東京雜記 1 - VR館簡短Game評及小貼士

By 鋒加西亞 - 德國工作假期後的世界流浪 . Level 5 - 銅章級資深 Fever 旅客
發表於 2017 年 11 月 13 日 .

講起VR，我第一件事就係諗起90年代尾我初中時代既卡通片「VR戰隊」!
呢套由鬼佬夾硬將日本特攝片「電腦奇俠」格鬥場面同美國校園畫面剪埋一齊既真人卡通，當年真係膠到令人嘖嘖稱奇!
特別係首主題曲! 其魔神級既洗腦程度比Go Go Power Ranger恐怖10倍! 我到而家仲記得阿哥個老友係我屋企唱左一日「V! R! VR! (怪聲)V……R………..」……….

https://www.youtube.com/watch?v=6A5FfwLBe7U

OK廢話講完~
去玩過東京VR館既朋友相信都唔少，但玩過哂咁多隻game既人應該唔好多吧!因為10個有9個都會買佢地既4400yen包入場費+4個game，其他game就逐隻計，有幾多朋友可以有咁好精神時間同財力呢
所以! 就等小弟! 呢個無錢無精神無時間，打機唔叻唔識日文但又想過下VR癮既small potato，純主觀分享下4個zone 12隻game內我玩過果4隻有咩特色及優劣，比大家參考參考，唔好揀錯game浪費quota啦~

=========================

1. 《The Evangelion VR 魂之座》(Blue Zone)

近期最hit非EVA莫熟! 我都係見有得扮碇真嗣渣初號機先嚟VR館ga ja!
不過我忘記左一件事……….最hit，即係最受歡迎啦，咁同星期日海洋公園滑浪飛船一樣，無排返個半鐘唔使旨意玩啦!

遊戲以3個人一組對抗14使徒，由左起係零號機、初號機、貳號機，由玩家自行決定駕駛邊架
由於我只得一支公，被安排同一對情侶同group，基於禮貌好自然比佢地揀先……….
Shit我點會變左凌波麗ga!!!!!!!!!!?????????? 我唔要係碇司令抬底ar!!!!!!!!!!!
當帶上VR，見到自己既身體變得咁玲瓏浮凸更係說不出的怪異………….
不過我都無細心欣賞(點解我講到咁變態ge?)，因為LCL浸滿駕駛倉既真實感已將我拉回來
我更加無諗過係EVA駕駛倉向下望係有機會畏高的……….由第二新東京都市出擊時既上衝力更真係真實非常! 只係體驗呢d都已經值回票價!

(傳說中浸LCL既名場面，好正!)

(網絡圖片)

至於隻game，操作機械人既感覺非常真實，臨場感同壓迫感都有，不過有個好大既問題-----------------我唔知要做d乜
可能係我弱雞或者聽唔明日文指示啦，3架EVA囉住機槍點都射唔爆14使徒既絕對領域，根據原作接近戰可以中和力場，但又好似點行都貼唔近………
於是就只係企係度開槍，避------唔到……..繼續開槍..........又避唔到…….完
…………………..
排左個半鐘隊，5分鐘就死左，除左中槍又無乜特別活動做過，我VR做碇源堂唔好……….
真係有少少失望ar…..

(網絡圖片)

網上搵到有靚女玩既片，可以參考下~

https://youtu.be/qHoIcnG4sws?t=3m1s

*其他Blue Zone 遊戲 : 《龍珠VR - 秘伝龜波氣功》、《獨角獸高達VR - 激突・ダイバ上空》

=========================

2. 《ホラー実体験室 - 脱出病棟Ω》(Red Zone)

據說係全館最恐怖既game!
玩法係於限時內坐係輪椅上逃出呢間塗滿蕃茄醬既醫院，中途仲要避開陷阱同d唔知係妖怪鬼魂定食人魔既追殺
而你手上渣住既----------- 喂…….Biohazard都有把刀仔打大佬ar，妳得支電筒比我係咪過份左d ar………..
但講真ar，如果係堅既話你比關刀我都唔想入去ar!!!!!
突然標d零距離鬼怪已經係小意科，最恐怖係個肉血淋淋既場景! 加埋唔知嘆氣定微笑既聲效，真係真到以為自己係恐懼鬥室!!

