北陸之行4 - 叮噹故鄉半日行程推薦

時間線上應該係接「北陸之行2」去完環水公園離開富山市，嚟到西邊的高岡市~

普通列車要一粒鐘，有JR pass坐新幹線就超高速10幾分鐘only，呢個嚴格嚟講都屬於鄉下既地方有一樣野極度出名 ----------

無錯! 呢度就係叮噹作者藤子‧F‧不二雄的出生地! 係除左東京川崎市多摩區外日本最多叮噹裝飾既城市~ (多摩區係叮噹作畫的地方，有藤子‧F‧不二雄博物館) 最近仲有期間限定既叮噹列車同藤子‧F‧不二雄原畫展tim! 簡直係超級叮噹迷人生必到既朝聖地~

我決定唔理阿哥無乜興趣，夾硬要佢跟住我睇哂咁多景點啦wahahahahahhaha~~~~

 

========================

 

1. 高岡おとぎの森公園

係空地呀!!!!!!!!!! 係叮噹既空地，6個主角齊人既空地呀!!!!!!!!!!!!!!!!!!! T_T”

雖然藤子‧F‧不二雄博物館內都有水管場景，但呢度真係有草地兼四周有花有樹，真實感大增!

技安坐係水管自信地向牙擦仔吹噓，靜宜同叮叮開心咁傾偈，再加埋叮噹大雄向你揮手迎接~

平凡既空地即刻變成真實的童年回憶! 好感動呀!!!!!!!

 

 

 

 

 

 

 

 

 

 

講真呀，呢個景點真係15分鐘乜都夠，而除左呢塊空地，高岡おとぎの森公園其實只係一個比較大型既本地市民公園，即係唔係好多野睇但又起得幾靚幾舒服~ 值唔值得烈日當空下行到隻積咁過lai就見人見智了

我既意見就係--------叮噹fans必到! 就算唔係fans，有時間的話過lai行下hea下散下步都係好事~

 

 

 

 

 

 

 

 

交通 : JR新高岡駅出向西步行約25分鐘

*注意巴士極度疏落，錯過左又唔想行原路返去ge，的士係唯一辦法。但我當時四周全無的士，最終只有拜託油站職員幫手call車了……

 

 

 

 

 

2. すし食いねぇ！ 高岡南店

高岡同富山一樣海產豐富，江湖傳聞連迴轉壽司店都會用最新鮮既本地上等食材，性價比高到蔗渣既價錢有燒鵝既味道，當然就要一試啦~

Tabelog妝搵到呢間好似幾唔錯，一上車的士佬就話呢間迴轉壽司店本地無人不識，呢個時間11點幾可能都要排隊wor!

咁誇張??? 但佢又講得岩wor真係要排隊………..一間鄉村小店有籃球場咁大仲要full house，會唔會有d誇…….

 

 

 

落單係用電腦直接篤機，而餐牌則充滿住大量不知名又睇落差不多的魚類，價錢亦唔算平，大約係香港峰壽x既價格，不過一場lai到唔好理啦，將金澤港直送個column叫哂佢先啦~

 

 

 

痴線~~~~~~~~~我都唔知食左d乜，但每一舊都極極極好味!!

再叫其他種類既壽司，真係新鮮到好似未死過一樣!

除左富山必食既白蝦外，更特別推薦所有貝類! 爽脆鮮美，同香港既相比就好似碧咸對展鵬，完全係兩個不同層次!!

 

 

 

兩兄弟無睇價錢大吃特吃，埋單大約係7000yen=人均around $250，同係元x壽司差不多，但就有最頂級既味覺享受，抵啦!

臨走先發現原來有午市特餐，最抵1000yen 15舊飯，計落幾乎係爭x既價錢!

見d本地公公婆婆一人一盤大快朵頤…….蠢左呀!!!!!!!

 

 

 

交通 : 高岡駅步行約20分鐘，又係的士算啦

 

 

3. 叮噹列車

食完飯最好梗係慢慢行去高岡駅坐期間限定既叮噹列車啦~

由2013年開始高岡市內路面列車「萬葉線」有一架變身為叮噹藍色~ 不但車門做左隨意門，整架內外都畫滿叮噹與同伴! 睇相真係超有feel呀!!!!!

