伊朗獨行1st - 初階入門資料篇+Day1@德黑蘭

我終於衝出歐亞，嚟到中東啦!!!!!

個Blog名話明世界流浪，總要去多d唔同地方先得ge~

咩話？中東都係亞洲？Hey呢咁小既事就唔好計較啦～

反而每次同朋友同事講去伊朗，佢地第一個反應都係“下!？好危險ga wor〝仲要一條友去?”

我 : “好危險果個係伊拉克Iraq唔係伊朗Iran呀”

佢地 : “咁Iran係邊ga？”

我 : “Iraq隔離”

Come on James! 你office隔離位個老細係hihi都唔代表你係hihi啦~

係Backpacker既世界，去伊朗真係唔係一件咩特別既新鮮事! 所以d咩「勁野」「勇闖」「走過烽火」既字眼唔該慳d，妳話而家係去敘利亞南蘇丹就真係勇la!

而每一個人伊朗返嚟後，都異口同聲absolutely agree呢個比美國妖魔化+嚴重制裁既中東國度，係一個先進、文明、極度安全友善既國家! 不論係風景文化同人，都同我地一般所知的截然不同! 分分鐘好過唔少西歐發達地方!

既然有平機票又有假要清，一於一支公去走一轉啦~











不過，開始plan行程時先發現，原來旅遊伊朗所需的background information係非常分散，甚至可以話plan得幾麻煩，特別係住宿!! 到出發當日都仍然攪緊，真係煩到癲呀!!!(下文會講到)

正因為今次既預備功課實在做得有d囉命，所以我都好應該撩幾隻字整合一下資料記錄下，同時希望幫到會第一次去呢個國家既朋友啦~

Intro太長啦!!!!!!!!!!!!!!!開波啦長氣!!!!!!!!!!!!!!!!!!



(以下所有資料都係綜合一般網上資料、朋友前輩意見及我自己既親身經驗的純粹分享，我絕對唔係去完幾日扮專家，如有不足之處歡迎指正~)



===============================

• 機票

我坐Airasia先飛吉隆坡(3.5 hours)，再轉機(1 hour)到伊朗首都德黑蘭Tehran (8 hour)，香港時間13:20出發，正常伊朗時間晚上23:05到達，幾乎必有既delay另加上去，即total坐左係架機度11.5小時起跳，同飛歐洲差不多。

唔同既係，無錯，呢架係廉航，即係又逼又窄慘過坐城巴是常識吧。

平時去日本沙甸魚3-4個鐘都話勉強，但呢度坐10幾粒鐘?? 係咪坐赤柱舒服d ar???

放心~飛行罐頭只係來回吉隆坡果程，伊朗係變返做3-3-3座位式既大機(我唔識飛機型號，don’t ask~)，座位起碼有返正常航班既闊度。

兼且伊朗機乘客唔算多，我兩次坐機尾個section旁邊都無人，係有個死鬼佬將個頭貼近我大脾位置訓著左! X你我個大脾方圓10米都係美女專用範圍lai ga!!!!!

至於其他娛樂飲食服務，係無乜ga la~機票特價$29xx仲想點ar!?

如果真係好肚餓口渴，意料之外Airasia既付費餐飲並唔貴，甚至可以話幾平下，聽機上其他乘客講都話值得一試!

至於有網上有朋友話會派免費餐飲，我自己就唔好彩無遇過了……

如果想舒服d，聽聞卡塔爾航空and泰國航空都有飛伊朗航班，但都係要轉機的

























(個鬼佬其實算好就得下人，但我真係好唔習慣有個男人咁近我大脾ar......)

• 簽證

白痴如我，買左機票先知去伊朗原來要簽證…………唉其實應該都無咩國家係免簽ga la…….

香港已經好好，因為可以一早去金鐘力寶中心既伊朗大使館攪掂佢，歐洲台灣大陸人都要到機場慢慢整落地簽證ga!

