伊朗獨行17th last - 家一樣的波斯餐廳

無錯，最後一篇又係講食~但無辦法呢間餐廳又係有趣到要獨立開一篇講講~

話說last一餐in伊朗食埋就上機la wor，梗係要搵波斯菜大刷一餐啦~

 

穿過上篇既Tabiat Bridge和Taleghani Park西邊，來到呢間係Tripadvisor上德克蘭總排名第5的著名餐廳Khoone Restaurant

但間野其實唔係咁易搵，因為佢位於一座綜合餐廳的10點鐘位置，好似我咁唔識波斯文既都係問問人好d

 

 

 

餐廳以白身牆身搭配木式傢俱，再用地氈和格仔有簾營造柔和感，更有大量小擺設點綴，充分表現出設計者既心思，務求客人可以係最安心舒適既環境下用膳………………

點解我變左安樂蝸主持ge???我要大面Bella呀!!!!!!!!!!!!!!!!!!

 

 

 

大面Bella唔見，但就有一位妙齡少女突然彈左出嚟問我食咩~

我問佢囉電話囉menu 嚟睇睇先，佢笑笑口咁話佢地呢度係無餐牌的~

原來呢間餐廳並無固定菜式，係由主廚視乎每日有咩新鮮食材先決定~

佢地做waiter既，就要背哂當日有d咩前菜主菜甜品飲料，再用佢親切友善既聲線向我娓娓道來

如果遇著d求知慾旺盛既客人，for example我，佢就大乜鑊了!

幾乎每樣菜我都問佢乜家伙有咩材料點樣煮咩特色，而閒閒地一晚都有ABCDEFG前菜主菜共14樣，一講就講左15分鐘，重點係講到C時我已經唔記得A係乜!

比著係香港，佢入左廚房囉西瓜刀劈我啦! 但呢位小姑娘仍然非常開心有禮地耐心解釋~

最後我決定叫佢幫我話事，今日餐單上邊樣係佢最想食既main course，就果樣啦~

小姑娘笑笑口「Alright~」行開後我先發現……….ee佢既英文咁好ge??

再細心留意下其他waiter，有人講緊法文，有人講緊西班牙文，小姑娘則到了另一桌繼續英語15分鐘……..

睇嚟佢地係專門一個waiter負責一種語言客人的，呢個都係細心之處ar~

 

 

首先上場既係前菜------基本既伊朗早餐食物，即係芝麻麵餅、羊奶芝士、蕃茄同青瓜，呢幾日幾乎日日食，但麵餅與芝士都比一般的新鮮~(都有可能係我太肚餓既錯覺)

飲品落左山粉圓，即係台灣俗稱的青蛙下蛋，一睇外觀其實我是拒絕的

攪均飲啖，原來係番紅花薑蜜! 兩種香味唔會相沖反而令香味加倍，真心唔知番紅花原來同薑可以咁夾!

且蜜糖唔會太甜，無加酒，加冰更可口，台灣夜市即刻變成滿滿的波斯風情~

 

 

 

主菜上場了~~~~

…………..左望右望……….呢個咩嚟 ga………..

比10秒大家，估中我煮比你食!!!!

 

 

 

…………………………………….

…………………………….

……………..

估乜呀~食啖咪知law~

um…………………………..點可能有個咁既組合ga呢…………..

燉牛腩+酸忌廉??????????

感覺似係燉好左車仔麵既碎腩，上層淋上調好味既酸忌廉，再灑上酸度十足既Barberry及脆口的開心果碎，個感覺真係超級有趣!

至於味道，其實係唔錯的~牛腩夠淋，酸忌廉增加了綿滑口感，酸味可中和肥膩，基本上的確係一個唔錯既組合……………但實在太酸啦!!!!!!

酸忌廉本身已比歐洲既濃，再加埋Barberry真酸到每一啖都好似飲緊醋!!!係流質版既日本酸梅ar!!!!我唔使變超人呀!!!!!!

 

 

 

既然有酸梅，點都要送下飯ge~ 小二，一個靚仔唔該~~~~~

……………..點解我要個飯但嚟左個蛋糕ge?.............

Wei唔係wor! 呢個蛋糕係飯嚟 ga wor!!!!!!!!!!

 

 

 

呢種另類煲仔飯應該係伊朗菜既特式之一，因為我都幾sure唔係呢間餐廳獨有，但我就sure佢做得非常好!

飯面金黃微焦，但唔係鍋巴既硬脆，反而係薯片一樣既鬆脆，啖啖都”滋滋”聲非常香口! 加上飯味濃郁，更滲有淡淡炭香和番紅花清香，絕對係今餐最大驚喜!

 

 

 

埋單687,000 rial = 約$180港幣，係我係伊朗咁耐最貴既一餐，但都係服務最好最窩心既一餐~

女侍應同我講，Khoone係「家」既意思，um我完全feel到有呢種感覺~能夠以呢度做今次伊朗之行既最後一餐實在係太圓滿了!

好啦，到我返屋企了!

 

 

https://www.tripadvisor.com.hk/Restaurant_Review-g293999-d7332370-Reviews-Khoone_Restaurant-Tehran_Tehran_Province.html

 

8+4小時既廉航，無想像中辛苦，至少我訓到死左一樣，清醒時間加埋唔過半個鐘……再係吉隆坡轉機，最後夜晚9點幾終於平安回港~

用左一日時間先返到香港，感覺好奢侈呢~

 

 

 

至此，我為期9日既伊朗獨行之旅正式完滿結束!

由德克蘭訓機場開始，去到有古老大宅的Kashan，世界中心的伊斯法罕，係Varzaneh沙漠露營睇日出，於Yazd曬到變燒豬，再見到Shiraz靚到不似人世所有的建築………….睇到好多從未想像過既事物，識左好多好多朋友………

伊朗真係一個同我地想像完全不同的世界，除左靚，我相信更重要係果份友善好客既人情味，係香港永遠唔會感受到的

每一位去過的朋友都話伊朗一定會再嚟多次，我都唔例外，今次我呢條只係一般初心旅客既經典路線，已經仲有超多野未睇未玩，要更深入了解真係無10次8次唔得掂…………當然我唔知幾時先再有機會啦…….

 

好啦! 伊朗之後我去既地方都比較大路，可能驚喜度未必太足夠

我就盡量寫d平凡地點中既不平凡事啦!

多謝支持!

下回新篇再見!!!

 

 

====================

 

Email : funggarcia@gmail.com

 

Instagram : https://www.instagram.com/fung_garcia/

 

My Facebook Page : www.facebook.com/Garcia.in.Germany

 

 

另外文章同時刊於UBlog、 DC Fever Travel、 Blogspot 及遊牧爆谷

 

請各位繼續多多支持呀!!!!!!!!!!!!!!

 

 

 

更多伊朗旅遊攝影資訊