優點:
- 二手價 6-7K 有支咁長嘅長焦抵到爛,見有好貨放快入手
- 由100 至 400mm 彈性佳,比定焦(384 或 456) 可以創作更多主題
- 輕呀,咁大支都唔夠1.4KG, 支小白仲重過大白!
- Size 唔算大,楂個sigma 50-500 及龍仔支150-600, 呢支短及小得多,機動性強!
- 光線夠之下成像可以好sharp
- 長焦在戶外影人像無得頂!
缺點:
- 2 級IS 防震,叫做有好過無咁解,用開4 級防震(如小小白)一定好唔慣
- 推到 400mm 成像鬆散
- 舊鏡要用圈圈去lock 實唔方便
- 入塵真係唔係問題,入水至係問題,加埋防震問題,給咗支陽光鏡,濕氣重啲或落雨粉已經可以收工。
- 1.8米對焦距離真係。。。。
評價:
作為一個初階(等緊上「中階」)嘅攝影愛好者,6XXX 入手到支400mm 紅圈白鏡,對比同類鏡又唔算好重(好似1.39KGS),雖可虛榮(因為初階係唔識嘢,拎支鏡出來好似好pro 的感覺)又實用,呢支機動性相對都很強了。
買呢支鏡原意係參加咗個荷花畫意攝影旅行,導師教用反射鏡,但得番幾日我費事煩,平平地買支大白用住先(因為要300mm 以上),我有小小白及1.4X extend tube, 不過效果應冇咁好,見都係6-7K,好快就入手咗,諗住上完堂就即放都唔會點蝕本。
作為手上最長焦,因為家中有露台,真係發現400mm 在full frame 的威力,我住19樓,竟然可以清楚看到過兩三個街口紅綠燈前行人個樣,再利用iPad wifi remote control 露台部機,然後返入屋嘆冷氣,咩人行過支燈,你都睇到,好似旺角西洋菜街支「天眼」咁勁!當然,都係在日頭進行~
到咗夜晚或入黑,呢支鏡唯一可以做嘅影月光,放在APS-C 有 640mm, chop 埋個月光都好清楚,但唔該放在腳架中。不過月球表面呢啲可以在教科書本或網上下載,咁影來做乜?咁即係呢支係陽光鏡來的。
大家諗一諗,600 ex 閃燈support 到200mm, 咁拎住大白用200mm 以下不如用小白或小小白?光圈衰極都有F4, 佢400mm用F5.6 在夜晚係唔駛用都得。我試過手持 腳架上在香港島露台影對面九龍,ISO 推到3200 手持都係會郁,IS 兩級同四級真係差好遠。
因為我係6D,對焦打雀可以算吧啦,但支鏡反應係快,只係我6D 追唔上佢,如果5D3 以上應該好啲,我都見過有師兄用一代大白打到雀的,6D 我試過打麻雀,但數毛就不太可能了。
好了,試過駁落去 1.4X extend tube 度(6D),zoom 盡400mm 開最大光圈,即跌一級去到F8,冇得自動對焦(賣比我師兄用1Dx 可以),我問過5D3 影友都唔得。如果真係用唔到560, 我覺得crop 相算啦,落咗extend 真係冇咁sharp...
如果你明白鏡頭構造,就知長焦入塵不是什麼大問題,但大白一代呢個設計最敗筆係入水,如雨水,你試想想一陣過雲雨來到,你收唔切就玩完,在內地夏天影荷花好常見呢啲天氣,稍稍覺得有雨來便要收機,或者準備防水風褸一嘢包住佢,因為大白一係伸縮設計,你通常係用tele 端 300-400mm 伸出來,入咗水真係難救!但真係濕過少少點好?建議收鏡返屋企或酒店用熱風筒吹番乾佢,性價比好都要幾千蚊,你養咗啲霉菌喺度就喊都無謂。
好了,荷花班完咗,因為防潮箱空間有限,都諗過放番支鏡出去,但我入呢支鏡真係好新凈,啲玻璃又清,我開貴咗少少都有人同我deal, 到最後我係唔捨得放番出去,因為6K幾又唔算多,放番出去我覺得自己好大機會又比皮幾嘢入大白二,當然,大白二對焦距離跌去 0.98米,4級防震,真係好用好多,但二手價係貴一倍。冇講錯,在肥花好多師兄都叫12K 仲要有價有市,但大白一識得用的話,影到出來點都有大白二 80% 吧?咁係咪值得比多 5-6K 要支二手大白2? 如果唔多機會用,我又覺得唔值囉,原因係:
- 影人可以用定焦或小小白代替,機動性強得多
- 唔多機會打雀但有時會去打下
- 荷花畫意係玩重曝唔駛咁sharp, 波波鏡都可以。
所以在我以上條件下,只會選擇保留及唔會再用400MM長焦,應冇可能又入番大白一,與其放得6K零駛,咁不如放番在防潮箱,得閒拎出來當望遠鏡影下玩下,對比大白二嘅缺點,作為初階排隊等緊上中階的攝影愛好或娛樂者,應該可以用經驗(或者叫少少技巧)去補救到,所以我決定唔放留番喺度了,叫做有支長焦放門口吧?反正呢支鏡真係唔差,只不過係大白二太好(也太貴),差價我留番來補貼下買支 85.2L II 人像算吧?
點解比五星,6XXX買呢支紅圈長焦白鏡,有機動性又有焦距上彈性,梗係超值又唔差啦