根據其他簽證申請受理時間係星期一至五09:00至12:00，放低 :

1.)填好既申請表

2.)passport

3.)$603 for normal, $906 for urgent (落筆時價格，已經比我申請時貴左)

完成後係佢指定既日子-----通常係星期一至五下晝14:00至15:00囉返就ok

雖然話normal係3 working days urgent係1 ，但似乎申請既人太多，我normal要成個半星期先有，奉勸大家真係早d apply好d

同埋睇真d，簽證辦理時間根本就係打工仔日常返工時間!

唔使擔心，唔想射波ge，可以寫封簡單授權書搵人幫你攪都得~



伊朗簽證官網 :

http://en.hongkong.mfa.ir/index.aspx?fkeyid=&siteid=72&pageid=29134

• 天氣及衣物

伊朗有春夏秋冬四季，夏天非常熱，冬天非常凍~所以大家要著夠衫ar~~~~~~~

…………

…………………

……………………………………….

係ge係ge~唔好咁廢講多d啦~

一般旅遊旺季係3-5月及10-11月既春秋時分，朝早30零度夜晚20左右，乾爽，有點地中海「一有太陽曬到嘔，一收太陽涼涼地」既感覺

夏天天氣熱到pk，而好多住宿 ---- 特別係hostel都唔會有冷氣，仲有蚊蟲，頂得順先好ar囡!

冬天會落雪，而我到訪既春天時德黑蘭北方的山區仍有積雪，另外春天清晨的沙漠仍可達冷下幾度，所以有心去沙漠過夜的朋友真係要有變粽的心理準備

另外法例規定女性必須帶上頭紗以遮蓋頭髮，用帽都得，上衣要遮蓋屁股，短袖衫短褲露腳指鞋均禁止 ; 男士則不能著短褲only

咁男士可唔可以戴頭巾呢???

Sorry，真係未見過~





(女士都唔一定要咁黑色包到實，帶頂帽遮住個頭都ok的~)









(在Yard的天葬台上曬完可以賣黑人牙膏)





(德黑蘭市中心絕對唔怕迷失方向，雪山就係北面，有d瑞士感覺呢~)





(德黑蘭機場一落機就凍到嘔，即刻要頸巾厚風褸)





(Varzaneh沙漠日出時更加將所有帶嚟既衫上哂身，heattech都有先頂得住!)

• 交通

全部人都會話你知，伊朗火車又貴又唔準時速度又唔快，唔好搭!

所以我無坐過~

城市之間的移動主要都係馳名既VIP大巴!

親身體驗後果一如傳聞中又平又舒適，寬敞到我對腳可以踩唔到前面既腳踏--------當然並無我腳短既意思係度

此外架車亦冷氣夠避震好，只要司機唔勁播伊朗ROCK & ROLL的話係會寧靜而訓得舒服的~仲會不停比零食+飲品驚妳餓親~

如果有睇開小弟既德國working holiday連載，應該都知我主要用大巴遊走於歐洲各國，以我經驗，8成既歐洲巴士都無咁舒適呀!

唯一唔關事既缺點係主要城市之間太遠，最短既德黑蘭至卡尚Kashan都要2.5至3個鐘…….所以好多旅客都會選擇overnight bus慳返一晚住宿



















一般來說，第一次去伊朗既遊客都會去左伊朗中部先，因為旅遊景點相對集中且順路~

我自己既行程計大約就係一個魚勾咁由北玩到中南部，以下就係我去過的城市之間的移動時間 :

德克蘭 -> 卡尚 : 2.5 - 3小時 (VIP Bus)

卡尚 -> 伊斯法罕 : 2.5小時 (VIP Bus)

伊斯法罕 -> Varzaneh : 1.5小時 (Local Bus)

Varzaneh -> 亞茲德 : 2小時 (VIP Bus)

亞茲德 -> 設拉子 : 6小時 (VIP Bus)

設拉子 -> 德克蘭 : 1.5小時 (內陸機)

有朋友由德克蘭坐overnight VIP Bus直到設拉子，再慢慢玩返上去，都係一個好建議!







