己連拿利︱港島攝影秘景，宛如荒涼未來的異世界【發掘香港3】

某日見到美女網友張相pre-wedding非常有趣~

有趣不在於俊男美女，而是拍攝地點前所未見 --------- 像是一條森林裡的空中隧道，同時帶著荒涼感與未來感

 

 

(特別鳴謝A小姐提供照片，祝妳同老公新婚快樂呢~)

 

 

泰國? 印尼? 馬來西亞? 

但當時已經疫情左半年，按道理應該去唔到外國ga，於是忍唔住問下佢呢個係咩地方

佢比左我一個稀奇古怪的香港地名 ------- 「己連拿利」

 

 

呢個名我寫包單10個香港人有9個都未聽過!

己連拿利? 我連拉雲拿利同史高拉利都唔熟呀!

Google下，先知道己連拿利Glenealy原來係中環半山區動植物公園旁的一條小徑

根據維基王所講 :

 

己連拿利（英語：Glenealy）同時是香港的街道和地方，地名全名為己連拿利谷（英語：Glenealy Ravine），前名為忌連拿利，但因忌有「忌諱」的意思，1970年左右改為己連拿利，是香港僅有同時沒有中文及英文後綴的道路。

wa睇完之後真係覺得自己好唔熟香港呀!!!

好啦難得聖誕假無得出國，一於發掘下呢個香港鬧市中的隱世攝影位啦~

 

• wiki link

https://zh.wikipedia.org/wiki/%E5%B7%B1%E9%80%A3%E6%8B%BF%E5%88%A9

 

 

 

文章概要:

1. 前往方法
2. 聖母無原罪主教座堂
3. 己連拿利小徑
4. 己連拿利天橋
5. 己連拿利夜景
6. 聖母無原罪主教座堂夜景

 

 

• 前往方法

當然可以自己行上動植物公園啦~

不過懶鬼唔想行既我，就由中環坐扶手電梯，一直上呀上呀，過埋SOHO，到達堅道48號，再落返地面沿堅道向金鐘方向步行約7分鐘

 

 

 

到達動植物公園後轉右上斜 (見下圖)，就已經係己連拿利了~

 

 

 

 

 

大迴旋處見到的係港島名校高主教書院

咁睇嚟呢間學校既學生應該對己連拿利好熟啦~

不過作為一個教師，我更加concern既係 -------- 間學校咁遠點返工呀??????

 

 

 

 

• 香港聖母無原罪主教座堂

唔使咁急上己連拿利住~

坐落於高主教書院旁的「香港聖母無原罪主教座堂」，係有過百年歷史的香港一級歷史建築

唔知係咪太耐無去旅行，竟真係有一剎那令我覺得回到歐洲，估唔到香港竟有如此巨大而純白的哥德式大教堂，好感動呀哈利魯亞!!!!!! (我唔係教徒唔住半山，唔識佢好正常呀)

最重點係教堂前有一空地廣場，只要教堂無活動+小心車輛就可以點影相都得!

影完當去左歐洲啦~

 

 

 

 

•  己連拿利小徑

落返迴旋處再上斜，轉個彎兩旁已突變為叢林的法則!

仲有一個神秘的引水道，睇落非常恐怖，絕對會有條洞口咁大既鰻魚標出嚟咬你!

我係咪打得Mario太多呢.......

 

 

 

 

 

 

 

 

 

 

更有趣的是從下而上看，半山區那錯綜複雜的高架道路，劃出了各種不規則的弧線圖案

如果係攝影高手，應該可以影到唔少「咁都得?」既有趣作品~

可惜我唔係，只能有此拋磚引玉引大家嚟啦~

 

 

 

 

 

 

 

• 己連拿利天橋

離開小徑，沿路直上至羅便臣道~

 

 

唔好理，再上幾及樓梯，就會到達今次的目的地------「己連拿利天橋」

呢度......真係香港??

 

 

 

怪不得我朋友會揀呢度影pre-wedding啦!

實在難以相信在港島鬧市中，竟有這麼一處彷如未來世界般的荒涼秘景!

一條彷如電影場景中才會出現的空中闊道，緩緩彎曲向上，四周滿是高聳林木

明明頭上腳下都是車路，四周卻異常寧靜，簡直是原始森林與石屎森林的完美融合!

 

(較灰暗色調後更有末世感，係度見到北斗拳四郎都唔奇!)

(影自己係少不免ga la~)

 

 

(亮燈後更有feel~)

(上圖係貼近原色，呢張大幅調低色彩，又係另一感覺~)

 

(Chok係少不免的~)

 

 

 

如果說這裡是科幻片場景，更不如直接話係「阿凡達森林中的機械人出入隧道」更貼切!

