伊朗獨行4th – 亮麗又架勢的伊斯法罕

旅程第3日早上，離開令人著迷的卡尚，坐約3小時VIP Bus到達伊朗第三大城伊斯法罕Isfahan / Esfahan
理論上呢，一般人都會公認呢個中部城市係伊朗最受歡迎兼最熱鬧的旅遊地點，無lai過等於無去過伊朗!
我份人一向都包拗頸，個個都去我就偏偏唔去!!!!
但chok多媽爹先，資料搜集時睇d相又真係幾靚wor!!!!
名氣最盛，號稱全世界第二大廣場的伊瑪目廣場（Imam Square / Naghsh-e Jahan Square）係藍天白雲之下有花有水有靚景有氣勢!
但點解到我去到時會係天黑暴雨ga!!????

睇開我個blog都知我既黑仔係遠近馳名信心保證ga la!
上個月係新加坡落瀑布之下踩單車已堪稱經典(詳見新加坡篇(五) – 水火交融單車行)，諗住否極完阿泰來終於斷完腳返來，點知竟然將d黑氣帶到lai呢個遙遠既中東!!
人地個個都影緊風和日麗既伊瑪目，係得我黑媽媽烏卒卒!!仲行雷閃電落大雨tim! 玩野ar靚仔!!!!!
哼，但我無咁易輸ge!
自從新加坡既教訓，而家去旅行不論天氣幾熱都會有件防水薄風褸跟身! 再配合我既Sony電話同Olymps防水機~~
大雨je~~~~~嚇我唔到ge~~~

當我盡情享受shooting in the rain時………..哎也，無啦啦手指痛ge?
等等先!!!落雹ar喂!!!!!!!!!!!唔使玩到咁盡ar!!!??????
好! 你贏! 即刻渣渣臨跑去避一避!!
唉落雹都遇得上，我下次係咪會見到哥斯拉ga la?

見雨雹仲會持續一段時間，就行左市集先啦~
圍住伊瑪目廣場的四方城牆內裡其實係商店老街~今朝係卡尚老巴剎D店都未開，而家有機會慢慢行下睇下hea下啦~
儘管有d遊客向，然每一年產品不論係廚具餐具定手飾瓷器，件野有用定無用，全部都係靚到wawa聲!
伊朗既世界果然同見慣既西方國家好唔同呀!!!
另一樣有趣既係，個市集天花板係反漏斗狀式通窿的，即係話如果超級大雨的話市集都係無乜避雨作用的……..而地下形成既花紋都有d攪笑………

去過伊朗既朋友都知，亞洲人------特別係我地呢d靚仔靚女係會超級受歡迎! 周街比人say hi傾偈同要求合照係非常common既事，但為數實在太多，所以我多數都係禮貌點頭自拍下就算
但係市集內行行下有個中東鬍鬚佬用普通話撩我講野-----又幾流利wor!
佢見我搭到兩咀，就邀請我入地氈舖飲茶啦~
Woo終於有人請我飲茶啦~~呢個係遊歷伊朗必需有既經驗lai ga!!!
有人話d地氈店好鐘意請人入去之後係咁sale你買呢樣果樣，但呢位鬍鬚佬Hamid一句都無sale過我wor! 佢只係真心想同我做fd傾偈!
Hamid佢話間鋪係家族生意，原本學普通話只為左同中國人做買賣，但學學下佢真係鐘意左中國文化，對所有中國既野都好有興趣! 仲問我點樣可以學好d普通話?
我同佢講當然係搵返個中國女朋友啦~~~
於是兩條佬就展開左一場「中國、香港、伊朗之女性形象特質如何影響男士未來」的學術討論了!
不亦樂乎咁傾左差不多45分鐘先走，真係一個好有趣既經驗ar~

(我都唔係第一個佢請入lai既香港人，有網友都話識得佢!)

傾左咁耐都應該停雨啦~係時候出去返去認真行下廣場啦………………..行左兩步又比另一間地氈鋪既金髮哥哥捉入去傾偈!!!!!!!喂使唔使咁密ar!!!!???????
不過呢一個老闆就真係為sale野ge，所以我都不便久留5分鐘就走，但都叫知道多左d地氈價格同知識ge~

好啦真係可以走返出伊瑪目廣場，進入南方中央最顯眼的伊瑪目清真寺(Imam Mosque)了!
伊瑪目清真寺前名「沙阿清真寺」，係由薩非王朝的沙阿阿拔斯一世下令修建的
唔知邊個係沙阿阿拔斯? 唔緊要~我都唔知~copy維基百科g ma~
係唯一要知道既只係呢個清真寺入場收費 200,000 rial，同埋個門口已經好鬼大好鬼靚!!!!!!!!
Wa只係個門口都正成咁，我會睇到眼定定唔捨身入去ga wor…….

門口都咁威猛，裡面更加令你讚嘆!
伊瑪目清真寺面積非常非常大，打個比喻就係一座10層樓高既灣仔會展新翼!
寺內以深海藍為主色，配以各種各樣不為外人所知的花紋喻意，優雅華麗之餘不失莊嚴宏偉! 剩係呢d野都唔知謀殺左我幾多相機memory ar!

係主殿正中央有一塊零零捨捨得別滑的石磚，只要企係上面大叫「出lai啦! 絕對無敵獅人鳳!」就會成個伊瑪目清真寺都聽到，塊磚自然就縮落去帶你坐機械人保衛地球ga ja!
…………………………我諗唔係有人信呱……………………….
但前者係真ge~
塊磚既位置係一個超強廣播位，可以將任何果個位置上既細微聲音大幅擴大至全寺都聽到，連紙張扇動的聲音都得!
而佢既作用我相信係為左慳返d演唱會既音響錢，唱Amini時大聲d型d，同崇拜時宣告一d關係都無，一定係!

間寺就睇到呢度，小弟唔識影相，遺憾未能表現到佢令人驚嘆既氣勢，但呢個真係到伊朗必定必定要到既地方呀!!!!!!
好，伊斯法罕太多野睇太多事發生太長氣了，下回繼續呢度既見聞!

====================

Email : funggarcia@gmail.com

Instagram : https://www.instagram.com/fung_garcia/

My Facebook Page : www.facebook.com/Garcia.in.Germany

始終都係整唔到Facebook Plugin Page，唯有用photolink頂任先!
另外文章同時刊於UBlog、 DC Fever Travel、 Blogspot 及遊牧爆谷
請各位繼續多多支持呀!!!!!!!!!!!!!!!

 

更多伊朗旅遊攝影資訊

更多伊瑪目廣場旅遊攝影資訊

更多卡尚旅遊攝影資訊

更多伊斯法罕旅遊攝影資訊