新聞互動
今朝一早原定去中田島砂丘,但因為有少少趕,經歷完琴日單野好怕係咁搭巴士。加上去唔到音樂盒博物,改去濱松樂器博物館,放低野就出發了。住呢度真係好,每個景點都好近,行十分鐘左右就到博物館,入場費只係400yen。
未食早餐,但裡面間cafe又冇咁早開,唯有睇完先食啦。
一入到去已經見到勁大座鼓,原來要好多人一齊jam架,仲有來至世界各地唔同樂器,濱松不愧係樂器之城。
每樣樂器都有得聽佢嘅聲,拎耳機聽就得喇,一早起身聽下歌的確令心情好好多。
有D西方樂器好靚
個人最鐘意呢個琴
指定時間仲有人表演架。
唔同國家,種類等等嘅樂器都有,真係嘆為觀止!你又分唔分到邊個國家?
紀念品店係幾值得去,喜歡樂器的可以財下呢D一小盒包裝好嘅樂器模型,原來係磁石黎,整得好似呀。
呔夾都有?勁喎‥‥‥
下一站係弁天島, 其實主要想睇鳥居同食海鮮。
天氣真係好好呀!如果今日去濱名湖一定會睇到靚景!
未上車之前已經餓死左,食支雪條頂頂肚先~
弁天島個島居好得意,有少少似嚴島神社,潮漲時會係水中,平時會係一個砂島中間。望落去好似係水中咁,當然同嚴島冇得比,不過原來佢有D日子,個鹹蛋黃會係正鳥居中間架,個景好靚架。
果度仲有船河架,有D日子仲可以俾你係鳥居個島上摸蜆。
不過果度真係極大風,D風打落身度吹埋D沙黎係好痛架。
之後就去食lunch ,揀左一間comment 唔錯嘅餐廳,行過去途中見到好靚嘅景。
行10分鐘左右到浜菜坊,比我想像中大間同新,重點係好多人專程揸車黎食,牆上好多名人簽名添,不過waiter 英文唔好,我日文有限,唔係好溝通到,呢個時候最好用google translation,請佢寫低,咁我禁tranlastion,簡單方便。
不過呢度真係好多人等位,原定預1個鐘食野,點知就已經等左半個鐘,下午所有行程都要順延半個至1個鐘。終於有位,入到去,原來好多位俾人book左,D人又未到,所以要等。原本呢間好多人都會叫生白飯魚飯。不過我想留返係鎌倉先食,所以叫左由舞阪流直送嘅刺身set加清酒煮蜆,原來想叫埋河豚刺身,但原來冬天先會有,有少少失望添......
呢度都有座敷~
等嘅時候用日本yahoo乘換案內check下時間,出菜時都比較耐。
但等原來係值得架,唔好睇D刺身好似平平無奇,食過咁多次刺身,真係會識分咩係新鮮,新鮮嘅魚咬落去係彈牙的,所以呢間真係好推薦,因為食過咁多刺身包括築地呀果D,呢隻可以話係最新鮮果D,同魚市場果D無得比。
清酒煮蜆係酒香重但有D太鹹,而呢隻蜆唔juicy,用清酒煮其實最好用珍珠蜆。
食完後就返酒店拎行李向下一站東海名城出發喇!
出發之前一定要係濱松果度掃下名產。呢間野係正JR站,一出閘就見到!行一行5分鐘度就可以買齊晒所有濱松名物。
春華堂嘅鰻魚餅係貴少少,呢度有其他選擇。鰻魚餅係鹹甜的,開始唔知以為一般般,冇諗過原來係好好食‥‥好後悔冇買多D添。
呢個蝴蝶碟真係好好食,買左黑朱古力味,覺得一流!再黎都會再入手。
靜岡茶當然唔少得啦!包裝得好靚好得體,好適合送俾長輩!
