上窰郊遊徑+曝罟灣堤圍︱超強打卡+輕鬆行山首選【香港郊遊12】

我去「上窰郊遊徑」的目的，原本只為IG上有D紅的「曝罟灣堤圍」，誰不知條路驚喜處處!

不但短途且平坦易行，除曝罟灣堤圍外更有紅樹林、無人碼頭等打卡點，終點萬宜水庫西壩的日落更係靚到嚇親人!!! 

如果係社交媒體狂熱者，呢條郊遊徑真係分分鐘打卡打到手軟!

廢話少講，開始介紹啦~

 

 

 

文章概要:

1. 前往方法
2. 北潭涌自然教育徑及上窰民俗文物館
3. 起子灣紅樹林
4. 起子灣小碼頭
5. 曝罟灣堤圍
6. 上窰郊遊徑
7. 萬宜水庫西壩
8. 回程方法

 

 

• 前往方法

由西貢坐94、96R、289R，於「上窰」站落車，呢個係最近的入口點~

但如果想去個洗手間放低幾兩，又或買支水買串燒賣先，建議係「北潭涌」落車補給左先~

呢個地點既小賣店竟然仲有$10一支維他水，算係非常有良心了!

總之攪掂後，出大馬路向左方前進，經過傷健樂園，約5-10分鐘就可以見到「北潭涌自然教育徑」的入口了~

 

(呢度得洗手間ga ja，睇真d，路牌係有箭嘴的)

 

 

 

 

 

wei阿鋒你玩野呀? 又話行上窰郊遊徑ge?

事實上一般香港行山友話行「上窰郊遊徑」，但事實上行既都係「北潭涌自然教育徑+上窰郊遊徑」crossover，先行前者再接後者，因為睇ge風景會靚左多左~

需知個道理等於蝦餃落豬肉會好味d，混血BB都會靚仔d，有時d野溝埋一齊個效果好好多~ 

如果大家死都要行上窰郊遊徑的，無問題~ 可以回程的時候行返去北潭涌的~

 

 

 

• 北潭涌自然教育徑及上窰民俗文物館

一開波起行已見到清澈的北潭涌河口~ 好想跳落去游水ar~~~~

但點解我自動幻想左會有鱷魚出現ge???

 

 

 

 

 

 

行左唔夠10分鐘已到第一個check point「上窰民俗文物館」~

根據資料，上窰民俗文物館及灰窰於80年代初列為法定古蹟，內裡重現了古時客家村落的生活文化，等大家認識客家除左梅菜扣肉和釀豆腐仲有好深厚的歷史文化~

可惜疫情時暫時關閉，如果唔係入去行下應該都幾有趣~

 

 

 

 

 

 

 

 

• 起子灣紅樹林

繼續前行會有數個分叉路

第一分叉路轉左會係「上窰家樂徑」或接「上窰郊遊徑」，sorry唔行呢條路~ 繼續前行plz~

 

(呢個鬼仔，我開始行時佢開始跑，我走人時佢都係跑緊，乜料)

 

 

第二分叉路向右係黃宜洲村，向左係起子灣~

黃宜洲村係私人地方死路來的，亦無咩野睇，所以都係直去起子灣啦~

點解我會知無野睇?

好明顯我中左伏啦~~~~ (網上有篇文話係轉右，我信左........)

 

 

 

 

 

走過一小片草原，到達起子灣紅樹林啦!!!

紅樹林周圍都有啦~ 赤徑、鹿頸谷埔等等，我自己寫過的都唔少，有咩咁特別先~

特別在整個內海灣都係超矮身的紅樹林~ 

好似好多個小樹人企係海灘上勁得意~

只係岩岩開始行左唔夠半個鐘，已經令我覺得呢條郊遊徑無嚟錯!

 

==========================

延伸閱讀 :

《赤徑與鹹田灣，宛如沙巴的美麗海灣【香港郊遊4】》

《粉嶺鹿頸至谷埔︱夕陽下的隱世蘆葦田【香港郊遊9】》

==========================

 

 

 

 

 

 

 

 

 

• 起子灣小碼頭

比紅樹林謀殺唔少memory後，係時候去下個影相點「起子灣小碼頭」~

前行5分鐘至另一歧路，左邊係繼續前進，右邊行多5分鐘就係起子灣小碼頭

 

 

 

 

無錯，起子灣小碼頭係要離開原路特登行去的，而且一定會有人話「都係一個乜都無既小碼頭je，有咩咁特別!?」

就係貪佢乜都無!!!

