文：本香猛
除了高達同勇者王，相信好多 80 後印像最深的機械人動畫一定是《機動警察》，大家愛它夠寫實，無粒子炮無新人類，駕駛員跟你我一樣是平凡人，老老實實用警槍對付壞人，打得死之餘仲經常甩手甩腳，收隊時被上司臭罵！這種真實系機械人的吸引力不比超級系低，出名「掠水唔使本」的 Bandai 當然不會放過玩具化機會，日前便公開了主角機英格倫 1 號機的 ROBOT 魂宣傳照，大有可能在往後日子推出。
Robot 魂一向標榜高可動性，從官圖看英格倫更是超額完成，沒有因組件較大而影響設計，例如整條前臂可以垂直舉起，令手執雷明登時更似模似樣，另外膝部及腳掌位都設有雙重活動關節，藉此增加屈曲度，能擺出以前同名模型統統做不到的經典跪地動作，擬真度攞滿分！靈活以外，機體身上的 Detail 位也跟到足，例如手盾位置如實印有「警視庁」三字，膊頭有「特 2-21」編碼，雙肩有透明燈組，最意外不到是連警章也幾可弄真，兩個字：「超正」！唯一擔心是日後大貨機身顏色 Keep 到幾多，但願不是「官圖無限美」啦！
英格倫 1 號機 ROBOT 魂暫未確定上市日期及零售價錢，同期有機會發售的還包括 2 號機及「土木建設用タイラント 2000」機體，買齊就可自組戰鬥場景。不過筆者貪心些，若有埋鷹頭獅就 Perfect 池了！
