文：本香猛
雖然 Marvel 電影票房大不如前，但 Iron Man 作為「開國功臣」，依然是最有人氣角色，所以無論玩具廠出咩玩具，都總有人埋單！最近 LEGO 又出手，推出編號為 76327 的 Iron Man MK4 Bust 半胸像，容易砌仲跟隻迷你人仔，可惜有一大敗筆，未知會否影響銷情！
這次的半胸像跟之前的「76215 Black Panther 黑豹」相比細隻好多，共有 436 個零件，完成後高 17cm、寬 17cm、深 8cm，雖然無黑豹胸像咁有氣勢，但 Size 更適合放在桌面展示。作品顧名思義以《鐵甲奇俠 3》的 MK4 裝甲作為原型，採用了大量紅色及金色磚砌成，大胸甲、闊肩膊等細節都跟得好足，弧形反應爐用半透明藍色件製作亦頗見心思。惟問題是面相大幅走樣，下巴位置尤其奇怪，由本身型格變成鈍胎造型令人失望。而且胸甲的顆粒外露亦不美觀，以 LEGO 能力理應做得更好。
雖然樣衰，但可動性加番分，例如它的頭部可以左右轉動，背部可伸出 2 片可調式襟翼，膊頭可彈出 2 支伸縮肩砲，玩法唔比 1:6 Figure 遜色。另外，它可配合底座一同展示，配有印刷銘牌，以及一隻 Iron Man Minifigure，後者全身輪廓及花紋均是印刷件，印刷細緻精美，比半胸像還原度更高。
此作將於今年 6 月 1 日上市，建議零售價 US$59.99，折約 HK$464。特別一提，同系列編號為 76326 的 Iron Spider-Man Bust 將於 8 月 1 日開售，共 379 片零件，組裝後同樣高 17cm 左右，買埋就可來個師徒重聚！