講返遊戲性，其實你只需要用電筒choose返行左定右，推前推後避開d妖怪劈妳or激光陷阱等
而妳只要有受傷，就會即刻sayolala啊，好似Running Man咁被送去到監倉等你老友嚟救你，可以話都有d難度
不過，我好似玩左5分鐘左右就不知何解卡死左一間房門前，進退不得，突然boom一聲就輸左去監倉………….完全一頭霧水………

(網絡圖片)

(Running Man d監倉真係幾好笑~)

而大家都唔使失望，玩得呢個game，就自然係想感受下恐怖ga啦~個監倉先係精髓呀!
首先你會見到一排同你一樣被縛手縛腳既人半圓形坐哂係度，有兩件類似喪屍既蛋散，囉住d大鎚電鋸斬艦刀，好意整閒咁係妳面前將階下囚一個一個劈頭開胸噴茄汁
你可以做ge，就係數住仲有幾多個到你，同埋佢會用咩工具幫你開腦……………
「幻覺嚟 ga je! 嚇我唔到ge!」
但係d鐵鏈聲、慘叫聲，會令妳第一次明白到「等死」係乜野感覺……….

但又未使絕望，係監倉等死時你面前會有醫院既迷宮地圖，只要你指示到你個fd去到出口就可以得救了!!!!
我 :「Turn right turn right!!! Yes go straight forward! Be quick!」
Partner :「yes……..i am coming…….hold on……..」
我 : 「Next block is exit!!!! Come on be quick!!」
一講完個k音，ee，點解我塊面有把十字鎬ge…………………..
…………………………..
更奇怪既係，點解我隔離會有人一齊玩ge?
啊!~是咁的~玩game前遊戲小姐話 :「先生，see lee ma些，呢隻game一定要兩個人玩ga，但而家又無人排隊wor……..如果唔介意既，我陪你一齊玩ar~但其實我都好驚，你要照顧我呀….(微笑)」
Um~~~~~~~~~呢隻脫出病棟好好玩ar!!!

https://www.youtube.com/watch?v=zLsZUK7UpKo

*其他Red Zone 遊戲 : 《極限度胸試し - ハネチャリ》、《恐竜サバイバル体験 - 絶望ジャングル》

=========================

3. 《Argyle Shift》(Green Zone)

Green Zone既game係最無睇頭知名度最低的，所以我求其揀左同樣係渣機械人既《Argyle Shift》
同EVA唔同，呢隻game最大賣點係玩胸空戰，可以駕駛機械人飛係空中射敵機，仲有個心口好腫既美少女AI係駕駛倉內「master master」咁叫你，英雄感到極點呀!!!!

至於玩法非常簡單，或者話粗疏，左右控制杆要向同一方向才能移動，變相浪費左一個控制杆quota令遊戲少左變化，座椅沒有震動亦令飛天感大大減低……..
而且時間太短，game只約5分鐘，剛高潮位被敵方包圍預備開拖殺出重圍時就玩完了………擺明係想鋪後路啦…….
但要讚既係射擊係用頭頂作視覺描準，非常方便!
遊戲亦極具速度感，在空中自由飛翔地殺敵極度爽快! 有一剎那我以為自己真係機戰駕駛員呢! 兼且個AI少女真係好鬼掂……………….
總結係，可以一玩的~

(網絡圖片)

官方簡介Video : https://vrzone-pic.com/activity/argyleshift.html

*其他Green Zone 遊戲 : 《急滑降体感機 - スキーロデオ》、《釣魚VR - GIJIESTA》

=========================

4. 《Mario Kart Arcade GP VR》(Yellow Zone)

