Fever達人攝影心得分享

每年嘅三、四月係京都櫻花盛開嘅季節，亦都係遊客蜂擁而至嘅時候，目前2017最新公布嘅各地花期，京都櫻花開花時間大約係3月29號，而盛開期就係4月6號，預測會隨日期愈近愈準確，出發前記得留意最新資訊！

除了日頭賞櫻之外，京都仲有「ライトアップ」（light up），即係「賞夜櫻」活動。喺夜色中欣賞被燈光映照嘅櫻花，別有一番風味。至於京都有咩賞櫻景點推薦呢？等小編一一介紹比你知啦！

＃京都賞櫻景點懶人包

京都的代名詞——清水寺

◆ 開放時間：6:00～21:00（可以參考官網公布嘅春季夜間參訪時段。）

講起京都大家第一時間會諗到咩呢？無錯，就係擁有百年歷史嘅清水寺！佢除咗神社建築出名外，周邊景點眾多都令到清水寺成為京都必去嘅熱門景點。被櫻花包圍嘅清水舞台係遊客最期待嘅畫面，不過清水舞台而家維修緊，雖然可以照上去，但係景觀可能會差啲！

用眼睛寫詩——哲學之道

◆開放時間：隨時

喺櫻花飄落嘅哲學之道上面行，突然成個人都好似感性咗。因為櫻花，所有野都變到又浪漫又有詩意。哲學之道除咗係京都最適合散步嘅地方外，亦都係知名賞櫻景點。由於昔日哲學家西田幾多郎，成日係呢到散步、思考，所以被後人稱為「哲學之道」，鍾意櫻花嘅文青們一定唔可以錯過！

京都的原始風景——嵐山

◆ 開放期間：隨時

嵐山大家都一定聽過，無論係賞楓定係賞櫻，嵐山一定榜上有名。由於嵐山周圍有好多知名觀光景點，每年賞櫻時節都會吸引大批遊客。關於嵐山附近嘅景點，小編相信大家一定都好熟悉，所以就唔再多講，唯一要提醒大家，千祈唔好錯過每年都會喺中之島公園舉行嘅枝垂櫻夜間點燈！比起日頭，夜晚嘅嵐山多了份神秘感，再加上櫻花陪襯，會有種時空錯亂嘅浪漫感覺！唔明？親身去睇下就知！

華麗花見——醍醐寺

◆ 開放時間：9:00～17:00

位於京都伏見地區嘅「醍醐寺」，既係世界文化遺產，亦都係日本櫻花百選名所之一！百選名所係日本財團法人櫻之會喺日本全國選定嘅100個賞櫻名所。醍醐寺最為人熟悉嘅莫過於「枝垂櫻」，特徵係細長而向下垂放，迎風蕩漾，堪稱櫻花中最優雅曼妙嘅舞者。如果無時間去其他地方賞櫻嘅朋友，小編建議你直接嚟呢到，感受一下櫻花灌頂嘅魔力！

最後饗宴——仁和寺

◆ 開放時間：9:00～17:00

由於以前好多皇子皇女喺呢到削髮出家，所以仁和寺又被尊稱「御室御所」，寺內嘅櫻花好自然地被稱為「御室櫻」。仁和寺嘅御室櫻亦都係百選名所之一，御室櫻以晚開聞名，開花期平均遲其他地區一個星期至十日，所以有人話呢到係「京都最後のお花見」。喺盛開時期，御室櫻由樹枝頭開到樹枝尾端，成個天空好似都比櫻花圍住，密集程度真係唔講得笑。如果喺其他地方見唔到櫻花嘅朋友，記得嚟仁和寺碰下運氣。

平安貴族的浪漫——岡崎櫻迴廊十石舟遊河

如果你覺得每次賞櫻都淨係散下步好無聊，小編推薦你去「岡崎櫻迴廊十石舟遊河」，搭京都地鐵喺「蹴上駅」落車，行五分鐘左右就會見到岡崎十石舟嘅上船位。你可以搭住船欣賞岸邊櫻花，體會屬於京都人嘅浪漫。

昔日風雅的再現——平安神宮

◆ 開放時間：8:30～17:30

平安神宮都係賞櫻勝地之一，除咗入口處標誌性嘅鮮紅色鳥居外，你仲可以進入正殿後方嘅「神苑」參觀，欣賞日本明治、大正時期嘅庭園傑作。用粉紅色櫻花裝飾庭園，臨水櫻枝微微彎曲。另外，平安神宮賞夜櫻稱為「紅しだれコンサート」（紅枝垂櫻音樂會），喺呢段時間，除咗開放南神苑觀賞夜櫻外，仲會喺東神苑裡舉辦音樂會。音樂伴隨住夜櫻，融合視覺同聽覺嘅享受，好chill啊～

◆ 注意：進入神苑內禁止腳架攝影