【靜岡．伊豆．橫濱】之旅－Day 4（上）：日本平、國寶久能山東照宮！

一早7點起身仲早過平時返工，冇計啦，因為去日本平嘅巴士班次好疏，極速pack好行李再係JR站keep好行李就去等巴士。好彩平時有冇食開早餐，唔係買埋真係趕唔切。

8點正準時上到車，要成1個鐘到終點站，不過第一次搭要留意返日本平有2條線，唔係去rope way station果條係去唔到久能山東照宮的，係要行20Mins。但google map check過果邊係山嘅行車路黎，唔太建議咁搭。

第一班車全車得4個人-_____-

瞓左陣就到喇，一落車真係忍啊住講左句: 說好的富士山呢？

是咁的，日本平出名睇到駿河灣同富士山，但今日不幸地天陰陰，仲因為太早，山上有一陣仙氣，周圍白朦朦，乜都睇唔到，唔好話景，行遠少少都會沒入白霧中。

黎嘅主要都唔係外國遊客，係日本人。不過我諗佢地都唔係好care，富士山成日都見到啦。

因為去到9點連鋪頭都未開，直接搭纜車去久能山駅。

 

都唔平架要成1000yen來回，每15分鐘一班。

一朝早去山上自然成為各種昆蟲嘅大餐，不過好彩我D血好難飲，D肉又唔好食，所以向來D昆蟲都當我透明，不過係咁飛黎飛去都幾煩。

一落車跟住人群行，得一條路架咋，就到大名鼎鼎嘅日本國寶級神社—久能山東照宮。日光東照宮都係以呢度為原形設計架，所以又古老又靚。

入口竟然有巫女，第一次係神社見到。

有兩種飛，一種係淨去東照宮，另一隻包埋博物館。

話說去左咁多次日本先第一次收集御朱印。我帶左好耐之前自己買果本御朱印帳，但原來呢度果D靚好多，好想買但又唔想浪費.......飲恨。

放低左之後，佢地要花時間寫，所以會俾個籌你返黎拎。

上樓梯時見到好靚的門

去過日光嘅東照宮一定會覺得呢度冇咁浮華，但我覺得呢種美先恰到好處。

謀殺菲林

呢度係德川家起的，自然有好多相關嘅野。隔個高達都可以理解，但呢隻妖怪又係咩一回事？？

周圍都係參天杉木，好似回到古代咁。

連隻愛馬都有墓！

好值得一到。

德川家博物個館亦展示好多歷代將軍嘅盔夾，好靚，選有萬年時計展示，不過館內唔俾影相的。

東照宮都有少少紀念品賣架！

東照宮嘅御守真係好靚！呢個係四百年限定版黎，又型又靚！買左～～

呢個係我儲嘅第一個御朱印^^

仲買左靚靚御守同買左紀念coin黎刻名～

回程時天氣已經好左好多喇！至少D霧都冇咁大。

可以去土產店買下野，原來德川家已經有400年歷史了，好多相關商品。

呢個金箔羊羹真係好靚呀！不過香港冇日本抹茶送羊羹‥‥‥會好甜‥‥‥所以冇買到。

呢度其實有餐廳，不過要12點先開，但回程班車係11點幾....

出面有D得坐下，都有幾檔攤檔的。

開始肚餓買少少野食，駿河蝦團子∼味道ok，但嬸嬸請我食嘅天婦羅仲好味。

蝦味雪糕，雖然喜歡食蝦，但真係好怪嘅組合......

遠遠有個塔就行去睇下，原來裡面係一個公園仔，亦係久能山頂。

原來呢度先係望富士山嘅方，雖然已經散晒D霧，不過依然咩都睇唔到，少少失望啦。

雖然公園細細，但有好多繡球花，好靚呀∼

行下行下竟然咁快行左2個半鐘，差唔多11點48分回程。補充一下，其實最好星期六，日黎，班次密好多，不過有D位會塞車，同都幾多人。回程巴士都係同一個位等。

今晚會係伊豆急下田嘅溫泉旅館度嘆下，揀嘅呢一間旅館係日本電視節目精選嘅名宿，差唔多成二千蚊一晚好鬼貴！但亦都係我住過最好嘅溫泉旅館～留意我下一篇遊記啦！^^

 

更多日本中部旅遊攝影資訊