如果突然間有架高達係前方滑落嚟真係一d都唔奇!

而係男仔的話，更應該會幻想獅人鳳係呢度出擊啦!

 

(阿凡達)

 

 

 

(絕對無敵獅人鳳or雷神王，90年代著名動畫，由小學生駕駛的機械人是由學校變形而成~ 但我睇返都唔覺邊忽同己連拿利相似........唉是鬼但啦~ 當借d ee分享下童年回憶~) 

 

 

而呢條神秘道路真係非常神秘，幾乎鬼影都無隻!

我係呢度又set腳架又擺Post大龍鳳近兩個鐘，成套歡樂滿東華做哂，行過的生命體唔超過廿個!

這條路基本上只有遠足落山人士、住半山的富豪外籍人士，及狗隻與它的外傭人士才會使用

咁呢篇文出左街後，會唔會又好似「三門仔」和「鹿頸谷埔」咁多左成條美孚新村既人去遊覽呢?

hey無事ge..........我邊有咁大影響力呢........無事ge無事ge..........

 

 

 

++++++++++++++++++++++++++++++++

延伸閱讀 : 

 

《【香港郊遊6】大埔三門仔，零難度的全海景輕遠足》

 

《【香港郊遊9】粉嶺鹿頸至谷埔︱夕陽下的隱世蘆葦田》

 ++++++++++++++++++++++++++++++++

 

• 己連拿利夜景

入夜時分的己連拿利又是另一個感覺~

昏黃的街燈下，既有點暗沉，又帶著浪漫

如果帶追緊既女仔嚟同佢影返幾張靚相比佢po IG，無可能唔得米啦!

當然首要你識影相啦，呢個技能真係好重要ga..........

 

 

 

 

 

 

 

離開前，可以沿樓梯上返干德道~

第一棟大廈的停車場可以從高處影到這裡複雜的道路架構，都算唔錯呀~

 

 

 

 

 

 

• 聖母無原罪主教座堂夜景

走果陣可以原路返落聖母無原罪主教座堂，夜景仲似歐洲呀........

 

 

 

 

++++++++++++++++++++++++++++++++

延伸閱讀 : 

 

《格魯吉亞背包行Day1 - 夜遊第比利斯》

 

《漫遊保加利亞2 - 索菲亞行下hea下行程一覽》

 ++++++++++++++++++++++++++++++++

 

 

如果大家覺得仲未夠喉ge，可以去埋旁邊的動植物公園同落一條路就到既大館暢遊tim~

不過呢d common野唔使講大家都識做啦~

 

 

 

 

最後例牌補充少少~

1. 己連拿利最大好處係唔使理會天氣，一樣都可以影得非常有特色! 最岩天陰落雨時唔知去邊拍拖既情侶~
2. 附近最近既洗手間都要落返堅道，記得釋放好自己先出發呀
3. 當日所見既毛孩幾乎隻隻都定春咁大，怕狗人士要注意呀~

 

(以防大家唔識，佢就係定春~ Cute到爆~)

 

 

好今次講到呢度~下次又有咩香港古怪地點同大家一齊發掘下呢?

我都唔知呀!!

  

 

===========================

 

請大家Follow我Instagram啦~

 

 

• Instagram : https://www.instagram.com/fung_garcia_backpacker/

 

 

 

 

 

 

=====================================

 

 

我既YOUTUBE CHANNEL正式開通啦!!!!

 

新影片已upload，快d Click入 「鋒加西亞 / 旅人瘋語」Subscribe 睇片再禁個like啦!~

 

 

 

 

 

=================================

 

相關篇章 :

 

• 香港郊遊

《004 - 赤徑與鹹田灣，宛如沙巴的美麗海灣》

《005 - 沙田行去慈雲山，原來超級簡單》

 

《006 - 大埔三門仔，零難度的全海景輕遠足》

《007 - 西貢大灘郊遊徑，長者行山無問題》

《008 - 飛鵝山芒草之行》

 

• 發掘香港

《1 - 香港Staycation首選，皇家太平洋酒店住後心得》

《2 - 城市步行︱鯉魚門的絕美日落》

《2.5 - 鯉魚門石礦場︱夕陽下的芒草群》

 

 

================================

 

 

• Email : funggarcia@gmail.com

 

• www.facebook.com/Garcia.in.Germany

 

• https://mewe.com/p/fung_garcia_backpacker

 

 

 

文章同時刊於以下平台，請各位多多支持呀!!!!!!!!!!!!!

• UBlog
• DC Fever Travel
• Blogspot 
• 遊牧爆谷
• Medium

 

 

 

 

 

 

 

 

 

 

 

 

 

 

 

 

更多香港旅遊攝影資訊