文：本香猛
「情懷」呢家嘢長賣長有，Marvel Cinematic Universe 樂此不疲，日本玩具大廠 Bandai Spirits 旗下的 S.H.Figuarts 系列亦如是。最近他們就借「Cine-Toy 魂」之名，宣佈推出《復仇者聯盟：終局之戰》鐵甲奇俠 Mark 85，繼續向戰死的 Tony Stark 致敬！
講到 Mark 85，影迷肯定記得是 Tony 臨終前最後一套戰甲，納米科技玩到出神入化。不過回歸現實，今次這隻 155mm 高的人偶，造型基本上沿用之前出過的「最終決戰版」。廠方今次強調色澤「飽和」，將金屬暗紅同金色噴得更深色，同時將所有戰損痕跡抹去，整體質感更光鮮、更具金屬光澤，齋睇樣不摸上手的話，還會以為是合金模型。
至於 Tony 個頭雕，好明顯是攞返之前「I am Iron Man」的版本模具來翻製，主要重新上色，由原本傷痕累累變成大戰前的「青靚白淨」樣。對於沒有舊版的新手來說可能仲有吸引力，但對於屋企已經擺了幾隻 Iron Man 的老玩家來說，這種低配版「改頭換面」做法難免欠誠意一點。
S.H.F. 出名多關節，此作遍及全身上下，並提供左四右六隻替換手，當中包括「無限手套彈指手」，擺明要重現「I am Iron Man」這幕催淚場景。特別一提，今番手腳噴射特效件改用了「亮橘黃色」漸層，藉以呈現更高溫、更具威力的視覺效果，也與先前兩個版本做出分別。
此作售價 9,900 日圓（連稅），折約 HK$487，今年 4 月 28 日開放訂購，預計明年 9 月正式發售。雖然論價錢不算貴，但一隻主要靠「改色」及「拼湊零件」而成產品究竟好不好賣，實在令人懷疑！