一個寧靜無人，腳下海水翠藍清澈，被群山360度圍繞的無人小碼頭，仲唔係影相擺pose既最佳地點???

呢度咪行山女孩bar top show身材既最佳地點law~

拜託........請不要幻想我著bar top..........

 

 

 

 

 

 

 

 

 

 

 

 

• 曝罟灣堤圍

原路返回分叉路，繼續前行，進入樹林，開始有返d行山既感覺了~

 

 

 

曝罟灣堤圍雖然係我今次行程重點，但其實佢並非正式路段，路段被樹林隱密封閉，十幾廿年前根本無咩人會去tim

想落去，大概係從上面講的起子灣分叉路起計行約10分鐘，於林中有一無路牌的分叉路向右行直落

如果怕搵唔到，就認住呢幾條紫色紅色絲帶啦~

 

 

 

 

 

下行至曝罟灣呢條路的確比較難行

早段都叫有山路，到沿海去堤圍一段卻是側斜石路，如果對行石經驗不足，膝頭唔好，又或對鞋太弱既都係小心d好

 

 

(分叉路向右行就係堤圍方向)

 

 

 

 

 

終於到達我呢次郊遊最想去既地方「曝罟灣堤圍」啦!!!!

wa人都唔少wor~ 條堤會唔會冧ga!!!!!!

所以我都係岸邊影下相，等人地測試左塌唔塌先啦~

 

 

 

 

 

 

一如上圖所見，呢個曝罟灣堤圍呈半月形狀，係以前村民作養魚之用

如今人去樓空，堤圍亦日久失修無人打理，點估到幾廿年後呢度會變成打卡熱點~

試想像下--------

陽光在海面閃閃發亮，海中之路又狹又長，陳舊卻帶點殘破美，令人彷如置身動畫中的海上遺跡，在大海中心悠然漫步，唔係一件非常吸引人既事咩~

 

 

 

 

 

 

 

 

 

 

 

 

 

呢個曝罟灣堤圍實在非常特別! 不過有幾點卻要非常小心 :

1. 堤圍非常狹窄僅容一個人通過，如果想超前的話，建議先練成跳高過一個人的技能
2. 提圍有3處已斷裂，對平衡力無信心的朋友，可以坐住過、朋友拉你過，或者預備泳衣

 

 

 

 

 

 

 

 

由於小弟太過鍾意呢度，hea到樂而忘返，幾乎唔記得行程只係行左一半，再唔走天黑ga啦........

到5點先急急腳由堤圍另一邊離開

 

 

 

 

 

• 上窰郊遊徑

呢個世界既定理就係 -------- 個人一急就出事!

因為趕住走，我去到分叉路位唔記得睇地圖，咁岩又撞到係堤圍幫手影過相的一家人，見佢地轉右我又跟埋轉右，仲因為腳步急而過左佢地頭

點知條路越行就越窄，d草越行就越高，到後來直情入左粟米田咁款，隨時有隻速龍出嚟吞左我!

 

 

 

 

 

 

我開一開gps，google map無呢條路ge!!!????

仲要我行左15分鐘都仲係海邊兜緊，完全無上返上窰郊遊徑的意思!

咁我就知呢條路唔對路，立刻沿路返返分叉路!

回到分叉路我遇上另一家庭，父親似係行山老手，好心提醒我果條路連地圖都無的，雖然都去到終點西壩但又長又難行

所以我都係度好心提醒大家 ------- 由曝罟灣堤圍回上窰郊遊徑，分叉路記得認住絲帶轉左呀!!

 

 

 

 

轉左條路都唔算好行，但感覺上正路好多! 

只不過要上約10分鐘樓梯，算係今次行程最辛苦既一段

10分鐘後，終於可以接返上窰郊遊徑向萬宜水庫西壩前進~

行平路既感覺真係好呀~

而且沿路可以遠眺西壩，風景超一流!

 

(呢d先係路ga ma~)

 

 

 

 

 

 

 

 

• 萬宜水庫西壩

根據路牌，由曝罟灣營地落返萬宜路要45分鐘，但根據小弟實測，由接返上窰郊遊徑開始，到終點落返萬宜路其實不用半小時~

總之，終於來到萬宜水庫西壩，行完了!!!

 

 

 

唔好完住~~~~ 西壩一樣有超正既風景~

就算唔得閒落去影白千層，水塘同我荷包一樣咁乾，望下右邊-------個日落正到痴線呀!!!!

 

 

(白千層，遠睇都覺得幾好)

 

 

 

萬宜東壩去得多，但西壩就真係比較少嚟~ 估唔到景色一d都唔輸比東壩wor!

