新加坡篇(四) – 花園有棵世界樹

經過左前3篇既重點活動介紹，呢一章終於變回活著VIVA可以繼續瘋癲啦~~~

呢3日2夜除左睇GOLF同李準基，剩低既空餘加埋大約有一日一夜，時間有限故行程必須非常精準! 剩揀D自己想去既地方啦!

所以第一日記者會(http://blog.ulifestyle.com.hk/blogger/aeolusgarcia/2017/03/sg-1/)一結束，即刻叫的士兄車我去金沙酒店旁邊的濱海灣花園Gardens by the Bay!

又係果d原本無諗過去的老生常談啦~

唔興做功課既我出發前幾日睇明珠台”Top 10 The Art of Architecture”先知有個咁過癮既花園!

呢個2012年世界年度建築既得獎者(者??)，用左近10年時間先起好，佔地約101個足球場咁大!

除左一般既花ar草ar水ar橋ar仔ar女ar之外，最主要亦最顯眼既建築有外觀鋼絲胸圍一樣的Flower Dome & Cloud Forest同幾層樓高既Supertree Grove，其他仲有food count同兒童樂園+嬉水場Far East Organization Children’s Garden

前者有間著名燒烤店----------但當時我唔知道~

後者最岩同小朋友一齊開開心心玩撲蝶------------但當時沒美女比我撲~

咁就唯有參觀左個

bra溫室先啦~

溫室要收費的，兩個去哂的話，非新加坡人收SGD 28，約港幣$156，兒童老人會平d

其實我又覺得呢件事幾好，比自己國民有優惠先，可以平衡返唔會比遊客霸哂d資源，真心覺海洋公園同迪士尼要學下!

如果覺得貴既，其實網上有好多旅遊產品公司都有平飛賣，有discount之餘仲唔使排隊買飛，方便快捷~

不過我今次身份似乎唔方便亦無理由同其他公司賣廣告，純粹記錄我做左呢件事only~

先進入售票處對面的Flower Dome(花穹)

入到去第一件事唔係講「wa好x靚呀!」係講「x好凍呀!」

竟然係冷卻溫室?????????館內氣溫長期維持於23°C至25°C，聽聞話係最有利於植物生長.......廢話啦~~~~~唔通一個植物園會想特登做瓜d植物咩~

但可能外面天氣太熱，我真係未試過25度C都打哂乞痴…….

而呢個佔地約2點幾個足球場的Flower Dome內有7個不同花園，藏有超過3300種地中海氣候及半乾旱熱帶地域的花花草草，唔理你有無發花癲都一定搵到心愛既草~

儘管我對於植物一竅不通，但非常enjoy穿梭於植物之間，同d靚花正樹影下相，享受臨老入花叢既滋味~

更重要既係，呢度好涼爽唔捨得走~~~~~~~出面太熱啦!!!!

(chok下都係一種樂趣~)

行完Flower Dome，就可以去對面的Cloud Forest (雲霧林)~

今次入到去第一件事唔係講「x好凍呀!」而係講「wa好高呀!」

入門即見前面10米唔夠有條6層樓高的人工瀑布!

當然以正常瀑布lai講呢條只係蚊型唔係巨型，但由於一來係室內，二來係正面兼近到幾乎係妳眼前，所以視覺上仍然非常震撼!

呢個cloud forrest同隔離Flower Dome一樣保存左好多不同的植物，但我諗10個人有9個既重點都會放左係圍繞瀑布頂，宛如未來世紀的天空步道之上

步行其上就好似進入左星空奇遇記、創戰記、廿二世紀插人兩鑊果d電影中的科幻世界一樣，甚至係身處於異形既太空船之中~(邊會有人想係果度呀ar!???)

天空步道兩旁更不時噴出水霧，令本已不真實的空間更添迷濛，仰望上去，真係似侏羅紀公園度衝架企業號出lai呢!

認真行的話，係呢兩個溫室hea返2-3個鐘真係一d問題都無

但要小心入場時間，因為如果似我咁夜晚5-6點先入去，睇下睇下忘哂形，就好易錯過左出面更加精彩既事物~

無錯，剛剛既冰凍溫室異形戰艦只係前戲，高潮就存在於G……..ardens by the Bay正中央，有18棵太陽能超級樹(Solar Supertre)既Supertree Grove

根據資料所示，18棵Supertree每棵約為25-50米不等，即9-16層樓高，每一棵都係一個獨立生態系統，上面有 162,900株植物過二百個物種，同時亦係最先進既環保系統，能夠將運行兩個溫室的熱能散發，並冷卻循環用水，真係聽到都覺得係勁!

