歐洲隨筆006 – 路不同，各自遠走

By 鋒加西亞 - 德國工作假期後的世界流浪 . Level 5 - 銅章級資深 Fever 旅客
發表於 2016 年 7 月 21 日 .

早前美女好友結婚，我被安排坐係大學year1同伴的那一圍

全圍都係當年宿生會既成員(即俗稱既Hall莊) ，佢地係一班超級攪笑同痴線既人，由說話到行為，總之好玩既就去做，癲得嚟又有型格，有點似外國果班jackass，不過破壞性無咁強only. 總之同佢地一齊就總會有爆笑事發生啦!

由於Year1-2時我常做helper，所以有一段時間都同佢地都頗為熟稔

不過可能人夾人，可能係讀既科目唔同，亦可能係我份人太串，唔理咩原因，總之我同大家就點都變唔到極close的朋友

到year3我搬左去另一個宿舍後，就更加越來越疏遠了

畢業到而家7年來，今晚都係第一次同佢地一班人再聚於同一場合

意外的是，我更加像個陌路人了

全晚的話題，基本上就係以下果d，我稱之為成長Standard Topic :

「wei你就結婚啦wor~恭喜哂!」

「我個女戒左夜奶啦，用咁樣既方法原來ok wor」

「我有左3個月啦~」

「小弟下年會升做主任」

「係咪岩岩買左車?我今晚都有渣車嚟ar」

「d婆媳關係真係好麻煩」

「買樓真係最好既投資!」

以上既話題，除了偶爾夾雜的一兩句咸濕笑話能搭得上，基本上我成晚就係做男公關陪笑，差在無錢收咁解je

本來我自信經過歐洲一年生活晚晚hostel吹水的洗禮，於任何場合對任何人都總會搵到野講，但原來，現實真係會有答不上嘴的無言時刻

在婚宴上，偶而碰見一位10多年無見既中學師妹，而家佢亦係一位旅遊blogger，上年先岩岩去完北極圈一帶玩得非常精彩

終於有一個岩傾既人出現啦!!!

咁就大鑊了，我好似將成晚既說話便秘一次過解放出嚟! 剩係歐洲既話題我地都傾到天花龍鳳，對住佢講左全晚對莊員講野既5倍出嚟!~

當晚我地傾得真係好開心(我自己覺得係only，其實佢心諗”走開啦講完未ar死摌~”)

而我亦都明白到，原來走在不同路上的人，真係只會越走越遠，已不會再有相交點了

畢左業7年，莊員們用左7年時間去build up自己的家庭、自己的事業，所以先有而家既金錢與地位，過著幸福的生活

而我就用呢7年既時間金錢同心力，去學習、去遊程、去見識呢個世界，去經營呢個間唔中先有人嚟睇下既blog，所以到而家30歲已過仍然係光棍磨碌一條

羨慕佢地?係ga，但同時矛盾地，我又好慶幸、而且無悔自己過住呢種生活

當晚中學師妹講左一句 :「d人成日問我玩夠未，真係好煩!」我表示無比的同意。大家都係認真且有目標地過緊自己既生活，點解會係玩?

人生勝利與否，從來都只係觀點與角度既問題

其實席上都有幾位莊員朋友間中找我聊幾句，但大家都引申唔到咩有趣話題，就此3句止步

我並沒有怪佢地，絕對沒有! 聽佢地講笑我都會笑得非常開心，甚至笑到標眼淚! 傾唔到偈唔係因為討厭對方，我地只是純粹先天上不合拍，果種純粹人夾人解釋唔到果隻唔夾

佢地仍然係我朋友，但就好似叮噹同神奇小子間唔中會係對方既生活出現，但唔會無啦啦搵對方玩而已。這種本就是人世間之常情。

但，一股淡淡然的哀愁總不能滅

因為我知道，同呢班年少時曾經快樂生活，曾經同甘共苦的朋友，永遠都唔會再有機會friend到了

而我更怕的是，將來有一日，其他的好朋友團體也會落得如此下場

流浪者的生活，也許只有流浪者才明白吧

============================

請各位繼續多多支持呀!!!!!!!!!!!!!!!

我的遊記