如果仲有力既，我非常建議再向前行，去到正式西壩位置，欣賞以湖海群山為襯的日落晚霞~

 

 

 

 

 

 

時間體力所限，我無再落去天文公園月明亭果邊再玩了~

聽聞西壩係香港著名觀星地點，就搵個機會搵返幾個女仔一齊再嚟~

咩je~~~~ 唔通一班男人睇星咩! 睇星矢算啦!

 

(無敵既聖衣!)

 

 

• 回程方法

一般網上既教法，都話離開可以行返上窰郊遊徑返去，真係見到都嚇一跳!

即係幾乎原路行返相同時間返去!?

唔係唔得，只係嚟到終點先話呢度係中間點，道氣都洩哂邊行到ar??

就算行馬路都要1個鐘，唔好玩啦!

 

 

 

所以最佳方法都係call車~

甚至而家有d的士司機知道東西兩壩人多，會自己吉車入嚟接walk-in客

我就係截到架無蓋旗既綠的，輕輕鬆鬆10分鐘出返北潭涌~

做咩唔出西貢??

北潭涌已經有巴士出西貢、彩虹even沙田，由西壩至北潭涌綠的只係$30-$40，出返西貢市中心分分鐘起double

而且你慳左錢，的士佬慳左時間可以走多幾轉東西壩，大家win win何樂而不為?

 

 

 

 

上窰郊遊徑+曝罟灣堤圍的遊記就到呢度~

講真呀個風景真係超級靚得嚟又多樣化，又9成係平路，曝罟灣堤圍更係香港難得一見，無唔去既理由ar~ 我奇怪呢條路竟然唔太hit tim!

定係已經勁hit左係我唔知ja??

 

 

 

又無意中寫左好多字，不過最後都有d小貼士~

1. 沿路都無洗手間，真心建議出發前係北潭涌解決先~
2. 我呢個行程如果直衝，兩個鐘一定攪得掂~ 不過你見d風景咁鬼靚，計埋影相最好都係預要3-4小時好d。
3. 有睇過文章話呢條路連傷健人士坐輪椅去都無問題，如果由起點至起子灣小碼頭我相信無問題的，但曝罟灣堤圍就一定無可能。而且就算唔落堤圍，起子灣至曝罟灣營地一段都係平路但多石，並非輪椅人士輕易攪得掂的。定係而家已經有越野用輪椅ga啦??

 

(Google完，真係有.........)

 

 

p.s.應該係版面問題，標題個「窰」字的寫法會同內文唔同。Check過係相通的，等於「茴」字有四種寫法，大家不需介意~

 

===========================

 

 

請大家FOLLOW我INSTAGRAM啦~

• Instagram : https://www.instagram.com/fung_garcia_backpacker/

 

 

 

 

=====================================

 

 

我既YOUTUBE CHANNEL正式開通啦!!!!

 

新影片已upload，快d Click入 「鋒加西亞 / 旅人瘋語」Subscribe 睇片再禁個like啦!~

 

 

 

 

 

=================================

 

相關篇章 :

• 香港郊遊

《004 - 赤徑與鹹田灣，宛如沙巴的美麗海灣》

《005 - 沙田行去慈雲山，原來超級簡單》

《006 - 大埔三門仔，零難度的全海景輕遠足》

《007 - 西貢大灘郊遊徑，長者行山無問題》

《008 - 飛鵝山芒草之行》

《009 - 粉嶺鹿頸至谷埔︱夕陽下的隱世蘆葦田》

《010 - 青衣自然徑︱馬灣海峽+青馬大橋無敵日落美景》

《011 - 大美督家樂徑︱4大隱世絕美風景》

 

• 發掘香港

《1 - 香港Staycation首選，皇家太平洋酒店住後心得》

《2 - 城市步行︱鯉魚門的絕美日落》

《2.5 - 鯉魚門石礦場︱夕陽下的芒草群》

《3 - 己連拿利︱港島攝影秘景，宛如荒涼未來的異世界》

《4 - 香港的希臘小店，味覺的新衝擊》

 

===============================

 

• Email : funggarcia@gmail.com

 

• www.facebook.com/Garcia.in.Germany

 

• https://mewe.com/p/fung_garcia_backpacker

 

 

 

文章同時刊於以下平台，請各位多多支持呀!!!!!!!!!!!!!

• UBlog
• DC Fever Travel
• Blogspot 
• 遊牧爆谷
• Medium

 

 

 

 

 

 

 

 

 

 

 

 

 

 

 

 

 

更多香港旅遊攝影資訊