文:本香猛
今時今日超像真人偶至所以發展成熟,本地某間龍頭人偶廠當然有份推動,但背後一班韓籍雕師也功不可沒。近年這班匠人開始獨立接 Job,又或轉投韓國公司門下,當中韓廠 Blitzway 就曾經有 K.A. Kim 等大師坐鎮。另一間韓廠 JND Studios 最近亦急速發展,在「小丑」、「神奇女俠 1984」兩大雕像後,新作繼續以超英作題材,而且更是女神 Anne Hathaway 版本的貓女郎,神似度之高又讓人見識到韓國雕師的鬼斧神工。
雕像全高 26 吋,一改流行的半胸像造型,而是一如同廠前三個作品般以全身像示人,比例為 1:3,配合正方形地台,入手後要預留空間擺放。頭部由雕師李秀英(Soyoung Lee)負責,以矽樹脂雕刻出 Anne Hathaway 的五官輪廓,白皙膚色加一雙豐唇都極為像真。真人一雙招牌大眼睛,這裏以玻璃眼球還原,微微斜視神態自若,較本地大廠的 1:6 Figure 的吊滯要具靈氣得多。同時眼皮連臥蠶都造埋,沒有過份「美圖」,單是這點已值得畀 Like!要讚的還有一頭秀髮以植髮技術重現,出來效果絕對比軟膠頭美觀得多。
Body 方面,玲瓏浮凸身體外是全黑緊身衣,配上皮手套、過膝長靴及腰帶,男性看到絕對會流口水。惟官圖所見上身拉鏈似乎不能拉開,一眾「鹹濕仔」難免失望。另外戰衣材質也沒有公開,若然是人造皮就大打折扣了(玩過1:6人偶都知會隨年月粉碎)。配件有可掀式眼罩、手槍及戰損蝙蝠俠面罩,其中面罩能夠整個除下,方便玩家望清 Anne 個靚樣。
此神作預計 2022 年 1 至 2 月派貨,官價 US$1,999,折合約 HK15,538,以質素來講定價絕對合理,只可惜早前全球開賣時已迅速售罄,仲想入手就要留意住廠方公布,或搵搵有無本地代購幫手了!