【靜岡．伊豆．橫濱】之旅－Day 4（下）：伊豆急下田溫泉名宿！

返到靜岡，今晚會係伊豆急下田嘅溫泉旅館度嘆下下，因為熱海班JR好煩，一係就2個鐘10分鐘左右，一係就要搭多半個鐘，仲要轉車時間趕，為左趕呢班車，要整速食lunch，一個鐘內買晒飛同拎行李兼等位食野。

揀左間pasta餐廳點知又要等位，不過原來呢間野D pasta都唔錯，而且上菜時間好快。

食完去熱海轉車，好多車飛好亂呀，原來3張係要一set 一set咁出閘入閘。

2個鐘真係過得好快，去到南伊豆，原來呢班車係super view，即係車尾度有全景座位，可以睇到伊豆海景呢∼

隔離有班車都係伊豆限定，全黑色，配合返伊豆急下田嘅黑船！好有型呀！有少少明點D鐵道迷咁鐘意日本鐵道。可惜佢好快開走！

去到伊豆急下田站，今晚果間溫泉旅館—下田大和館會有shuttle bus接送，係出口右手面就係，每半個鐘一班。

下田大和館係東京電視台節目嚴選嘅名宿之一，所以好期待今次入住。

去到旅館前見到一大片海灘已經覺得好正，入到去service極好，請你坐低係有海景嘅lobby，有茶有果子俾你嘆住check in，雖然英文唔算好，但都溝通到。有外國遊客，但主要係日本人。

lobby附近有得揀浴衣，好多花款，款式都好靚，條腰帶仲靚，唔係求求其其冇pattern果種，打得靚係好似正式著果D有個靚靚花紋蝴蝶結，呢點真係好少旅館做到咁細致。

16：10到左酒店，就揀食飯時間18：00/18：30兩個時間都好早，仲揀埋聽朝早餐時間08：00/08：30。
我book嘅係有房內有private bath嘅房，仲睇到海景，around 27000左右，1個人嘅special package黎，唔知關唔關事，間房感覺內唔算好大（比起白浜海舟），唔知其他果D會唔會大少少呢？

間房真係好得呀！

上次試過食飽抖唔夠走去浸搞到我之後幾日都消化不良，今次幾大都浸左先。

露台有得曬太陽，呢邊都算幾熱下，不過有陣陣海風加上旁傍晚，浸又唔覺得好熱喎。

到18：30食飯時間，去5樓餐廳食。自從上次去過伊豆後一直對呢邊嘅海鮮、刺身念念不忘，係超新鮮的。今晚Dinner主要係食炭火燒海鮮。

前菜好精緻！

一黎左除左前菜，就係刺身了，真係好好食，起碼出面魚市場食都冇咁彈牙。

之後就係大大盆海鮮炭火燒喇，有金目鯛、帶子、鮑魚、蝦、蔬菜，仲有一塊5花腩。

侍應幫手燒帶子同鮑魚，燒到半熟，手勢好好。

其他就要自己燒喇。

仲有沙律～

食晒已經好飽喇，當我以為冇喇掛，waiter同我講 we will serve the main course.

仲有，但係真係食唔落。不過當佢送到黎時，咦，金目鯛煮嘅湯黎架喎，仲加埋飯做湯飯，waiter話係傳統美食黎，咁係咁咦食兩啖試下味啦，唔試由只可，一試就成碗食晒，易入口，又鮮味，又有咬口，結果食完都再添。

仲有甜品同水果任食

朱古力噴泉

食到咁飽，返飯睇下露台出面，有海浪聲，又有海風涼浸浸，不過多雲，星星唔多，不過見到 嘅都好閃。

環境太舒服，瞓左陣11點半去左浸，可能太夜，一個人都冇，包場浸。大浴場個海景都好唔錯。

值得一提嘅係呢間溫泉旅仲有絕景spa，如果係book我個package可以半價book spa。唔知其他package有冇，不過其實個景咁靚值得豪下。

旅館亦都間小小的土產店，好體貼咁有賣杯麵～

溫泉旅館有齊化妝水，lotion，cream，仲有按摩椅。如果太早食飯晚上會肚餓，可以係自動售賣機買野食，有熱食亦有雪糕野飲等等。

買左支雪條返房慢慢嘆，浸完一定好好瞓。

聽日會出發去橫濱，其實想去好耐，但東京都未去勻晒，終於去得7788就可以向橫濱出發嚕。

更多日本中部旅遊攝影資訊

更多伊豆旅遊攝影資訊