無錯係只係睇相! 我係無坐到ga!!!!!!!!

…………………………………………

呀呀呀呀呀呀呀呀!!!!!!!!!!!!!!!!!!!!!!!!!!!!!!!!!!!

出發前一日check官網仲話因維修而班次減少，到今日直情完全取消左!!!!!!!

架車只係keep到2018年8月，我一年內再lai既機會真係微乎其微……..Arrrrrrrrrrrr我要坐呀!!!!!

 

(網絡圖片)

 

官方網頁及列車時間表 : http://www.manyosen.co.jp/index.html

 

交通 : 高岡駅發車

 

 

4. 藤子‧F‧不二雄美術館

高岡市另一大焦點就係既藤子‧F‧不二雄美術館~

呢個館主打藤子先生的生平及原畫稿，仲會有期間限定既展覽，藝術成份較重，目測睇落無東京川崎市果個咁夢幻，但仍係粉絲必到潮聖地!

無錯我係用左「目測」呢個字，因為我去到果日又係閉館………….

我唔係無做功課呀!!!! 我check過星期二係開門ga!! 但鬼記得當時個星期一係日本公眾假期，館方將定休日順延左去星期二咩!!!

只能夠怪自己白痴啦…………..

唉錯過奇天烈大百科既原畫展ar………………..

 

 

 

 

官方網頁 : http://fujiko-artgallery.jp/

 

交通 : JR冰見線 - 越中中川駅步行2分鐘

 

 

5. 藤子‧F‧不二雄美術館----對面士多的軟雪榚雪榚雪榚

係壽司店發現叮噹列車泡湯後，已經即刻check埋美術館知道唔開了，不過都係死心不息，坐的士去到黃河先甘心……

「哎呀!!! 今日閉館呀!! 點算呀?? 唔好意思呀!!」

Wei………..阿的士姨姨……點解妳仲緊張過我地ge…….

「你地一場lai到…….呀對面間士多既雪榚好好味ga! 好大杯好大杯，好好味好大杯ga! 一定要試!」

根據阿哥既翻譯，佢係真係講左3次好大杯好大杯好大杯。咁本地人熱烈推薦無理由唔試下ga?

Wa頂使唔使真係咁大杯呀!!!!!!!!

 

 

 

有無攪錯! 杯軟雪榚我手臂咁長，應該係香港雪榚車既3倍，我食極都食唔完呀!

重點係唔似台灣果d又多冰又淡，係成杯都係超濃郁既牛奶味! 如果太多牛奶味都絕對唔係問題! 只係對奶敏感既人食完應該即刻瓜柴囉!

更重點係，150yen ja!!!!!!

10蚊港紙又大又香又好味! 怪不得我地只係坐左10分鐘，就起碼6、7架車既人停低買雪榚啦! 睇lai呢間小士多真係超出名wor!

無得睇原畫展的確可惜，但換來「安坐士多門口吹風嘆雪榚」的日本風情畫，都唔錯呀~

 

 

 

交通 : JR冰見線 - 越中中川駅步行2分鐘

 

 

6. 高岡古城公園

一場lai到，無理由就咁走ga，美術館旁邊係高岡古城公園係閒逛的不錯選擇~

呢度係富山縣的賞櫻勝地，但就目測所見，日常則比較似公公婆婆扶老攜幼的散步場所~

無咩好特別靚既美景角度，之不過一片翠綠草地映在眼前，絕對有身心舒暢之感~

而草地旁個廁所更係不能不去!廁所外既「等候友人凳」竟然可以有咁靚view又坐得咁舒服! 真係日本先做到ga ja!

 

(呢張就係坐係廁所外影的.....有無太恬靜ar......)

 

交通 : JR冰見線 - 越中中川駅步行5分鐘

or

地面鐵路萬葉線 - 本丸会館前駅 or 広小路駅步行5分鐘

 

=======================

 

高岡市仲有既著名景點其實仲有高岡駅外的叮噹大街，同埋萬葉線盡頭的新湊きっときと市場、純白帆船海王丸及新湊大橋

時間所限去唔哂啦，仲要襯天色未暗去其他更想去既地方

下回講下高岡旁邊充滿驚喜既冰見市啦!

 

 

更多日本旅遊攝影資訊