格魯吉亞背包行 - 出發前資料大全集

應該每個去格魯吉亞旅行既朋友都會聽過呢句說話 :

「格魯吉亞? 邊度嚟 ga? 係咪瓦努阿圖d friend?」

當你同個friend講完係高加索地區，佢都仲要問係咪非洲好危險時，不如真係慳返淡氣暖肚算啦，又或者好似旅遊界前輩Sonya所講「土耳其東北邊，伊朗西北邊」會易明d

講真又唔怪得其他人ge，我唔係上年去伊朗時睇Google Map見高加索3國好似幾近幾過癮，分分鐘而家都仲以為Georgia係美國既50份之一ar

作為旅行人，我不嬲既宗旨都係「越少人去既地方就越要去睇下」

儘管格魯吉亞唔係話咩好冷門既國度，但聽聞高加索山脈一帶風景靚到嚇死人，咁岩又有平機票，一於以佢作為我2018年既首個long trip啦! (可能都係唯一一個……….)

 

 

(同時呢個trip係「Share積fund去旅行」第三回，善款全數捐左比奧比斯，詳情可參考呢度 https://goo.gl/SwXwNW，最終籌得善款既Post係呢度 https://goo.gl/SCyyvr)

 

========================

 

簡單Background

 

---

 

 

其實我一向都唔擅長寫呢part，所以都係好一如以往咁係維基copy and paste修剪下就算了~

格魯吉亞是前蘇聯加盟共和國，獨立於1991年4月9日，但Georgia文化其實早在青銅器時代已出現，有約一百八十萬年歷史。

地理上位處黑海東面，歐洲亞洲的交界位，一般國際社會都將佢歸類為歐洲國家。

近年係國際上最大件事，就係北京奧運開幕果日比俄羅斯侵占左北方既南奧塞梯，至今都係無左追唔返.......好寫完~其他就睇維基王啦~

https://zh.wikipedia.org/wiki/%E6%A0%BC%E9%B2%81%E5%90%89%E4%BA%9A

 

 

 

時差 :  UTC+4，即係慢香港4小時

 

貨幣 : 主要使用「拉里Lari」 (GEL) ，大約1 gel = $3.2蚊，即係將個銀碼x3加多少少就得，非常易計。而大面額既200 / 500 GEL紙幣對當地嚟講係非常多錢，唔係每個地方收，最好打散定先

 

語言 : 以格魯吉亞語為主，大多數人都唔識英文，只有重要路牌先有英文。不過唔使擔心，俄文都通用的，所以識個俄妹咪得law~~yeah~

 

 

機票

 

由香港去高加索3國 ------ 即係格魯吉亞Georgia、阿美尼亞Armenia及阿塞拜疆Azerbaijan都無直航，所有航空公司都要係其所屬地轉機，加上3國位處歐亞交界，意味來回各花12小時以上係基本功

聽落都幾囉命，不過唔講都唔知，原來都幾多航空公司有機去格魯吉亞 ------

中東三寶，俄羅斯航空，中國南方航空.........但呢堆基本上淡季都要7k起跳，係而家飛歐洲都係4千既時代，好難吸引人去wor師兄!

 

 

又咁岩真係比我撞到香港人較為陌生的Air Astana做緊特價，$4045連稅來回首都第比利斯Tbilisi，包20kg行李，坐波音767，早去晚返，中途點都要係哈薩克首都阿拉木圖Almaty轉機，回程stopover 17個鐘可以出去Almaty玩一日，仲比埋stopover special offer 可以$1蚊美金住一晚holiday inn，點計都係性價比極高之選!

不過岩岩我《嚮導玩》既拍擋Yuki話check過8月要成$8000 now…… 特價呢家野真係粉紅色xx可遇不可求呢

順帶一提，我買左機票後約兩星期收到email話航班要reschedule，令我既到達時間拉後左兩日，即刻打電話去佢香港hotline，極速免費幫我set返個岩心水既行程，服務態度一流，抵讚~

 

(落筆時check 9月係5千頭，還可以啦~)

 

 

 

 

簽證

 

非常簡單，囉特區護照只需要click入下面條link篤篤篤篤，幾日後就會囉到e-visa，高加索3國都係咁

 

格魯吉亞 : https://www.evisa.gov.ge/GeoVisa/

阿美尼亞 : https://evisa.mfa.am/

阿塞拜疆 : https://evisa.com.az/en

 

原本就係咁簡單，不過落筆前一日突然有網友inbox話比格魯吉亞方面拒絕左visa申請，佢仲要買哂機票tim!

見到佢係旅遊group既post，有網友搵返話項明生都試過申請格魯吉亞visa無理被拒，到而家都未知有咩方法解決，有人話attach果張相像素有問題，有人話申請多兩三次就ok………..真心唔知!