大巴士仲有樣攪笑野，就係你可以隨便係公路上截車上車。我就不止一次係當地人陪同下攔途截劫。

所以你夠疆既，唔使去巴士站，直接係必經之路上大叫要去邊個城市，自然會有車比妳上(呢個唔係講笑，係真的)

(德黑蘭機場的士兄扔我係路上截車，岩岩初嚟伊朗報到，心血少d都死.....)





(Varzaneh民宿主人又係放我係高速公路上等車去Yazd，不過好彩佢都幫我地攪掂先走)



城市之間既移動，貪快仲可以坐內陸機。

例如我last day要係一日內由設拉子Shiraz返德黑蘭，巴士要12-13 hours，飛機則只需1個鐘多d，亦只要起飛前一個鐘到機場就得，機上有埋餐飲，價錢約$380港幣，可接受啦!

唯一隱憂就係，delay是常事，delay 4-5 hours亦不罕見!

根據Tripadvisor既comments，伊朗航空公司的服務係足以和UA並駕齊驅一時瑜亮!唔係一間，而係在座既咁多位都係垃圾----------咁多間國內航空都係咁呀!

但唔知係comments誇張定小弟行運，delay左半個鐘就攪掂，服務員的態度尚不錯。

不過勸大家坐內陸機前都係先衡量風險! 隨時仲耐過坐巴士ga!

Google Flight顯示唔哂伊朗國內行班的，國外訂票亦貴很多! 所以如果真係要買飛，可以去到當地先搵Travel Agency，或者學我咁搵酒店前臺幫手都得~









(伊斯法罕酒店的前台staffs，極度友善兼helpful，一聽我話要搵agent買機票就幫我用手機即時book，快手+免左中介費，really thanks!!)





(設拉子國際機場，內陸機超多，好似阿聯猶同漢莎都有機飛呢度)







至於市內交通，如果你睇得明波斯文，巴士應該係無問題的~

………………….咁即係好有問題啦!

其實又無話唔得ge，聽聞巴士要有交通卡先上得，但我相信以伊朗人既性格，無卡甚至無錢都可以比你上車…….但我真係無試過唔太知!

至於大城市，如德黑蘭、設拉子Shiraz、馬什哈德Mashhad會有地鐵，但車站名會同google map上的有出入，再者上落車地點的方便程度亦有進步空間;

死心啦! 的士始終係最方便的方法! 記得要講價呀!

另外泥鯭的中途有人上車亦是常事，要習慣下

萬一趕時間又搵唔到車，隨街搵本地人啦，佢地會好樂意幫手的~





(望住張VIP車飛都唔知上面寫d乜.......)





(德黑蘭鐵路map，好簡單，但睇唔明)

• 飲食

要搵餐廳，Tripadvisor + 過期Lonely Planet多數唔會死錯人~

另一辦法當然係問當地人or酒店/hostel職員啦，不過伊朗有樣特別，就係幾乎所有住宿even hostel都會提供膳食，問親佢地有咩餐廳推介都係話自己間鋪……..









(住係Kashan的Ehsan Historical Hostel，吹佢唔脹，又真係幾好食)



而根據lonely Planet所講，最好的膳食一定在伊朗人的家中。

以伊朗人的好客，傾多幾句偈就請你返屋企飲茶食飯過埋夜真係非常普遍~

我有幾個伊朗識既香港朋友都被款待過，經驗非常珍貴難忘(非反話，係堅開心的)! 千其唔好以我地平時「佢一定有陰謀ge!」既眼光去看待!

至於我……….睇lai都係樣衰+煞氣太重，完全無人invite……..最多係有人請飲茶食雪榚ja………









(伊斯法罕某地氈鋪老細Hamid，操頗流利的普通話，一聽到我住過北京就好開心咁捉我入鋪飲左大半個鐘茶~)









(設拉子行街時，呢位退休英文教師主動撩我傾偈，仲帶我周圍走做嚮導，最後請埋我食伊朗特式雪榚，真係好感謝佢呀!)



