伊朗獨行16th - 德克蘭兩大摩登景點

在不少美國電影電視劇中，伊朗首都德克蘭Tehran係又污糟又落後兼周街bomberman既地方，需知美國佬好憎伊朗 (伊朗人又何嘗唔憎美國化呢) ，抹黑又有幾奇呢

所以閣下如果仲帶住落後既概念嚟德克蘭，保證嚇到妳彈起!

甚至已經有心理準備既我，見到呢兩個地方時都呆一呆「伊朗竟然會有d咁摩登既建築?」

伊朗之行接近尾聲，就寫幾隻字記下我係Tehran唯二去過既景點啦!



1.阿扎迪自由紀念塔Azadi Tower



此建築物係德克蘭既地標，甚至近年來被當作伊朗既象徵，非常重要!

不過大家都知地標呢家野真係好易中伏，金紫荊廣場都無乜真係香港人會理過佢啦，所以我下意識係避開左佢ge

但咁岩內陸機由Shiraz返Tehran竟然無乜delay，導致我多左好多個鐘free time，而座塔又只係距離內陸機場「梅赫拉巴德國際機場」不夠20分鐘步程

就去望下啦~

 

(一路上的牆身畫滿伊朗各處的地標，係旅程完結之前睇一轉先幾日去過既呢d地方好有總結式的感覺~)



穿過極恐怖極混亂的馬路汽車群，我來到這個被鮮花綠草圍繞的白色巨塔…….

正確嚟講應該係米黃色先岩

 

根據王維基所講 : 「阿扎迪自由紀念塔原稱作沙希亞德塔或國王紀念塔（波斯語：شهیاد آریامهر‎‎），建成於1971年，為紀念波斯帝國建國2500周年獻禮。1979年伊朗發生伊斯蘭革命，巴列維王朝被推翻，伊朗伊斯蘭共和國建立，國王紀念塔也改名為自由塔，象徵伊朗自由神權時代的來臨。」

講真ar，呢類紀念塔係歐洲無一千都有幾百，連布蘭登堡門我第一次觀光都只係望左10分鐘，之後日日經過都無再理過!

但呢座紀念塔，卻有種異常既吸引力

我諗係因為好少紀念塔會作流線形設計之餘，上頭更係一個人像or物件都無，就好似一個市中心的純藝術雕塑

雖然外形有點奇怪，但其超巨大身驅卻顯得莊重和威嚴

用比喻的話，我好似望緊一部15層樓高既oversize卡碧尼! 同去台場睇高達差唔多，睇到唔願走! (唔知咩係卡碧尼既請參閱「機動機士Z高達」)

 

 

 

 

 

(溫馨提示 : 草地係唔踩得的……….from比人媽叉完既我)



交通 : 地鐵Azadi Square站步行不多於5分鐘



2. 自然之橋Tabiat Bridge



其實我真心唔明呢條橋同自然有乜關係，而且呢個名我只係Tripadvisor上見到only，所以都係叫佢Tabiat Bridge好d……….

嚟呢度只係因為我last一餐想去既餐廳locat係呢條橋位處的Taleghani Park旁邊，坐地鐵去係必經之路，見有時間咪順便行下law，乜鬼research都無做過

所以當我穿過半個公園望到呢條野時…………..wei呢條真係橋嚟?

 

 

 

好明顯係變型金剛啦!!!! Michael Bay拍完戲唔記得拆個景ja???

岩岩我仲係翠綠樹林公園同十二隻恐龍去野餐，點會無啦啦一轉彎就整個金屬閃光機械型格既架空步道出嚟 ga???

果種不協調感，就好似香港某世姓何既議員突然好親切微笑問候你「頭先真係辛苦你啦!」

但我想講上面呢句同呢條橋一樣珍珠都無咁真! 有次係工作上遇見佢真係咁同我講過!

Anyway啦，呢條螺絲闊條麵摩登橋完工於2014年，分成3層，上層係觀景台，中層為主要通道，下層我唔知有d乜~因為趕時間無行過~

Tabiat Bridge同時係連接Taleghani Park的重要橋樑，正下方是車水馬龍高速公路，於是入夜後橋上燈光與下方汽車燈光組成一幅充滿時代感的畫面~的確係幾好feel的~

 

 

就我所見遊客都係伊朗人為主，甚至都有幾多係德克蘭本地人，所以都可以話呢度係一個遊客觀光和居民生活共融的景點

所以係呢處我被野生捕獲吹水的數量極多極多! 多到我差d趕唔切去食飯=趕唔切去機場=趕唔切返香港!!

點都好，如果係德克蘭睇傳統波斯文化睇多左，不妨嚟呢處望望，會有驚喜的~

(原來影出嚟既相大部份都手震，得返呢張大遠景……..頂住先啦……..)

交通 : 地鐵Shahid Haqqani站步行5分鐘到達Taleghani Park，再行約10分鐘到橋



好啦~我係德克蘭短短數小時既觀光就係咁多~

下篇係伊朗獨行last了~敬請留意~

====================



Email : funggarcia@gmail.com



Instagram : https://www.instagram.com/fung_garcia/



My Facebook Page : www.facebook.com/Garcia.in.Germany







另外文章同時刊於UBlog、 DC Fever Travel、 Blogspot 及遊牧爆谷



請各位繼續多多支持呀!!!!!!!!!!!!!!

更多伊朗旅遊攝影資訊

更多德黑蘭旅遊攝影資訊