另外，BNO係免簽的，傳聞有美國、加拿大、澳洲visa都免簽，萬一閣下真係咁唔好彩中招，就睇下有無呢d後路了

(post呢篇既時候果位網友已成功入境，似乎真係張相既像數問題，祝佢玩得開心~)

 

 

 

 

 

 

 

 

 

 

 

 

 

 

 

 

 

 

 

 

 

另一點要非常注意既係入境次序!

高加索3國中，格魯吉亞既自由度係最大的，只要有visa，點入點出去邊都無問題

但另外兩國 ------ 阿美尼亞同阿塞拜疆係仇人，十幾年前先暫時停火，儘管邊境接壤但完全此路不通! 必須要經格魯吉亞先去到另一國。

最重點既係，阿塞拜疆非常仇視阿美尼亞，如果passport上有阿美尼亞蓋印，你會比入境官員勁問野加不禮貌對待(網上傳聞)  ; 更甚者係，如果曾進入過存在爭議，阿美尼亞境內的「納卡共和國」(全名”納戈爾諾．卡拉巴赫”)，更會被阿塞拜疆視為曾非法入境，完全不會讓你進入任何阿塞拜疆國土!

偏偏納卡係阿美尼亞必去的旅遊地點，that means要玩盡高加索所有地方又唔走回頭路，入境既先後次序必須係「阿塞拜疆 --> 格魯吉亞 --> 阿美尼亞」，而且呢世都唔再去阿塞拜疆!

可惜既係，香港出發去另外兩國的國際航班非常少兼非常貴，即係話要去哂3個國家，就必須以格魯吉亞首都Tbilisi為中心走最少兩次回頭路，好多時只係交通都用左一日，攪到無返兩星期假都唔使旨意做得到……….

 

 

天氣及衣物

 

基本上都係歐洲果d「日頭曬到嘔、夜晚涼涼地」既感覺，所以5月起行既我係帶左秋天衣物，以薄風褸為主打~

去到就知中伏了.........................

明明出發前天氣報告係攝氏14 - 26，去到點會變左24 – 36 ga? 身材嚟 ga???????

原來歐洲近年都有熱浪侵襲，5月頭30幾度乾熱係常事，而我只帶左一件短袖衫........終於有幾日要底衫當面衫，幾乎內褲當外褲tim…………..

不過以上係指Tbilisi既情況，好多著名風景地點例如Mestia、Kazbegi等都係海拔2000以上的山區，春秋時分既陰天分分鐘可以去到零度! 冬天時連接近北極既零下廿幾度都會出現!

如果要係格魯吉亞通山跑的話，保暖內膽及厚褸真係唔少得!

 

 (平時短袖都熱到嘔)

 (係Mestia行冰川前大厚褸+保暖內膽上陣)

(某個山頂落車時凍到hihi)

 

 

內外交通

 

由機場走人，最簡單係當然係坐的士~

但需知道一班的士佬早已磨刀霍霍向豬羊，邊個係豬係羊? 你估下~

我問過機場information counter，話的士最平都收你35gel = $112港幣

我知~你會話唔貴ar嗎~ 但如果我話妳知，我走人時市中心的士去機場只係16gel = $52，而好密既37號巴士更只需0.5gel = $1.6呢~

30分鐘車程vs 50分鐘車程，但平左100倍wor! 機場d的士佬真係殺人不見血ga!!!!!

巴士買飛好簡單，歐洲慣常既中門上前門落，上車有部機，入錢買張飛，坐低等一陣，車長會check飛

 

 

 

 

 

市內移動當然都可以坐巴士啦，不過係唔熟路唔知會車左你去邊既情況下，都係地鐵快速可靠得多

第比利斯的鐵路系統應該係我見過最簡單的，就咁兩條線一直一橫，兼且車站及到站前都有英文，除非白痴(好似我咁)否則好難落錯車(我掛住玩手機…….)

 

 

 

 

地鐵係俄羅斯風格，即係扶手電梯高速向下衝成分鐘先到月台果種

記得”爵爵和貓叔”有張好出名既圖展示台灣香港既電梯速度有咩分別，當我第一次企上第比利斯地鐵站既電梯時，我就係果個樣了

另外第比利斯地鐵係沒賣單程飛的，必須去counter整返張card 嚟 “do”，單程約1.5gel，入多d無所謂，只要keep住張收據，走果陣還卡可以回水的

但係我隨手扔左…………..

 

 

 

 

(感謝爵爵和貓叔授權使用，Thank you!)

 

如果趕時間都可以坐的士，通街都係，仲會好似越南咁行下街都會撩你，攪到我好似做企街咁

架車無咪錶，上車前記得講價，劈一半係基本，亦可以拜託hostel叫車

如果要坐的士去其他城市，則可以去Mini Bus站搵司機，又係大把人會衝過嚟兼記得殺價! 兩個鐘頭既距離大約45-50gel啦

 

 

Mini bus係格魯吉亞叫Marshrutka，可以話係高加索地區最著名既交通工具，主要係for城市間既長距離移動，坐5-6個鐘都只係約30gel，非常便宜，備受世界各地既backpacker………唾罵law!

