新聞互動
福岡-別府
今日嘅行程係别府地獄群同九重夢大橋
第一件事就係早餐。喺酒店附近搵到呢間 Cafe。
佢嘢食唔係特別出眾,只係貪佢近。
地獄群,我地嚟緊喇。
地獄群共分八個,相距唔遠,行路都去到四、五個,記憶中好似只係要揸一、兩次車嚟接駁,而且好近,唔難搵(這個當然,有 GPS 嘛)。
第一個地獄-海地獄一潭出煙嘅池水而已
鬼石坊主地獄如果有人問我對鬼石坊主點睇?咪係睇啲煲滾咗嘅灰色泥漿起泡囉
附近有個鬼の高鼾,睇吓啲鬼扯鼻鼾有幾犀利。
山地獄雖然無人問,但係我都想講:我聯想到出煙嘅九寨溝。
途中見到個動物園(正確位置已經唔記得,總之就順路經過。),有河馬、兔仔、好似狗咁大隻嘅疑似田鼠、疑似蒙古馬、鶴同佢-孔雀,不過佢心情唔係勁好,最多都只係開成咁-
かまど地獄
呢個日文地獄有咩特別呢?特別在好多顏色。
鬼山地獄鬼山地獄嘅主角係鱷魚
白池地獄日式亭園圍住個白色地獄池
血池地獄
血池地獄有咩出名?血池軟膏是也。有咩功效?皮膚病囉。有無效?梗係無……
龍卷地獄每隔一段時間就會噴出水柱,不過我無等佢,緣慳一面。
唔覺唔覺,八個地獄就咁行完。到時候醫肚。呢間嘢喺一啲招呼遊客店舖附近,而幫襯佢嘅都係日本人,甚至當地導遊。新鮮味道又真係 ok。
食完嘢又應該往下站九重夢大橋出發。不過預計去完大橋會過哂酒店 check in 時間,為免誤會;還是先到酒店放低行李,並交待約幾點會到酒店辦理入住手續,攪掂後就可以放心去玩。喺去大橋途中,有段山路令我聯想到頭文字 D,唔明?睇吓個 GPS 箭咀指嘅位置就知。。。直頭係我肚裏面條大腸嗰種盤結法。
行完吊橋係時候返酒店。
今日揀嘅酒店係別府市上田湯町嘅白菊酒店。
一泊二食,埋單盛惠53,920円(停車免費)。呢晚嘅晚餐真係飽到傻咗。飲飽食醉,book 咗間私人風呂,鬆弛下。
就咁,渡過第三日旅程。