格魯吉亞背包行Day1 - 夜遊第比利斯

格魯吉亞遊記正式展開!

11/5/2018朝早9點45分,我坐上哈薩克的航空公司Air Astana向格魯吉亞前進

都唔知有幾耐無坐過非廉航了,又有拖鞋又有戲睇又有飛機餐食,咁好服務真係有d唔係好慣~

波音767既舒適程度都ok,至少我訓到死左一樣~ 但關唔關d戲全部無雞腸字幕我要齋聽英文就不得而知了……….

 

 


 

 

 

 

 

 

(都係果句,無收廣告錢,歡迎後數~)

 

herrr一聲就7個鐘,嚟到哈薩克前首都阿拉木圖Almaty機場轉機

原本我就plan左出去城市行個圈ge,但如上篇所講我張機票被reschedule,終於得返5個鐘時間,唔通真係的士出去1粒鐘再返入機場咩…….唯有硬食5個鐘啦,行下hea下應該好易過ge~

 

 

 

 

um………….可惜我太天真了………….

阿拉木圖國際機場候機室大約係深水埗社區會堂咁大,而且下晝兩點都未見免稅店開門,食物則由3間小型coffee shop提供麵包

想行想玩想shopping? 太高要求啦掛!

的確,唔應該要求咁高,有包你食仲想點?

 

 

 

 

 

但對於香港人嚟講最世界末日既係 -------- 無wifi呀!!!!!!!

而對於我嚟講最絕世天劫既係 -------- 無冷氣呀!!!!!!!!!

公道d講其實係有冷氣的,但身處玻璃密封地方加34度陽光直射之下,開25.5度合唔合乎冷氣呢個定義又係另一個問題……

解決方法有 :

一) 等免稅店開門後,唔知醜咁縮入儲酒室涼冷氣

二) 好似RPG咁,找到隱藏於候機室內那數張食到風口位既凳

三) Hand carry部冷氣機,電子野好似入得境的

第三樣無預備到,但頭兩樣試哂,好不容易on居居又熱又悶左5粒鐘,直晚上7點半,終於可以走人啦!!!!!!

唔理去邊都好呀!!!!! 我想快d離開呢個候機室呀!!!!!!

 

(呢個儲酒室d酒真係靚,抵我企係度睇妳半粒鐘~)

 

(比你估下邊舊風口有風出~)

 

 

 

(再出發~)

 

(講真,兩個飛機餐都幾好食~)

 

 

 

(一到就落大雨,果然係帶來雨水的男人)

 

(香港時間凌晨一點半到達)

 

格魯吉亞時間晚上9點40分,我終於來到首都「第比利斯Tbilisi」,正式踏上高加索既土地啦!!!

Sim卡唱錢出市區果d上篇講哂唔重覆了,總之去到Hostel check-in已經係夜晚12點啦

奇怪啦………點解我咁攰ge?..............

係wor呢個時間即係香港凌晨4點,由起身計我舟車勞頓左21個鐘呀!!!! 齋坐都攰ga,仲18廿二咩!

但我個心又真係仲18廿二緊…………..一撻上張床就有把魔音不停係度講「唔好浪費時間~~~~出去行下啦~~~~~你今日無做過任何野ga~~~~~」

拗不過心魔,唉落樓下打個白鴿轉,hea hea地睇下凌晨既第比利斯係點樣啦…………

 

 

 

「Wa!!!!!!!!!!!有d料到wor!!!!!!!」

呢句係我見到上面呢個Tbilisi 著名既Liberty Square見到既第一句說話!

唔係條柱好高好大好粗好壯又或燈光曬到佢好靚咁簡單,而係呢種廣場既格局氣勢,係聖彼得堡「英雄城市紀念碑」既影子呀!!!!!

 

(原來聖彼得堡既遊記無出過呢張相,好難得!)

 

之後無意中行左去貫穿old town中心地帶的大街Kote Afkhazi St.,那石板街道,花式建築,鵝黃燈影,越行,我就越有重遊故地既感覺!

無錯! 我返到嚟歐洲啦!!!!!!!!!!!!!!

痴線~~~~~~~~~~~~~~~~格魯吉亞係國際上跟本就被當為東歐既一員,而家仲積極攪緊入歐盟tim! 點會唔係歐洲?

哎呀我諗住佢係前蘇聯加盟共和國成員,又係歐亞交界,諗住會唔同d嗎,點知真係同我見開既歐洲名城幾乎一模一樣ge je!~~

嗚嗚嗚………那段每天遊走於不同漂亮古城既日子…….好懷念呀……….

 

 

 

 

 

 

 

(提比里斯錫安主教座堂,又大又近影唔哂)

 

 

 

轉個彎來到小巷一條,係靚仔餐廳既集中營,不少只係睇外表都有衝入去食餐勁既意慾,特別係想同愛人嚟果種tim!

好,聽晚搵返一百幾廿個女朋友一齊嚟試菜先~

 

 

 

 

再向下行,吵鬧聲漸響,之後就會見到 --------- 老蘭呀!!!!!!

一村人邊飲邊跳邊咀住阻街,左右兩邊全部都係disco音樂怒吼,還有那些擦身而過的酒氣,唔係老蘭係咩呀????

無錯!!!! Tbilisi原來係個不夜城呀!!!!!!

 

 

 

 

 

 

到我走過庫拉河對岸回望old town,那閃爍著的華麗燈火,那矗立在夜色中的巨大山城,還有那隱隱傳出的歌舞鬥酒聲………我係咪再次來到布達佩斯呀!!??????

 

 

 

 

 

 

 

 

 

之後沿河岸走到新開幾年的和平橋,果種扭曲金屬感其實都幾有型,仲要夜媽媽都唔慳電,著哂燈夠哂摩登,點知一班網友就話似十足M巾...........

究竟係我既無聊教壞班網友,定係物以類聚呢.........

 

 

 

 

 

 

 

 

 

望望錶,凌晨3點半,一個「hea hea地既白鴿轉」竟然變成認真夜遊

係攰到嘔但又正到嘔!

頂唔順要返Hostel了!

可恨既係明明攰到死,返到樓下見到有個小花墟又忍唔住行個圈,我已經分唔到係未收檔定咁夜先開檔了.......

好啦! 今晚訓到夠,聽日再漫遊第比利斯啦~

 

 

 

 

 

 

 

 

 

 

 

 

(只係呢個hostel既大廳同露台已經比返勁多歐洲生活既回憶我~)

 

講真呀,短短呢幾個鐘,格魯吉亞已經令我大吃一驚!

我知道大家就咁睇相,感受最多都只係「幾熱鬧ar d夜景幾靚」,但要知道,凌晨3點幾仲會咁旺咁多人既歐洲城市,基本上係倫敦、Ams、柏林同Cph果種level先有,只係呢一點已經顯示到Tbilisi係幾咁繁盛!

咁既大都市,我地係香港幾乎聽都未聽過……旅行得越耐,就越發現自己係井底之蛙………

修行仲未夠呢!!

 

 

===================

 

相關文章 :

 

 《格魯吉亞背包行 - 出發前資料大全集

 

  ====================


Email : funggarcia@gmail.com

 

Instagram : https://www.instagram.com/fung_garcia/

 

My Facebook Page : www.facebook.com/Garcia.in.Germany

 

Medium : https://medium.com/@funggarcia

 

ging


另外文章同時刊於UBlog、 DC Fever Travel、 Blogspot 、遊牧爆谷,請各位繼續多多支持呀!!!!!!!!!!!!!!

 

~瘋人鋒語 - 30前80後的德國工作假期~