漫遊保加利亞1 - 轉機多哈，舒適地訓機場

By 鋒加西亞 - 德國工作假期後的世界流浪 . Level 5 - 銅章級資深 Fever 旅客
發表於 2019 年 10 月 11 日 .

玩野咩~ 又話保加利亞遊記開始，點會係多哈轉機ga!? 回水呀!!!!!!!

我呢個blog一向無收錢又無錢收好難回ga wor~

咁我今次去保加利亞的確係要先飛多哈再轉機嗎~ 咪簡單講下咩情況law~

由香港出發飛左10個鐘，終於到達全球知名既多哈國際機場

好似《漫遊保加利亞 - 出發前資訊總匯集》所講，係多哈轉機會有以下3種情況 :

1. 報city tour出去行個圈

2. 享受卡塔爾航空的優惠以平價訓一晚酒店

3. 發呆，玩UNO

City tour最後一場會係21:00，所以如果似我咁凌晨到達係同佢有緣無份的

至於我當年的免費一晚酒店住宿優惠只限轉機時間多於12小時的旅客，我去程就係尷尬既7個鐘……..不如妳嚟個大delay比我啦plz…….

於是我剩餘既選擇就只有係呢個冰冰冷冷既機場寂寞地過一晚夜了…….

不過都唔會太寂寞的~ 多哈機場出左名係一個超級大既shopping mall，基本上新城市廣場有一半既野妳可以係呢度搵到，包括大媽

所以如果閣下有好多錢又喜歡購物的話，呢處係可以比妳胡亂揮霍的~ 雖然我成日唔明點解d人特登要係機場買名牌…….

我無錢，又搵唔切富婆，所以都係周圍行算了

話明shopping mall機場，呢度自然同商場一樣會有展覽event啦~ 我去到當日就有個大型畫展show緊~

講真呀，我對呢d展覽係咪真係多人睇係存疑的

除非搬個羅浮宮過嚟，否則應該唔會有人為左睇呢d show而特登飛嚟多哈掛? 舉行成人博覽就話考慮下je

之不過文藝氣息同品味呢家野就應該係咁於不知不覺間培養出來的，總覺得香港係呢方面係差左少少….....

至於機場內最有名的地標自然係呢隻黃禁禁既大隻小熊啦

但係......呢隻真係熊? 中左幅射呀?

點解個個都要係佢面前影相打卡?

點解世界各地既「港女」都會係隻生物唔似生物、公仔唔似公仔既騎呢野面前發癲?

佢真係好樣衰，我可唔可以扔佢落山呀?

(明明四周d銅像仲有趣啦)

好啦我承認大部份人 ----- 包括我自己都對上述所有事不感興趣!

凌晨機呀! 快d搵個位訓覺好過啦!

講到機場訓覺，有銀兩有靚卡既人自然會訓lounge啦唔使介紹，至於backpacker搵張凳or就地訢就ok，都無乜需要講~

不過，多哈機場就有種介乎兩者之間既躺椅，可以比我呢種唔想使錢又想舒服訓一陣既旅客安眠幾個鐘~

真係咁著數? 免費又唔使訓梳化?

無錯~ 但都正因為咁著數，所以每間躺椅房Quiet Room都一定會非常多人。

唔知係有意定無意，機場內的指示牌甚至地圖好多都唔會show到d Quiet Room準確地點係邊度，只係可以肯定ABC zone都各自有一間，而每間既地點同椅數都略有不同，總之就係非常難搵啦!

根據我既記憶所及，A2、B3、C4及food court toilet附近都有一間(好似係)

由於當時我係Zone C落機，一出幾步路就見到呢間全玻璃透明既Quiet Room，之不過無理由一落機即訓唔行下個場ga，於是就以Zone B果間為目標

點知去到Zone B，所有躺椅已經比清一色既阿拉伯白袍佔據哂!

我無任何歧視成份，但當妳見到一大群同樣衣著兼同樣貌既人同處於同一空間，總係有少少淆底呢…….

呢間唔得咪另一間law~

行過food court見到另一間隱蔽既Quiet Room，「ee係室內唔透明仲要有位wor! 就呢度啦!」

一行入去，我即刻叮噹見老鼠咁樣用人類最敏捷既速度彈出嚟!

咩事? 妳聞過臭狐海嘯未?

Wa大佬呀一個唔通風既地方焗住成百人既體臭，同訓堆填區有咩分別!?

所以，最後我都係選擇Zone C既全玻璃透明Quiet Room做我今晚密會周公既場所啦

張躺椅訓落其實係舒服ge，至少軟硬適中，訓醒條腰都無事~

同埋場內冷氣唔會太凍，周圍又唔會有人行嚟行去傾偈嘈住訓覺，某d位置仲可以獨霸個電源插座tim~

至於隨身物品安全當然係閣下自理啦，我習慣一係抱住一係搵個細鎖仔扣住條褲，話哂係大阪關西機場同伊朗德黑蘭機場都攪得掂，無問題ge~

當然比起Lounge係有所不及，但已經比求其霸幾張凳一字式攤係度舒適得多~總之呢幾個鐘，我訓得非常舒服~

唔計旁邊個鬼婆不停睡夢羅漢拳揼我既話……………….