北陸之行7 - 5小時快閃金澤

原本唔想寫呢一篇，因為金澤對我嚟講實在有d失望，而且我只係嚟行左幾個鐘only，好多野未夠深刻體會

只不過呢個blog既風格就係實事求是+純自我感受，儘管有d不如意只係我既黑仔+主觀，仍然想寫幾隻字做個記錄~

好啦~ 承上回由冰見市回高岡站坐JR，離開富山縣來到石川縣，5個鐘既快閃金澤市之旅開始!

 

1. 巴士

富山縣同石川縣兩個地方基本上係一齊玩的，所以比較佢地既首府富山市vs金澤市就成日出現

就呢兩日所見，富山偏向鄉下，反而金澤雖有綽號「小京都」，市中心卻明顯大城市現代化得多!

只係見到個JR站門口都嚇死人! 有無咁大舊ar喂!

 

 

 

 

 

 

 

 

用local bus穿梭金澤市係常識，但估唔到佢個巴士system係咁先進!

電子顯示牌+顏色分類非常清晰! 得罪講句真係路痴都唔會坐錯車呀!

200 yan單程券500 yan 1day任坐券，班次密度同香港相若，幾乎係見過日本最完美既巴士系統!

當然啦，迫既程度都係非常完美………….

 

 

(網絡圖片)

 

2. 近江町市場

「近江町市場」號稱金澤廚房，食左先講，梗係醫肚先啦~

佢有幾出名有d咩食就唔多講啦，反正大把blogger vlogger都會囉住隻生蠔條條fing話「好新鮮好好味呀~~~~」，上網一search就有

係，係好新鮮好好味，但係咪真係咁抵呢?

首先我地兩兄弟一落車就見到大量鬼佬同中國大媽，感覺先打個折扣 ; 再係市場行了數圈，廿幾間食肆幾乎千篇一律全賣海鮮刺身丼，好似倒模一樣毫無特色!

你知啦，刺身丼咪不停魚+飯+魚+飯+魚+飯+魚+飯+魚+飯+魚+飯…….好悶呀!!!

仲要價錢動軋2500yan起跳，3000yan以上才是「正常」!? 築地都好似無咁貴wor!

至於市場內其他海鮮檔，除非願意花成千銀賣隻蟹，否則都係生蠔魚生帶子果d，食幾隻咩都夠啦……….

反而蔬果類仲更加有趣! 新鮮原條山葵、剛出土既頂級松茸、兵乓波咁大粒既栗子……..但我無理由剩低既旅程揪住堆蔬果日日玩栗子ga

失望，唔夠一個鐘就走人了

大家都係遊客向，但同築地比較，近江町市場明顯輸左條街……….

 

 

3. 二十一世紀美術館

幾乎係日本最有名的現代美術館，果個可以係水底行走的游泳池更係standard打卡位!

之不過，我成日都話，理想同現實係唔同既

 

 

 

一個人係池底跑跑跳跳就話有趣je，一群人係池底排隊影相就似有病ga la…….

粉紅清真寺又係咁，新宿VR館又係咁，點解我去到邊度都係收引人群既男人ar!!????

 

(咪好似咁要一個一個攝位入去影相law........)

 

值得一提既係呢個泳池上層係free入場，進內則需購票到內部的1至1x號館，每個館地方都不大，並只有部份能拍照，而大部份展品對於我呢d對現代藝術一頭霧水既人嚟講絕對會一頭霧水!

阿哥則話大至上都係出身、起源、進化等等反思…………

但我只對洗手間都有展品呢件事覺得新奇有趣，同不停唱「二十世紀末日未接近時出生」…….…. 膚淺到呢……..

如果閣下只想打卡，似乎都係係外面同各種外星裝置selfie下好d……..

 

 

 

4. 兼六園

貴為日本三大名園之一，風景實無死啦掛!

無錯呢度的確非常非常靚，樹木設計同庭園配合得天衣無縫! 之不過係我去到時突然出現10號風球式既狂風暴雨g嗎!

都未見過有雨點龍卷風由地下卷入把遮裡面ge! 風華圓舞陣ar????

兩兄弟兩把遮都完全濕x哂………….

無計啦，反正都扭得出水了，咪繼續邊行邊講「wa好靚wor」「wa好濕wor」…….

 

(一秒前)

(一秒後)

 

 

短短5個鐘既金澤之旅就係失望同濕哂既情況下完結

我知呢度應該仲有超級多野等緊我去發掘，反正我promise過自己一定會去能登半島自駕的，咁就留返下次先啦~

晚上坐JR雷鳥號特急，只需3個鐘就去到大阪梅田，約左親人食飯呢d野就唔講了，如有興趣我地食左咩就參考返日本紀伊半島Day8.2 – 最正的隱世大阪燒

無錯，我又搵到位回帶宣傳了~

 

 

 

====================

 

Email : funggarcia@gmail.com

 

Instagram : https://www.instagram.com/fung_garcia/

My Facebook Page : www.facebook.com/Garcia.in.Germany

 

另外文章同時刊於UBlog、 DC Fever Travel、 Blogspot 及遊牧爆谷 

請各位繼續多多支持呀!!!!!!!!!!!!!!

更多金澤旅遊攝影資訊

更多兼六園旅遊攝影資訊