二零一五年九州十天新春自駕遊－Day 4
別府－由布院
起身時見到日出
呢日嘅早餐就喺白菊酒店度享用
好在個用餐牌係寫＂お食事中７＂，如果係＂食７事中＂就唔係幾老嚟，新正頭嘛。
食完早餐就揸車往由布院出發。第一站，我地去金鱗湖。
喺金鱗湖打咗個轉後，就往九州自然動物公園進發。
呢個動物園可以選擇乘坐公園嘅專用參觀車一路睇四圍走嘅動物，一路餵佢地食嘢。亦可以自已揸車入去，不過因為唔識日文，又唔知有咩禁忌、有咩玩得同有咩要留意，所以都係坐呢啲車入去玩會開心啲。
園入面嘅動物都唔少
對住佢嘅血盆大口，加上咆哮聲，咪話唔寒。
見佢個頭喺我上面經過，令我諗番起電影侏羅紀公園其中一場男女主角睇住隻腕龍喺佢地上面經過嘅一幕。
全園既動物都可以畀遊客餵，但係呢啲豹就只可以停低架車喺度睇。
同時，豹旁邊嘅公園職員見到旅遊車來到時，就會從車上拋啲食物畀佢地食，可能豹嘅性格喜歡追捕打獵，而且仲跑得快，為免意外，園方不安排遊客餵食。
去完動物園都應該去酒店 check in，呢日嘅酒店係湯布院町川上嘅月燈庵。間酒店就好似山裏面嘅木屋群咁。
小路行入去就係佢嘅正門，入去就係接待處。不過呢度無公共交通工具可到，除咗自已揸車外，酒店亦有本身嘅車接載客人，當日我就見到佢剛接載另一租客到，當然要花點心思睇吓點同佢地溝通安排。辦好哂手續之後，又試出發去玩，目的地係湯の坪街。
純粹係條充滿古舊味的商店街，有嘢買、有嘢食，有嘢睇。
雖然主要商店街道有不少強國旅行團，好彩一樣有寧靜一面。
途中幫襯佢食手打蕎麥麵，好味。
係時候返酒店，因一日嘅疲勞，都靠酒店嘅設施幫助消除。
不過老實講，有好多西片，都會講一班後生仔去到啲山間村屋舊宅度假，仲要遇到啲殺人狂魔、妖人怪蛋，卻偏偏有手有腳；但欲走無從，跟住死吓一個，死吓一個，死剩重見天日嗰個就係主角。呢間月燈庵就最啱拍呢類片。
酒店正門，一入去係大堂接待處(接待處上面個透明捐款箱，入面有張香港嘅十蚊膠蟹，它鄉遇故知，即時對張十蚊紙產生濃厚嘅親切感)，接待處側係個少少酒吧。
穿過大堂就走過呢道橋去房間。
經過公眾風呂
呢間就係我地間房
房裏面有個露天私人溫泉，爽。早啲浸吓溫泉，準時食晩餐，食完再㓎多輪，爽爽。
今晩食乜餸
懷石料理足也。連張專屬菜單都矜貴過人。
砧板做餐墊，問你服未？
邊款食材叫咩名？真係唔記得。
其中幾款菜式
另外 order 嘅酒店自已釀造清酒一枝
嘗完咁大個人第一餐懷石料理，返番入房再溫泉過。半夜再出過嚟浦吧先。
話就話酒吧，其實好簡單，兩個腰咁高嘅櫃，一個擺後面做酒櫃，另一個擺前面做吧枱。
喺吧枱擰轉身就係大堂同接待處
真正飲飽食醉，又係時候探訪當地嘅周公。
