【靜岡．伊豆．橫濱】之旅－Day 2：竜ヶ岩洞鐘乳石、遊濱名湖食饅魚飯！

第二日嘅行程其實一D都唔密，但係就非常多意外。

一早係酒店食早餐，400幾蚊包早餐都算係咁，應該有嘅都有，味道都唔錯。

之後出發去龍之岩洞，行行下拎相機，咦？本passport呢？？？搵勻個袋都冇唯有返酒店再搵，都係冇。莫非跌左？唔係要報失掛.....咪好煩？諗下最後一次拎passport出黎時係....check in! 問下reception先，遠遠行過去見到佢地收埋左的我本野.....有少少嬲囉，passport咁緊要，點解唔送返上房俾我喎！

終於可以出發，竜ヶ岩洞係日本中部有名嘅鐘乳石洞。因為睇相都覺得幾靚加上未見過鍾乳石就去望下。一朝早搭巴士，其實好方便，演松站出面15號巴士站搭奧山行就ok。點知去到剛好開走左，因為班次都唔算密，買下野飲下又玩下手機就有下一班，要搭成差唔多一個鐘車先到。

成架車得我一個'O'

搭左成個鐘，幾時到架究竟‥‥‥

搭左成50幾個站終於到喇，差唔多成個鐘車程，聽住歌D時間過得快少少。

終於落車喇.....

行8分鐘左右就到，走果時記住預埋行出黎嘅時間。

行入去時見到周圍嘅景都好靚。

見到好多日本人都會黎，外藉遊客反而冇乜。

門口有講解地形同埋石嘅結構，就算係中文我都係唔會睇得明。

入場費HK$1000其實都幾抵@@

入門口已經feel到裡面比出面涼好多，原來裡面只有18度。

 

門口有個有好多蝙蝠嘅館，唔知係唔係原本好多，但趕晒佢地出黎住，哈哈～

其實佢地都幾可愛丫。

入去嚕！

有好多奇形怪狀嘅鍾乳石，有筍形，有D有條紋，有D柱狀，又有D個面好滑，望落去好似有層膠係面咁，半透明架。摸下個質地又好硬，都幾得意。

仲有比較出名嘅係鳳凰之間，黃金之大滝同黃金之富士

西柚皮嘅質地～@@

係裡面嘅瀑布

水神樣都好靚呢。

裡面好濕滑，因為好多水池呀、流水(同滴水)，如果要去最好著波鞋。

最後出口度有一間迷你展館、紀念品店同食堂。

紀念品店有天惠之泉嘅泉水，各種礦石，水晶以致金箔護膚品都有得賣。
要留意返回程巴士起碼20分鐘一班，剛剛走左架，唯有等一等。

呢種就係愚人金喇，呢隻野招財架～

呢度估唔到都有金箔野賣喎～不過呢個牌子未聽過，都係去金澤先買。

上左車之後原來打算係浜松北高落車，但其實呢架巴士有成50幾個站......結果就係一個好似樣嘅站度落錯車了。唔緊要，只係等多20分鐘姐.....之後終於又上到車，今次睇清楚先落車。

下一站係去館山寺溫泉果邊食鰻魚飯，明明諗住2點食，搞搞下差唔多3點，已經好餓了T^T
落左車後好困惑，到要係邊轉車，結果原站等，咦，唔對路! 等極D車都係去濱松站。

（太可惡，我一定要影低你個衰樣）

咁一定係對面線啦。再問下司機，司機話要過對面線向右行。過對面之後，搵到個一樣名嘅巴士站。但冇我架30號。好啦，問路人甲乙丙，個個都話唔知，唔係唔知就溝通唔到/帶我去另一個一樣名號巴士站，但都係冇我條線。

呢個完全唔係囉救命呀

唔好問我點解唔用google translation 同google map。呢度係—冇—訊—號—的。呢度亦冇的士......莫非真係去唔到.....嗚

正常人可能會返濱松站。但我唔會放棄。

搞搞下差唔多4點，好彩皇天不負有心人。俾我見到原來回程巴士浜松北高下一站個站名，結果我係塊程果條線度行搵果個站。終於俾我搵到了！咁上左車後，下一站就係浜松北高。原來佢係一個極隱閉嘅巴士站......原來，同一個站名同一間巴士公司可以有幾個巴士站，經一事，蔡一智.......