車又迫，窗又lock，冷氣又唔夠……… 30幾度呀，焗豬肉批咩…….

細路少見多怪，一架16座van可以塞25人連行李，真心覺得係Georgian Got Talent

最慘係我由Kutaisi返Tbilisi果程，懶醒坐車頭以前鬆動d，點知比兩個相樸手夾左做三文治足足4個鐘，果陣冤臭……..

我以後都唔想再坐公共Marshrutka呀!!!

 

 

 

 

 

 

 

火車係另一個選擇，不過並不發達。

古舊、班次少、車速慢、去到既地方唔多，但相對係舒服d ge

特別要去一d好遠既城市，e.g. Mestia、Batumi，甚至阿美尼亞首都葉里溫Yerevan及阿塞拜疆首都巴庫Baku，都可以坐overnight慳返一晚住宿

為左去Mestia我由Tbilisi坐左一晚火車去Zugdidi，即係由中部坐去西部，用左9個鐘(坐Marshrutka應該係5-6小時)，頭等包廂價格29gel，一舊水都唔使，平到震~

當然啦唔好期望架車好靚啦

 

 

 

 

 

 

最後一個手段係內陸機!

要往來首都第比利斯Tbilisi同第二大城 ----- 黑海邊既巴統Batumi，同埋去偏遠既Mestia，呢個係最快既方法

格魯吉亞小型航空公司Vanilla Sky每日都會有航班來回各地，價格都不過係$2-300港幣，認真唔貴!

之不過有個好大既缺點 ----------- 滿座!!!!!!

一架飛機只能坐19人! 佢究竟點樣維到成本ga?????

我上官網click極都無航班時間睇，忍唔住send email去問，佢地禮貌回覆打後兩個月都full booking了………

再者如果去Mestia，會因為山區天氣不穩定而臨時取消航班，要小心小心……

 

http://new.vanillasky.ge/

 

 

 

Sim card與找換店

 

機場一出閘就已經有一大堆找換店，自己格價啦~

不過就算換得少都唔緊要，Tbilisi Old Town既找換店仲多過香港既Seven，匯率甚至可以靚到同apps顯示既一樣，非常唔使擔心~

 

 

Sim卡店一樣係機場有好多，問過當地人推薦出閘右手邊紅色呢間Magti係the best

15 gel有5G，用哂充值，可收聽電話但不得打，已經非常抵用!

速度都非常不錯，我去Ushguli咁偏僻都whatsapp facebook到，滿意!

 

 

 

 

住宿

 

同歐洲其他地區一樣，Booking.com同Hostelworld.com都有超大量住宿比你慢慢揀

一般舊城區係指和平橋以西既地段，住係果邊幾乎都無死錯人

想交通方便d，自由廣場Liberty Square附近無得輸

想文青feel d，Liberty Square至Rustaveli 果段”Shota Rustaveli Ave”大街係coffee shop同文化藝術集中地

 

(橙色係Old Town範圍，綠色係Shota Rustaveli Ave)

 

至於價錢…………..我幾乎唔相信自己對眼!

Hostel一晚唔過一百蚊! $80-90已經係靚野，最平甚至可以低過$50! 仲過份過越南峴港! 正式榮登我「最平青年旅舍國家龍虎榜」既no.1!

不過小弟有個壞習慣 -------- 平既地方會使得錢更多，所以都係住返約一舊水一晚………….

成個旅程我係Tbilisi住過3間hostel, 以第一間位於Liberty Square左近既「Pushkin 10」，最貴but最好，推薦~

另外兩間各有d古怪野，留待往後既遊記再慢慢講啦~

 

 

 

 

 

https://goo.gl/WFFHKq

 

至於Mestia，民宿一樣可以係各訂房網站搵到，重點係你要靚view定就腳je~

我住既「Mushkudiani Manor」只係$80港紙1晚有單人房，行10分鐘就到市中心，最重要係主人超friendly! 最最重要係露台風景嚇死人咁正!!!!

睇過我facebook page同IG既朋友甚至話仙境一樣!

未睇既朋友…….就等我寫到果一篇先啦~

 

 

https://goo.gl/JJMnvc

 

另外注意格魯吉亞大部份民宿及hostel都無冷氣，夏天時一把風扇for 10人dorm都咪話唔正………….

 

 

飲食

 

酒呀!!!! 我話酒呀!!!!!! 成個格魯吉亞都係賣葡萄酒ga! 仲話紅酒係由佢地發明tim!!!