呢個係重點行程之一,其實濱松城都好出名,點解要揀掛川?無他,同睇仔一樣都係外貌學會。
去掛川都好易,搭新幹線11mins即到,不過為左慳錢都可以搭東海道線,只係幾個站。
呢度天氣同濱松差天共地,同香港一樣咁熱咁焗,落車第一時間搵locker,用21吋喼嘅好處係大部份車站都有呢個size嘅coin locker。
其實呢度仲有花鳥公園同茶園,其實可以玩一日,不過玩一日又好似唔太值,因為附近都只係得民居,去到3點幾但好多鋪都關左,即係唔會有野行,加上興趣不大所以skip晒。
一出站好遠望過去一定可以望到個城,直行站出面右邊大馬路10分鐘就到。
真係熱到溶,雖然熱,但總好過落雨。
好古老嘅電話亭!
睇下條橋D木已經裂開!究竟有幾多年歷史?
入城門口見到2個忍者~selfie下~第一次見覺得好得意,佢地仲擺個忍者pose!
呢個城都幾受歡迎,除左好多本地人去外,都有極少量遊客(到依家都冇見到香港人.....)。佢係藍灰色瓦白垣的,加上有樓梯同青綠色山坡,靚到好似幅畫咁。
掛川城由今川義忠的上司朝比奈泰熙為了保護遠州而興建嘅。後來,由德川家康統治,以前曾經係大地震中,倒塌了一大半,不過,有一部份殘留下來,後來復修返。天守閣外觀妍麗韶秀,富有貴族氣質,所以被人頌讚為「東海名城」。
房檐上三角形部份叫做唐破風,火燈窗是鐮窗時代的造窗形式,運用兩種風格裝飾城廓,好Match好靚!
入去天守閣要除鞋,裡面全部都係木做,係日本第一座木造天守閣,幾百年黎都屹立不倒。
但樓梯好窄,上落要小心慢慢行扶實。
天守閣其實個個都差唔多,不外乎睇下景,但之前果D名古屋城,大阪城都極之商業化,反而上到後,覺得呢度好傳統,見D窗呀,裝飾等都好原始。
四邊窗口引晒天然風入黎,勁涼爽。
出左天守閣仲有茶室同其他殿,不過下次黎真係要早少少,4點左右基本上都會關門。
咁多個城之中,呢個真係好有氣質。就好似武則天裡面個徐慧咁。
掛川城對出有兩間紀念品店,一間賣德川家康公嘅紀念品,另一間係賣土產。
都幾值得一逛
日本刀好平,做裝飾一流。
土產店賣嘅野種類頗多,係呢度竟然買到最多至愛野食。
有綠茶蕎麥麵賣!
隔離就係餐廳,出面又有位食雪糕。
好多人都會去隔離個免費足湯浸一浸,只需買條100yen毛巾。
下一站就係靜岡喇,靜岡係大站黎,最快係坐新幹線到14mins左右。
因為想趕呢班新幹線,我打破自己買飛拎行李嘅紀錄。3分鐘前,我仲滋滋悠悠係車站外影相,諗住miss硬班車。突然想早少少到靜岡,唔想miss,就衝去coin locker拎行李同買新幹線飛,我都唔明之前明明買飛都要睇清楚,果刻點解可以快而準,之後因為靜住行李上電梯,些唔到樓梯快唔到,只好乾急,但班車已經夠鐘開,上都去啊理咩入口,衝左先講,車站職員叫我快少少上車,要開喇,成個過程只3mins。
話咁快到靜岡一出站就搵酒店,其實圍住車站都有好幾間,揀左位於間南口嘅酒店,因為聽日去日本平,所以要係靜岡駅搭巴士,呢間叫Hotel Century Shizuoka,唔知係咪最高嘅酒店,但就好Grade下。
Lobby都好有氣勢!
酒店安排左我住頂樓,拎到鎖匙果時好開心,條鎖匙好得意呀!
