文：本香猛
近年 Pokemon 卡愈炒愈貴，全球都想跟這個人氣 IP 聯乘搵番筆！最近訓練員又多一個收藏目標，事關 LEGO《寵物小精靈》套組終於亮相，頭炮正是人氣最高的比卡超，編號 72152 Pikachu and Poké Ball。
是次套組共有 2,050 塊積木，完成後高約 35cm、闊約 26cm、長約 39cm，雖然不是 1:1 實物原大，但用來做擺設已經夠晒搶眼！比卡超身驅用上大量鮮黃色磚砌成，黑色耳尖、紅色臉頰及標誌性閃電尾巴都有還原，並可透過心形或平整尾端來呈現性別，細節位做到足。
套裝另一玩味是比卡超的四肢及尾巴均有活動關節，能夠呈現牠「紮紮跳」模樣。另外又可砌出閃電火花、精靈球及展示座，展示座仲暗藏「25」的小心思，藉此向比卡超在圖鑑裡的編號致敬。
此作預計 2026 年 2 月 27 日發售，建議售價為 US$199.99，折約 HK$1,559，定價似乎貴了點，而觀乎網民反應也是「彈」居多，有些罵比卡超面相崩壞，有些指神似度比 Mega Construx 版仲要差，更有批評指「做得很好，下次別做了」，所以值唔值二百蚊美金，就見仁見智啦！
反觀 LEGO 同期推出的「72151 伊布」及「72153 關都御三家」品質更好，前者 587 件零件賣 US$59.99，被不少玩家封為「最抵玩之選」；後者 6,838 件零件兼可砌出妙蛙花、噴火龍及水箭龜的最終進化形態，雖然定價高達 US$649.99，開賣 24 小時預訂依然火速爆滿，足見粉絲威力！
而講到預訂，以上套裝已於外國開售，惟留意由於中國積木品牌 Keeppley 早擁有《寵物小精靈》的亞洲區獨家授權，令 LEGO 官方無法在內地、香港、新加坡及台灣等地推出相關產品，所以本地玩家想入手，就要搵海外代購幫幫手了！
官方宣傳片︰
https://www.instagram.com/lego/reel/DTaT1PSD1Bu/