堅唔堅我唔知，但成街都係紅酒bar紅酒鋪就係事實! 情況就好似德國周街都係biergarten咁，係條多車馬路旁都會有兩個肥佬優雅地「等等，我神之水滴緊」，個感覺都幾有趣~

價格當然唔貴啦! 去餐廳食飯，500ml都係10 gel = $32左右! 嚟一set比我沖涼呀唔該!!!!!

味道好唔好?

咪玩啦，威士忌or啤酒都仲可以吹兩嘴，紅白酒我識條鐵咩!

紅酒專家fd話品嚐過進口香港既，非常唔掂! 但我呢d唔識野既就覺得不論dry type or sweet type都非常芳香好易入口~

反正都係幾蚊一杯平過水，無理由唔試下ar?

 

 

 

 

 

 

格魯吉亞人非常proud of 本土菜，不時自豪咁話Georgian food is the best!

傳統菜式的確種類凡多，主要以麵包、芝士、薯仔同肉類為主，多以燒、焗烹調，重油重鹽，份量大，味道濃!

再簡單講，膽固醇過高既朋友去到同自殺無咩分別! 係減肥人士既天敵ar!!!!!!!!!!!!!!

唔知有無關係，我真係無見過一個外表30歲以上既格魯吉亞人係瘦ga……..地鐵內更滿是噸位十足既女士………明明呢度係東歐嚟ga.......金髮美女呢........

不過如果好似我咁鐘意食重口味，呢度真係無得輸~~~~~~~~~~

著名既蒜蓉汁燒雞Chkmeruli、格魯吉亞餃子Khinkali、鐵板薯仔牛仔肉can’t find what name、芝士薯茸老婆餅Khachapuri等等等等，樣樣都食到我lam lam脷!

減肥呢d野，返香港先啦~

 

 

 

 

 

 

 

 

我有個怪僻，去到外國總想試下d Fast food同香港既有咩唔同~

但原來格魯吉亞既連鎖快餐店可以比香港貴law!

Wendy’s 一個雙層牛堡餐竟然要17.5 gel = $56!

但我去Tripadvisor出名既靚餐廳主菜+白酒都係 $60落樓ja!

但由於Wendy’s係中學時既回憶，會掛念就承認太掛念，貴都豪一次啦!

順帶一提，格魯吉亞local汽水極難飲! 係極極極難飲!

除非鐘意飲糖漿，否則都係唔好增加自己患糖尿既風險了

 

 

 

 

 

最後就嚟個主要城市簡介啦~

 

第比利斯Tbilisi :

唔止充滿歷史文化，我自己會形容係一個古靈精怪，包羅萬有既活力城市! 認真細味的話無3、4日係玩唔哂的!

 

巴統Batumi :

最西邊既格魯吉亞第二大城，有朋友話好有朋友話唔好，我無去過答你唔到~

 

Mestia :

公認最靚既高加索山脈Svaneti地區的山中村落，路途極為遙遠，來回甚需時甚久，但信我，格魯吉亞自然美既神髓係哂呢度，最少住返兩三日!

 

Kutaisi :

格魯吉亞第3大城，亦係歷史名城，不過我與其他旅途上既朋友都agree完全無野睇，one day trip都慳返，路過就行幾個鐘啦

 

Kazbegi :

同Mestia齊名既風景區，外國forum話二揀其一就得，但我覺得非常不同，亦非常之靚! 另一必去地方，one day trip ok~

 

Borjomi :

以出產國際知名既同名礦泉水而聞名既城市，仲有飲得既溫泉，我無去，但幾位朋友都話無聊中伏唔好飲……….

 

Gori :

史太林出生地，如果對二戰歷史有興趣朋友既朝聖地，one day trip ok~

 

Sighnaghi :

無期望但好有驚喜既hea地方，起碼要係山邊食一餐! one day trip ok~

 

=========================

 

好啦! 格魯吉亞旅行前既導入簡介會就係咁多先~

唉次次都係咁………..明明想簡單寫幾隻字最後又變4千幾字………..希望對有興趣去當地既你有作用啦! 但如果無興趣既話，我都幾佩服閣下可以睇哂呢篇咁悶既工具文………

Anyway~ 前後共11日既旅程預計會以日記形式寫11篇，以我既寫作龜速暨下星期返新工好忙，應該快極都要半年先完得到……….

唔理啦~ 下回開始，長篇遊記「格魯吉亞背包行」正式開波!!!!!

請多多支持呀!!!!!!

 

====================

Email : funggarcia@gmail.com

 

Instagram : https://www.instagram.com/fung_garcia/

 

My Facebook Page : www.facebook.com/Garcia.in.Germany

 

Medium : https://medium.com/@funggarcia

 

～瘋人鋒語 - 30前80後的德國工作假期～

 

更多歐洲旅遊攝影資訊