二零一五年九州十日新春自駕遊－Day 9
豪斯登堡－長崎
晨早空氣，清新開朗。行出住處，沿住呢條小路行去食早餐機餐廳。
呢間餐廳好大，大得可以辦大型宴會。
唔好以為係一般西式自助早餐嘅質素，佢地嘅麵包超正，有機會一定要試，推介。
食完早餐走出餐廳，會見到森林別墅嘅湖景。臨走前拿拿林影多幾張相，準備去下一站。因森林別墅離接待處都好遠，如果拖住幾個喼行過去，真係行到好似民建聯甩哂轆都未到，所以都係打電話服務台 call 車接送好。別墅接待處除辦理 check out 手續外；亦係離園小巴集合處，小巴通常有固定班次，但因當日有幾個遊客同時準備離開，所以特別安排特別車載一行人出園，都幾識做。
當離開豪斯登堡後，第一個目的地就係位於唐律市西城內 6-33嘅曳山展示場。
唐律市馮十一月就會舉辦名為唐律九日的節慶祭祀活動，係九州具有代表性嘅祭祀活動之一。當地人就會喺活動中；抬住種名為曳山嘅嘢巡遊(其實日本人好鍾意喺啲祭祀節日抬住嘢喺條街度衝嚟衝去，見怪不怪)。
而呢隻叫赤獅子嘅曳山，早喺 1918 年製成，相信最老係佢。
地方唔算大，曳山亦只有十幾件，好快睇哂。係時候食晏晝。
今餐食和牛。季樂，佐賀市大財三丁目
9-16。季樂係市營商戶，佢地嘅和牛未必係最上剩，但係質量應該有保證。
李門這一家中，有食肉獸、有牛魔王、有師奶廚神，見到呢幾舊肥牛，仲忍得住口咩？
曾經我都係一代菜王，呢碟都係我的至愛 (除荷蘭豆同南瓜外)。
我地叫嘅係套餐，不過最後都要單獨追加和牛，話哂返到香港分分鐘食唔番，就算有都未必捨得食。
食完甜品嘆杯茶
話咁快就到咗佐賀市城內 2-18-1嘅佐賀城本丸歷史館
佐賀城城場入囗
城內展館入口，同樣要除鞋參觀。
展館內嘅展品可能同佐賀好有關係
地方好大
唔知係咪喺度開會，商討點樣先天下之憂而憂呢？
喺附近有間佐嘉神社，佐賀市松原 2-10-43，順便去埋。
香港有學校村，佐賀有神社村。佐嘉新社入面由八間神社組成。
順序係：－佐嘉神社、松根社、松原神社、佐嘉荒神社、松原惠比須社、松原稲荷社、松原河童社同松原梛木社
左下角位靚女，應該係電視節目主持人。
係時候去十日旅程中最後一間酒店 check in
杉乃家旅館－佐賀市富士町大字小副川 2635
呢間旅館好奇怪，喺我由 check in 至到 check out 期間，除咗一個修理自動汽水販賣機嘅後生仔外，由辦理入住和退手房續、搬行李、執拾房間甚至早晚用膳都好
(注意，係早晚用膳，即係由今日下午至第二日上午。)，都係由兩位無八十都有七十幾嘅亞婆招呼，好似唔使休息咁。老實講，見佢搬我啲行李時個表現，就算唔駑佢跌爛裏面啲嘢都唔想佢地為咗我地而休養一頭半個月，在情在理，自已搬番啦。
呢道係我地嘅房間正門，亦係唯一嘅出入口，我可以肯定，只要一腳伸落去，道門一定會飛脱。喺鄉間山邊嘅一間旅館，喺零＂實Q＂嘅情形下，單靠兩位老婆婆同呢道門，我絕對可以肯定證實這裏嘅治安，絕對係天下太平。(三千幾蚊一泊二食呀老細，如果治安唔好，唔通有起咩事上嚟，隱藏喺厨房嘅廚師會即刻變身幪面超人出嚟伸張正義乎？)
旅館大堂
旅館嘅庭院
話分兩頭，喺呢度住真係幾舒服，唔止遠離都市，仲同民居有一定距離。由右邊嘅房屋穿過红色鐵架搭成嘅鐵橋，沿小路往相片左下方駛一段路先到旅館。呢度仲有度好，有大量免費車位任泊。
離晚飯時間尚早，又試揸車出動，今次去鳥栖市彌生が丘嘅鳥栖 Premium outlets。
雖然身處
outlet，但係買唔到嘢，唔係啲嘢唔啱，而你無帶濩照，無哂折扣，最後決定，明天再戰，而家返去食飯先。
食飽返房。唔好睇少呢個木桶入面嘅水，話係溫泉水，私人風呂是也。
浸完溫泉水，係時候休息。