Mario Kart毫無疑問係成個VR館最受歡迎既遊戲! 只係睇排隊條龍長期兩個鐘起跳就知有幾誇啦! 而且每個人玩完都讚不絕口! 我就睇下你點!
有人可能話「東京街頭都有真人版mario kart渣真車啦~」
係，但你係街頭唔可以真係囉龜殼扔人ar嗎~ 唔告你傷人都”差廚”你亂扔垃圾啦~
而玩呢個Mario Kart VR，閣下需係渣車閃避障礙物途中自己伸手去囉賽道上既道具!
囉到龜殼可以向前向後扔，囉到鎚仔就可以瞄住你個fd係咁扑傻瓜!!
儘管由外人睇來非常kai，但當局者既你一定會玩到超級興奮! 仲未計賽道上各種機關同巨大食人花係你面前壓下! 真係正到不得了!!! 超級好玩!!!!

如果夾硬要講缺點的話，都唔係無ge
首先道具太少了，只有蕉皮、龜殼同鎚仔，其次係玩到好暈………
仲有一個係我既個人問題 ---------- 一條友玩好無癮呀!!!
Mart Kart最好玩既就係朋友間對抗時一剎那既大逆轉!!!!! 當年大學玩NDS 8機連線都不知幾爽! 仲試過上Mass Lecture大叫「邊條xx放藍龜!」爽到爆!
可惜到我玩時後面已再無人排隊，工作人員又無落場，唯有自己一個對電腦啦…….
依然係好好玩，但真係少左d樂趣law………

(網絡圖片)

https://www.youtube.com/watch?v=NQHUomtWDxI

*其他Yellow Zone 遊戲 : 《極限度胸試し - 高所恐怖SHOW》、《R-ATシミュレーター - 装甲騎兵ボトムズバトリング野郎》
(其實都幾想玩裝甲騎兵扮下基佬哥ga........但佢同Mario Kart同一group，異能生存體都無運行啦........)

=========================

除左2/F呢4大zone，G/F都有一d免費小遊戲比大家體驗下
我就試玩左《Front Defense》，係戰場上做雷霆救兵，機關槍火箭炮任你射! 個真實感就在於你要自己囉起子彈入彈的!
都ok，之不過我on居居成日掉轉左支火箭炮ja ma……….
《Front Defense》旁邊有個虛擬空間立體繪畫《Tilt Brush》，拍緊烏蠅，但有時間的話我諗都會幾有趣
仲有另一邊的氣球爆炸屋不時傳來慘叫聲，睇嚟都會唔錯wor~

最後就係少少個人心得啦~
VR館既入場券最好係網上先行預定，只要到以下網址登記做會員，頁面有英文及簡體中文顯示，就算睇日文step by step都完全無問題的

https://webket.jp/pc/ticket/index?fc=00366&ac=0000

當你預約時，會出現「選擇入場」時間，以每小時為單位，仲會顯示該時段的剩餘票數是否緊絀

以咁既格局，係人都會諗每人只可限時一個鐘於館內啦
但原來完全無關係ge!!!!!!!!!!!!
無論你幾點入場，都可以係海洋公園咁玩到關門大吉先撤退!!! 所以好似我咁諗住天黑先入場既遊客就中大伏了!
熱門game閒閒地都排個半鐘，Mario Kart條龍仲長過炒iphone，等得嚟都關門大吉啦! 我排緊EVA時真係一邊排一邊驚……………..
所以時間許可的話，真係晨早入去慢慢玩好d!
當然唔得的話，你都可以好似我咁置之死地而後生，死拖到佢22:00關門先走!
因為一到21:30後，大多數人都玩完走佬得返小貓3-4隻，係無人排隊+每個遊戲只玩到約5分鐘既情況下，半個鐘攪掂哂4個game絕對唔難! 直玩Mario Kart免排隊不是夢!
但呢個都係點解得我一支公寂寞扔龜殼既原因………………
所以貼士就係 : 一係超早，一係超晏，唔好傍晚同人迫呀!!!!