終於去到館山寺，已經4點了，雖然好肚饑，但對面就係去大草山嘅纜車，拿拿林去睇埋先食野。山上可以飽覽濱名湖，仲係戀人聖地黎。要留意最後回程係17：30。

大草山展望台嘅風景。原來係好靚架，不過梅雨季，日日都天陰，今日冇落雨算好好架喇，個湖面都俾Ｄ風同天色搞到黑蚊蚊，有少少失望。

個湖真係超級大，其實呢度只不過係冰山一角，湖名湖真係大得好誇張的，你話佢係海我都信。

點解我去親果Ｄ地方都係戀人聖地‥‥‥

樓下有一間特產店，裡面賣嘅野好多都係音樂盒，亦有濱松手信。

估唔到咁可愛嘅兔仔擺設都係音樂盒黎，仲有香草香味。

大部份手信都係音樂盒黎，而且呢度仲有得教你整音樂盒，如果一家人都幾啱玩。

原定去山下纜車站隔離個音樂盒博物館，不過佢5點半就閂，依家都差唔多5點了，去食野先∼

隔離有個遊覽船乘船場架，好多人都會去買蝦條餵海鷗，餵海鷗係季節限定架～

行下行下，見到有間專賣玻璃製品，有得學係玻璃製品上刻花紋，又有得穿玻璃珠，大人細路都啱玩。

路邊仲有免費足湯。

向湖直行轉右就見到盡頭係館山寺溫泉了，中途有超多間鰻魚飯，本身想試一間睇到湖景的，不過佢一早係3點閂左，而且tabelog食評一般，臨時改食呢間，呢間comment唔錯的，雖然冇湖景，不過格局高檔，又有坐敷，好傳統。呢個時間理應係落場時間，冇客，所以一個人坐6人檯∼

環境唔錯。

睇menu先知原來有分唔同色嘅鰻魚，依家餓到成隻牛都吞的落，梗係要試晒兩隻，呢個set起碼有1條半。

個盛器好特別呢∼未見過，有分上下重，上層係魚，下層係飯。

有冇奇怪點解D飯冇汁？其實係要另外加，有一支俾你加到夠。鰻魚就有另一個準點，不過啡色果條已經好夠味，白色果隻就好清香，可以點汁。

同平時食果D真係好大分別，唔好睇相好似覺得好乾好瘦咁，咬落去係有一陣油香，好肥美，而且冇骨，白色果隻勝在口味淡一D，冇咁肥，不過鰻魚味依舊好出。

1個女仔食呢個set可能會食唔晒，因為真係好多。

我仲額外加左隻溫泉蛋，好好食:D

食完周圍行下，呢度真係好靜，我係條街度唱歌都冇人聽到～哈哈哈～

搭車去広小路周圍行下，琴日太夜唔夠喉，行左Zaza City同Big Cinema。呢度日落真係好靚呀，但D人好似已經習慣左咁樣。

Zaza City原來有兩個館，東館就細D，D野就似大嬸野，西館就新潮好多，又有Uniqulo，都幾好行，幾易買到野。

東館呢間賣bra，款又多又平。

呢間野我都唔知係咩黎，不過見有個藝術家不停咁油畫畫畫，應該係展示佢Ｄ作品。

西館有好大間Uniqulo

亦有D OK款嘅時裝，價錢都算係平嘅，但唔好期望係東京D款。

沿住大馬路行，可以見到好多食肆，另外值得一去嘅係春華堂，有鰻魚餅，又有菓子，春華堂係靜岡都好出名，係必買手信店。

樂器之都點會冇樂器賣呢？

呢間鋪頭專攻懷舊小食，好吸引呀！

再見螢火蟲嘅果汁糖～我都買左兩罐。

另外JR站隔離嘅Big Cinema，終於見到有中國人喇，強國大媽真係無處不在。Big Cinema D野有幾平唔再講了。不過我一定會掃嘅係美容電器，上至洗面機下至脫毛器都會掃，因為好平又好好用。今次因為adaptor壞左所以買左個4個插口嘅日本充電器，叉得極快，手機叉左半個鐘已經有50%電。

Entetsu係遠鉄開嘅高級商場，有名牌賣，LV ，Gucci都有。

晚餐可以唔洗食，個無敵鰻魚飯仲未落格，但有DD肚餓，行經便利店就買左D串燒同雪糕乳酪返酒店做宵夜。

呢日嘅行程好體驗到一個人旅行時需要果種解決問題嘅情況同忐忑冇安全感嘅感覺，要食返多Ｄ宵夜壓壓驚先。

 

更多日本中部旅遊攝影資訊