文：本香猛
《百獸王》這個長青 IP 玩具出極都有，超合金魂、食玩到 LEGO 選擇甚多，最近本地薑 Action Toys 再度出手，宣布推出「ACTION 合金」頭炮「VOLTRON LION FORCE 金剛戰神百獸王」，將於明年第二季上市，合金控要儲定錢了！
作品高約 22cm，Size 唔算大，屬便於收藏的理想尺寸。全隻以合金、ABS、PVC、POM 混合打造，紅、綠、黃、藍、黑五獅不少部分均以合金製成，雖然官圖略帶膠感，腰及小腰又不是電鍍，但相信實物會相當足秤！身型比例、四肢長短及水桶腰跟番原著，三角底褲也採用直角設計，而且胸口中央皇冠與十字架為立體浮雕處理，絕非貼紙咁求其，美中不足是螺絲窿外露穿崩，觀感略為扣分。
齋睇相未知機械人如何合體，但觀其可擺出不同甫士，可以預期靈活性不俗。另外五獅分體為獨立型態，並可通過替換部件來重現劇中的獅子腿收納造型，同時獅頭可以左右轉動，四隻腳更設有關節，以便擺出不同站姿，淨係獅子都有排玩！配件方面，隨附十王劍、旋轉激光刀、雙劍及展示台座，算是相當夠玩，可惜頭雕面相只有一款，多送一個咆?樣揮劍時就更入戲！
此作即日起接受預訂，售價為 HK$1,160，定價算是進取，惟廠方之前已出過 Q 版百獸王，可見將來又似乎有 Mini 膠版，對非合金死硬派來說似乎吸引力不大。Fans 反而更期待獅人鳳、六神合體、天地雙龍等合金版推出，未知廠方聽唔聽到大家意見呢？
