《單車友注意》想踩勻各大車廠最新系列車款？快啲入嚟－1蚊都唔駛！

旅行嗰陣成日想踩單車周圍兜風，奈何城市單車一般都唔多好踩仲要定時定候還車，而喺歐洲單車舖租單車又閒閒地過百蚊港紙⋯⋯不過宜家就有另一個方法畀你 － 保證架車踩到你唔願落地、保證你唔駛計住時間還車－仲要絕對一蚊唔駛！

話說意大利每年都會喺車廠贊助之下喺各個城市舉辦BikeShopTest，等各位車手可以親身試驗各大名廠車款。車手只需要即場登記後，就可以拎住個PASS TESTER牌盡情去各車廠攤位試踩各款最新山地、公路甚至電動單車！

我就成功用護照即場登記，分別踩咗Specialized嘅CruX Expert X1同埋Scott嘅Foil 20喺米蘭周圍兜⋯⋯有冇好心動？

不過建議大家著定合適服裝去踩，最好自備腳踏同頭盔，因為並唔係每家廠都有腳踏提供，而想用鎖踏嘅話記住帶埋鎖鞋。

除咗BikeShopTest外，我見到活動仲有OutdoorShopTest甚至SnowShopTest，似乎都值得去湊熱鬧。

呢個就係活動時間表。最後一場試車活動將會喺11月5同6號喺羅馬舉行，想試踩嘅朋友就快啲plan吓喇:)

延伸閱讀：每年舉辦地點不一的「世界級」跑步比賽，你玩過未？
想睇其他離地遊記，快啲Follow我哋嘅Facebook page啦：
離地札記 Airborne - 世界上你可能不感興趣的離地及在地故事