優點:
1) 價錢大眾化:$450呢個價錢只可以買到EF-S 17-85mm,後者光圈整整細1-2級(4-5.6)
2) 重量輕:EF28-135 IS無f2.8已經過500g,騰龍呢支有恆定2.8,多得騰龍肯落重料(多塊非球面)減輕重量/縮小體積(Canon原廠鏡加一塊非球面起碼加你$100)
3) 焦距實用:28-75mm放落APS-C度真係唔夠廣角,不過75mm x 1.6出街絕對夠用
4) 微距勁:75mm@33cm對焦距離,散景仲勁過50 f/1.8@45cm,影花仔,小模型夠晒
缺點:
1) 對焦聲:帶佢去影管弦樂之類既音樂會,要有「畀人趕出場」既心理準備---嘈到拆天
2) 對焦唔準:就算唔係微距狀態,用電腦放大黎睇經常有甩焦情況
3) 唔支援全時MF:用緊live view想微調焦距,幾乎唔記得住要撥去MF
4) 無VC:當然,有就唔止呢個價錢,只能算半個缺點
5) 畫質差:中央唔講(中央都唔靚就唔係鏡頭),邊位色散勁,而且畫質散
評價:
我係響ebay連40D+小小白買返黎,前用家保養好好,心想擁有第一部DSLR,come with一支恆定2.8,真係好滿足,有埋1:3.9倍既微距功能....
不過以上講緊既係「光線充足」既情況下既好處,一入室內....ISO800+F2.8+1/60s既光度,對焦已經好猶豫,反應一d都唔似有2.8既亮度....
有兩次帶佢去影舞台表演,雖然比小小白可以爭取快一級既快門,不過返到屋企電腦,即時現形,30張約有13-14張走焦,起初覺得40D對焦一般,但用小小白影同一個場景,雖然細一級光圈,但對焦交足功課(30張少於5張走焦)如果唔係有小小白在手,無比較既話,我可能會懷疑40D既對焦能力,不論係中央單點對焦,還是9點全對焦,走焦問題仍然存在,而且對焦對得好猶豫,「拉風琴現象」經常出現(討厭)...試過用直尺同卡片測試對焦情況,發覺偏移情況又唔係咁嚴重(28mm或75mm@40cm對焦距離,走焦不到2mm)
另外對焦聲.....試過影家中兩隻熟睡中既兔仔(@1m),一對焦,兩隻兔仔即時醒晒....
所以,影舞台我唯有用50 f1.8,雖然都係嘈,但可以爭取更快既快門,最多自己「用腳變焦」
咁既價錢有2.8/微距,實在難能可貴,不過如果騰龍推出此鏡作為全片幅既標準變焦鏡,係唔係應該加多幾錢肉緊落去呢?因為對焦準繩度及聲浪真係嚇怕唔少用高端機既用戶,至於APS-C既用戶,就算唔影開超廣角/百人大合照,都必需為此鏡付出代價(另買17-24mm開頭既廣角鏡),因為45mm真係好窄....橫幅影五個平排既人(連腳),都要10m攝影距離,去到人多既地方死硬,建議APS-C用戶要用平價2.8,倒不如用同廠17-50好過
至於畫質,此鏡目標用戶乃全片幅機如:5D/D700等,但畫質真係唔得,縮光圈至4情況仍然唔理想,難以配合超過12m 既機身,既然全片幅用戶用$2400-$3000買機(A850都要$2000),相信此等用戶都唔介意買一支高質又使用率最高既標準變焦鏡,講真,雖然EF 24-70貴佢好多($1300),瀏覽多個鏡頭測試網站,MTF的確比騰龍好,加上USM既幫助下,相信對焦會快過此鏡(不過聽聞師兄話EF24-70仍然有走焦問題)
總結:APS-C用戶若已有超廣角鏡在手,入手此鏡增加標準焦段火力絕對無問題,不過經常要影室內兼動態環境既用戶,應該要換一支有USM/AF-S/SSM既鏡頭