伊朗獨行9th - Yazd遊魂

By 鋒加西亞 - 德國工作假期後的世界流浪 . Level 5 - 銅章級資深 Fever 旅客
發表於 2017 年 8 月 7 日 .

係伊朗既第6日，離開Varzaneh沙漠，來到伊朗東部的著名古城Yazd亞茲德
聽聞Yazd本係一個沙漠綠洲，千年來經過波斯人的智慧與努力，變成而家咁樣既一個大城市
咁樣即係點樣？
即係一落車果下覺得同廣州無乜分別law.........
唔係wor! 聽聞Yazd個古城好特別好架勢ga wor!
無錯，的確係真的，但只係限於古城範圍內，海洋公園都唔係成個都係海啦!
而呢個綠洲古城則是一片泥黃色的迷宮，特別是正午時份太陽直曬落嚟果種熱力，令你真正進入了電影裡的中東迷失國度
Lonely Planet話「迷失於Yazd古城」是遊伊朗的must do item!
我做到了，因為我係咁盪失路..........

講真ar呢個古城真係有一種神秘既魅力，even妳行到邊度都只係一幅幅黃色既泥土牆，都會甘心係咁行落去，因為每一轉每一拐都是不同的風貌
而要講最吸引人的，無疑是古城天台的日落風光!
其實幾乎每一棟Yazd的建築物都有天台的，甚至閣下的hostel與guesthouse都有，但一般公開開放的則以Yazd Art House和Information Center Tourist Library最為著名
除左能清楚睇到市內大部分的名物“坎兒井”，在Yazd天際線前看夕陽更是浪漫無比～
今朝係沙漠睇完日出，再係綠洲古城睇埋夕陽 ------- 今日好完滿呀!!

(又比靚女撩影相，見佢地含情脈脈咁望住我，唉咁我都勉為其難一齊自拍返張啦)

（呢間gallery上天台好似要比錢幫襯的，但我好似on居居上左去睇霸王景.......）

萬一真係盪失路@古城又無GPS，可以嘗試以亞茲德聚禮清真寺Masjed-e Jameh為目標
呢座清真寺高到嚇死人，更嚇人既係d整燈飾既工人可以爬到咁高而無安全帶........
Btw可能前幾日睇完伊瑪目清真寺，覺得呢座Masjed-e Jameh真係唔太特別，但都可到此一遊的

Yazd地標應該係阿米爾喬赫馬克建築群Amir Chakhmaq
開頭睇會覺得只係又一間清真寺，但其實係一個建於15世紀既超大型三層式牌坊，根據維基所講主要是為伊斯蘭什葉派用於紀念「阿舒拉節https://zh.wikipedia.org/wiki/%E9%98%BF%E8%88%92%E6%8B%89%E8%8A%82」之用
其下沉式壁龕設計係夜晚燈光襯托下真係幾靚～推薦～

仲有樣野叫Zurkhaneh，我叫佢做伊朗式健身，係一大班廿歲至60幾歲既大隻佬係個圓形競技場內做push up及施丹式轉身既地方
大隻佬們會根據主持打鼓的節奏和歌聲來跟bit操fit，至於動作選擇則似乎係由圓場中間既人帶領，有時更會有獨立人士走出嚟蘇聯佬既轉轉轉
um，簡單嚟講即係型棍版既大媽舞，雖然佢d動作我都真心做唔到........

至於大家睇得最開心既一定係成班大隻佬囉架撐玩兵器
上面d相都見到場邊放左好多支超巨型茄子，我囉過上手，粗略估計起碼有2/3支公司裝蒸餾水咁重!
但見佢地個個都左右開弓，雖然唔係橫掃千軍大鐵椎傳式揮動，但都唔少野la! 唔信ge話係office換水果陣試下~d女同事一定尖叫!
Ee我係咪開發左一個新既辦公室健身運動呢?..........

不過，勁還勁，Zurkhaneh睇得耐就會覺得佢地來來去去都係做緊果d動作，真係有d悶……..我開頭except佢囉茄子係用嚟格鬥玩三國無雙ga………..
兼且觀眾只得旁觀無得參與運動，一d互動都無，所以對我嚟講最吸引的都係個靚靚場地以及肥哥哥既打bit歌聲～
再講ar，睇佢地操成咁都咁大個肚腩，就知呢種伊朗式健身不著重腹部鍛煉，對於要減肚腩既我嚟講真係無乜借鏡之處........
值得入場一看的! 不過睇完就算了～
如果有興趣，可以去位於望住Amir Chakhmaq左手邊小巷內的Saheb A Zaman Zurkhaneh，行過會聽到音樂同有人叫妳入去，好易搵的

另外係市中心有一個幾出名下既花園Dolat-Abad Garden，內裡有著全Yazd最大的風塔
所謂風塔(bâdgir)就係用嚟將空中的風採入地下室內的裝置，係Yard周圍都見到，咁話哂都係沙漠地區，無d令室內涼爽d既設施好易死ga!
而Dolat-Abad Garden呢度就可以見下個塔係咩構造，除此之外就無乜野睇啦~
同Kashan既Fin Garden一樣，好有時間先嚟啦~