如果要平食hea食，周街都會有fast food shop，即係Sandwiches、Pizza同Hot Dog等等

我自己就食過近似德國Kebab既Sandwiches(好乾)，蘑菇火腿pizza(好味)同辣炒羊肝Hot Dog(獵奇)，每份約港幣$10-$20，份量十足，飽肚之選

• 找換

一般都話德黑蘭機場2樓的Exchange Shop匯率最好，地下果間差好多

我凌晨落機時亦只有2樓開門，匯率屬可接受，US $1 : 37500 Rial，廢事煩既可以直接換一堆，以我唔太窮又唔太富遊既標準，US $500 7日係綽綽有餘的，唔夠先再係旅途中找換



伊朗幣叫Rial，紙幣上既銀碼即是，但民間主要會叫Toman，係將Rial減一個零的單位，e.g. 的士佬話要10,000 Toman，你比張100,000 Rial梅菜佢就得ga la~

另外伊朗幣貶值得勁，除非想留念，否則你手上果幾百萬都係機場度換返美元好d

如果閣下好似小弟咁對英文同數字均極不敏感，最好就download定個貨幣轉換apps，甚至帶定部計數機去比伊朗人手指指篤銀碼

仲有記住萬幾蚊=幾蚊雞，餐館一頓飯佢話幾萬蚊only既一定係指Toman!

藍色最大張既係一百萬，好多細店都唔收的，最好買交通工具票時打散佢

而我落機買sim卡時就大白痴地以為藍色係100蚊紙，嚇到我以為找換店計少左幾個零比我………

And then伊朗人計數都好弱，找錯錢都係常事，我就試過買地鐵飛比張一百萬佢，但找少左個零比我………..





(正面 : 咁Q大個紅色阿拉伯數字”100”係度，第一次用又無反面睇既話，鬼知你係一百萬元咩……..)



(背面，睇唔到只怪自己白痴.........)

• Sim card

唔知係咪撞手神，德黑蘭機場係我到達當晚凌晨仍有Irancell店賣Sim卡!

呢件事無人係網上資料提及過~ 仲好，即刻免除第二日搵人幫拖買卡之苦!

卡分為1.5G, 3G同5G，價格為美金$5、$10、$15，但用Rial比會抵d，1.5G計返只係美金$4左右!

一般網友都話上Goolge係無問題的，但我部Sony機， Google及Facebook都上唔到，最後都係要用VPN翻牆，耗電量如錢塘夜潮般澎湃，一日用超過200%真係一d都唔奇，所以起碼要隨身攜帶兩三架充電單車，一唔夠就踩轉10K先!

至於有無3G/4G? 算吧啦六師弟，上得到網已經好好了





(幾乎所有亞洲人都湧哂lai買，一個店員好好心機幫我地逐張逐張卡set up，所以等左成粒鐘，但都識到好好既香港朋友~)

• 住宿

寫到呢度，幾乎唔記得我呢篇係主要想講伊朗住宿的..........唔知點解堆side dishes已經成3千幾字……..

Anyway~

開頭講過 "住" 係伊朗旅行最困難既地方，主要原因係我地一般搵住宿都會用到Agoda、Booking.com、Hostelworld.com等等，格格價睇睇comments，岩心水就直接禁掣預約，email confirm，攪掂!

但對於比美國佬全面封殺既伊朗，妳完全唔可能係各大常用訂房網站搵到住宿既存在!

所以妳可以做既，就係以Tripadvisor、背包客棧及過期Lonely Planet為依據，睇到邊d係推薦或排名高既，直接google photo下係咩樣，有feel既就入間店既官網，係Contact us果欄睇下有無咁好彩有email / facebook / instagram，直接message去問有無空房同幾多錢，係每一間都要咁做!

當妳攪掂哂之後，就係等運到了!







而最麻煩既係，伊朗人真係好少check email，2-3日後覆你已經要劏雞還神啦! 而佢覆你”sorry full哂”既時候你更加想劏人呀~~~

有無咁full ar????