可惜我呢d膚淺人一向唔睇內涵只睇外貌，朝早離遠望到時，Supertree感覺只係一群古古怪怪得返堆柴，好陰公咁比雀仔食哂d葉ge可憐的馬達加斯加猴麵包樹

但入夜之後，wa，山雞變鳳凰，有無靚得咁交關ar????

用「夢幻」兩字，好似都不足以形容身處其中的不真實感

高逾大佛的樹身，粗若燈塔的樹幹，通體閃爍著七彩華光燈火，時而紫赤，時而翠綠，置身這十數棵壯麗的巨樹群中，彷彿眼前是那北歐神話的世界之樹

縱然眼前一切盡是人力所為，但我還是相信自己是穿越空間，進入了某個不存於世的精靈異國度吧

放心，不用害怕，當燈光匯演Garden Rhapsody開始時，妳便會自然回到現實的

因為，打死我都唔信有邊個異世界會用「上海灘」做主題曲!

試諗下係如斯浪漫的繽紛世界，romantic到你想同身邊意中人求婚，岩岩跪低囉介指果下就有條友係度「浪奔!!!浪流!!!」，咁既background music除左許文強邊個肯嫁你ar???

之後仲嚟首「玫瑰玫瑰我愛妳」!? 做咩ar老婆原來妳就係黑玫瑰!!????看招~

唉雖然呢個只係咁多首亞洲各國歌曲的開端，但好明顯開波呢一野已經趕客啦!

匯演開始時間係每晚19:45及20:45，想做浪漫野就要計準時間啦~

(右邊棵樹係餐廳，左邊呢棵係for OCBC Skyway天空步道，聽聞只能stay 10分鐘，但最後20:30前入場的可以逗留到燈光show完結，參觀費約$30港幣)

燈光show完結，都係時候走人啦~

但估唔到向金沙酒店方向前進的路上仍然有好多靚位影相wor!

更加估唔到既係，穿過購物中心The Shoppes到達Marina Bay海岸，夜景會仍然會係咁鬼靚wor!

講真ar，明知係人工野，明知係新野，但以新意、心思及特色比較，香港真係遠遠不及，至少，我感覺係香港仲食緊老本，未能跳出舊有框框

當然，想跳但跳唔到唔比跳都係一個問題lai ge………

有一瞬間，我自以為是的覺得好似明白沈教授點解要移居新國了………

由Gardens by the Bay行返酒店約需時30分鐘，但我最後行左成兩粒半鐘，即係約11點半先到酒店，就係因為度度都太靚要周圍影相……

但留意我係仲未食飯的…………….

行去深夜營業的食肆又近半粒鐘，即係我凌晨12點先食晚飯……..

為左睇靚景又唔食野，就lai嚇走哂d想同我去旅行既fd ga la……..

不過唔好理咁多，倒個咖哩羊肉飯落肚先!!!

新加坡既印度野真係好好味呀!!!!!!!!!!!!!!!!!!!!!!!!

(呢間Al Jilani Restaurant又平好好食!咖哩羊肉飯+凍拉茶都係SGP8.5即$50唔使，重點係24小時營業，第2晚宵夜都係呢度!)

https://www.tripadvisor.com.hk/Restaurant_Review-g294265-d3856055-Reviews-Al_Jilani_Restaurant-Singapore.html

好~下篇講埋我另一項活動後新加坡短篇就收工~

有睇我fb page既朋友都知乜事啦

唉真係好囉命ga……………

================

Email : funggarcia@gmail.com

Utravel Blog : http://blog.ulifestyle.com.hk/blogger/aeolusgarcia/

Instagram : https://www.instagram.com/fung_garcia/

DCFever - Fever Travel : http://www.dcfever.com/travel/utravelogue.php?id=799202

My Facebook Page : www.facebook.com/Garcia.in.Germany 



始終都係整唔到Facebook Plugin Page，唯有用photolink頂任先!

請各位繼續多多支持呀!!!!!!!!!!!!!!!

更多新加坡旅遊攝影資訊

更多濱海灣花園旅遊攝影資訊