他野,老鏡、新鏡頭又好,日常遇上大景出動經歷又好~唔知下次幾時,會遇咩大景又可以成個故仔咁呢^.^v
歡迎加ig交流!
instagram: andrewncy.images
多謝收看!多謝睇我分享!
完