4-5月係旅遊旺季je，都唔使廿個email出去唔夠一半返lai，最熱門既城市伊斯法罕Isfahan全軍覆沒，亞茲德Yazd同設拉子Shiraz既完全石沉大海，最後到出發前都只有德黑蘭既Asia Hotel同小鎮Varzaneh既Chapakers Guest House 成功book到…..

其他點算?

最正統既方法，應該係打電話直接搵間酒店or hostel有無空房，口頭話confirm就得，that’s why要行程開始左先攪得掂呢………..當然你唔怕IDD $32一分鐘直撥伊朗既都OK ge……….





(Kashan的Ehsan Historical Hostel，去緊果程VIP bus上先打電話去book，快手攪掂，下一篇會講~)



根據係飛機上撞見既旅遊前輩林輝及Sonya所講，其實係唔需要為住宿擔心的

因為伊朗人極度友善好客，萬一真係無地方訓，上Couchsurfing講兩句，5分鐘內一定有reply! 客易程度係佢地週遊列國中的no.1!

我亦問伊朗當地人，佢地甚至話以佢地既文化，就算係妳3唔識7求其搵間屋敲門問「我可唔可以係你度訓一晚ar?」保證你茶水晚飯高床軟枕一應俱全兼費用全免! 仲叫我去試下tim!

我暫時未有興趣，但大家如果走投無路時可以一試!





(同一班去吉隆坡既機，really nice to meet you two!)



不過大家請注意，係伊朗，confirm/reservation係有另一個定義的

請在到埗兩三日前再double confirm一次，如果唔係分分鐘會無左的……..

而我既情況就係 -----------------

出發前兩星期email confirm左德黑蘭Asia Hotel，出發前三日email想改住一晚，點知gmail彈返轉頭幾次都話send error，咁我都打定輸數了，去到再算啦

當我凌晨12點坻達德黑蘭伊瑪目霍梅尼國際機場，唱錢買sim卡攪掂哂到近凌晨3點時，我打電話去Asia Hotel問佢地有無cancel我間房--------

「咩話?我地從來無收過你既book房email wor!」

我個口即刻變成一大個O型……………………………

如果佢係因為太夜or無double confirm而cancel我是了解的，但竟然係「從來無收過任何香港人既booking email」????????

咁究竟一直以來我係邊個人email溝通ar?????

定係……..根本唔係人…………..







基於我有個咁既case，所以縱然有網友話有其他國家既訂房網站可以book到住宿，似乎亦不能盡信，且果d網站可供的選擇亦不多，有d仲要比左錢先，總覺得有d牙煙…….

仲有背包客教路，可以係Facebook Page “See you in Iran”話搵唔到住宿，呢個由伊朗酒店業建立既page會有人幫到妳的~







等等先，間Asia Hotel無左，咁我點算呀?

超~訓機場law~唔怕你ga!!

雖然無日本關西機場咁舒適(詳見「日本紀伊半島Day0 – 關西機場過晚夜」) ，排凳仲有d硬有d凍，但總算可以安眠返陣~















幾犀利~我可以將呢篇近5000字既資料文非常順暢咁變返遊記呀~點解我會咁長氣ga!!

但都好多謝你睇哂~

好啦總之齋坐飛機同唱錢既第一日完結，下篇開始正式去玩啦!!!



=========================



Email : funggarcia@gmail.com



Utravel Blog : http://blog.ulifestyle.com.hk/blogger/aeolusgarcia/



DCFever - Fever Travel : http://www.dcfever.com/travel/utravelogue.php?id=799202



Blogspot : http://garcia-in-germany.blogspot.hk/



Instagram : https://www.instagram.com/fung_garcia/



My Facebook Page : www.facebook.com/Garcia.in.Germany



始終都係整唔到Facebook Plugin Page，唯有用photolink頂任先!

請各位繼續多多支持呀!!!!!!!!!!!!!!!

更多伊朗旅遊攝影資訊