入到房,間房真係好大好靚,仲係居高臨下~今晚一定要食住宵夜睇夜景。
廁所有驚喜,有齊cleaning oil 同lotion化妝水,基本上真係唔洗開喼咁制。
呢隻牌灸嘅沐浴露、洗頭水好好用架,有蜜糖成份,日本成日都好乾好啱用!同埋我淨係見過高級溫泉酒店有呢隻,應該係靚野黎。
咁靚嘅酒店房只係9800yen連稅,好抵住。
望出去個景,咦,果邊咁旺咁多車一定好多野食,仲有個好大招牌話食蟹添!
Hea左陣之後就出去行下街,行去剛剛望的方向,有間叫浮月樓嘅餐廳,個庭園好出名,雖然個庭園免費參觀,但入去唔食野好似怪怪地吧。
隔離就係Parco,Parco收8點,依家都差唔多7點嚕,呢間都幾多野行,D衫好靚,男女裝都咁好,差少少又係度破產。
呢間鞋鋪好多款呀‥‥‥又失手。
呢間男裝都唔錯架!好有taste果度日系西式!
鐘意行CD鋪都一定會有斬獲!
呢度間Franc Franc有呢種裝飾盆栽賣,幾平架!
呢間食放題架,又有啤酒飲~都不失為一個好選擇!好多人等位架!
經過門口有間cafe,display 好吸引,好想去試下,不過已經last order左。
附近其實仲有幾間shopping mall,有Marui,松板屋,109同Cenova,如果只係去靜岡玩嘅,呢度都好夠shop架喇。不過因為我會去橫濱,而個人又認為fashion方面冇地方潮得過東京,所以只係行左陣就走喇。
晚餐方面,原本打算食酒店附近一間comment唔錯嘅壽司店,但呢2日食得太多壽司,轉下口味啦~話說有間食蟹,好大個招牌,同蟹道樂差唔多嘅餐廳,就去試下啦,望到個招牌:A貨蟹道樂?原來佢主要開嘅地方好多都冇蟹道樂,如名古屋,東北,同靜岡等等,價錢同多道樂差唔多。
上到上層原來係包廂式,我記得蟹道樂如果要坐房要事先book,仲要有4人以上?呢度直接安排我一個坐房。
睇下menu都ok wor,唔止有蟹,都有刺身烏冬等等,好多人都話蟹道樂淨食蟹雖然好正,但好膩,呢度有多D選擇,唔錯。
點左4樣:皇帝蟹,松葉蟹同蟹膏,原本想叫埋toro,但賣晒,改稻庭烏靠冬。
蟹膏極香極好食,好快食晒。
再黎稻庭烏冬,點汁食,彈牙又滑,平時我晚上唔食澱粉質,但今次個稻庭烏冬堅好食,成個食晒,份量其實夠2個人share食。
主角終於出場
其實唔係好食得出同蟹道樂有咩分別,不過佢松葉蟹乾少少,皇帝蟹好似冇咁甜。唔知係季節問題定係鋪頭問題,不過其實都唔錯架喇。
如果唔想全部都係蟹,呢間都幾值得推薦架~
食完野都差唔多9點喇,JR站有間Parie好多野食,另外又有GU又藥妝店PLAZA。
PARIE地面果層係係超市,講過好多次去日本唔去超市就走寶了,呢度真係好多野賣。
壽司勁平,質素望落都好唔錯。
可樂餅好推薦大家買,呢間野有幾多唔同口味,買左個芝士豬肉餡。
香蕉大福,唔知好唔好食呢?
水果都好靚好平。
見D桃咁平,就買左兩個返去,下次黎日本真係要帶生果刀。
經過食彩館旁有條小路都有幾多野食
咁啱呢間食手羽先嘅臨收前有半價,用200yen左右買左4隻雞翼。
買齊野食!再食過!
返到房一拉開簾真係估唔到,靜岡冇咩特免建築物,但夜景都好靚。
擺個陣食野食埋夜景先。
芝士豬肉餡真係好好食,唔會好漏。香蕉大福裡面有大大條蕉,幾好味。
Day4要勁早出發去日本平,要去睇日本國寶呀,所以食完野就好瞓喇!