格魯吉亞背包行Day3.1 - 雪山下的仙境民宿

上回講到我離開第比利斯，坐上overnight train向Zugdidi前進

正常嚟講，交通工具搖下搖下咁我係非常好訓的，但我竟然一晚醒左3次…..

1點……涼涼地wor，都係蓋返件褸訓啦

2點……凍wor，要換返長袖衫長褲訓

3點……好x凍ar喂! 即刻挖返件heattech著埋襪先訓到!

望下錶 --- 5度???

尋晚入車廂時明明仲諗「咁Q熱窗又開唔到焗死人咩」，而家就係「咁Q凍暖氣都無凍死人咩」!

但係咁都證明，開始進入山區了~

 

 

---

 

 

 

 

所有旅客嚟Zugdidi既原因只有一個，就係去傳說中格魯吉亞最靚既山中小鎮，高加索山脈Svaneti區的Mestia!

係前兩篇既資料大全都講話，Mestia係一個交通極為不便既地方，連飛機都會成日full哂，游水又去唔到，除非你有可以突破天際既鑽頭或者三一萬能俠2號可以掘地前行，否則陸路公共交通都必須經過Zugdidi再轉小巴Marshrutka

早上6:05準時落火車，站外一眾司機立即餓狼傳說咁湧上嚟叫你上的士

之不過200 gel的士 決戰 20 gel小巴，你覺得我呢個窮鬼會點揀~

無錯架車係勁迫，所以記得一落train盡快爽手上左小巴揀位先! 單邊位好好多ga!

 

 

 

 

 

明明一早上齊人，司機死都要7點先開車，中途又停下接個fd，又同俄羅斯美女談下情，又飲啖茶食個包hea成粒鐘，攪到我地成車人都非常不滿! (呢件事係 #場邊小故事 再講)

可能阿司機都feel到我地囉緊把刀出嚟準備劈佢，入山後自動自覺係d靚風景位停車for我地影相，無啦啦由小巴變成旅遊巴……

都好彩係咁je，如果唔係係沙甸魚罐頭既呢4個鐘車真係非常難捱呢……..

同埋 ------- woooooooooooo~~~~~ Svaneti山區既風景真係好掂呀!!!!!!!! 好期待一陣到埗會點呢!!!!

 

 

 

 

 

 

 

 

 

中午12點，終於到達Mestia啦!

由尋晚9點9上火車起計，我用左超過15個鐘頭先嚟到呢個格魯吉亞最西北方既小鎮，都咪話唔攰

落車地點係正information centre門口，入去問兩句囉埋地圖，向民宿進發啦~

 

 

講少少Mestia既基本地形概念先，簡單講就係小橋流水人家高加索版，山谷中的一片小盆地，由主馬路及河流劈成左中右3份，主馬路information centre一帶為市中心，大部份既旅館都開係度

係Booking.com上，Mestia有超級大量民宿，間間都係$100港幣左右就有獨立房，絕對令人花多眼亂

篩選一輪後，原本想揀一間係中心大街旁既旅館，見佢評分超高地理又好，點知望"住客評價"一項，店主原來好細心咁就每個bad comment and改善意見長篇大輪咁一一反駁兼媽叉返對方轉頭，直覺話比我聽呢條友一定有d問題

Check多陣，見到另一間一致評價屋主好人，民宿外既風景更係一流，缺點係距離市中心要行10分鐘，並且第一次去會好難搵到

Um~ 問題好似唔係好大je~ 就你啦~

 

https://goo.gl/JJMnvc

 

點知間民宿又真係幾難搵wor!

一來google map上無顯示小路，另一方面間民宿無招牌，大隱隱於市，唔講只會以為係阿乜水既屋企，自問搵路唔差、綽號人肉GPS既我係information centre指示兼開埋GPS既情況下都一樣行錯路!

總之溫馨提示 ---- 過河後轉左，分叉路向下，盡頭彎位果間鐵皮閘門就係

另外仲有一件小事 ------- 搵路時有隻狗狗一直係我面前引路，我停低影相佢又等埋我，我行錯路佢又好似知道咁帶返我去正確路徑，感覺真係好神奇

唔通我有做動物傳心師既天賦????? 返香港搵隻龜試下先!

 

 

 

 

 

(隻狗狗有保護色完美融入呢幅圖~)

 

講左成千字廢話，終於肯正式講下間民宿啦~

呢間「姆斯庫蒂亞娜莊園旅館Mushkudiani Manor」真係當地人既屋企嚟!

屋主Yuri同佢老婆及6歲既小朋友一齊生活於此，火爐及木色大廳瞬間就給人溫暖的感覺，一杯welcomehot tea更令你寒意盡消~

Yuri的太太英文較好，但需照顧小兒子的日常，所以民宿經營同tour事宜都係Yuri自己做返，但放心佢地真係super super nice! 唔止細心幫我安排及預訂行程交通，仲樂意adjust去迎合我既要求~

一嚟到已對呢個地方充滿好感呢~

 

 

 

 

網上評價話呢間民宿最大特式係二樓露台風景超靚

根據經驗，鬼佬既審美觀真係可以好元化，你見果d咩世界百大美女既華人係咩樣就知啦，所以一直都諗會唔會有伏

結果係………………………………

 

 

 

呢d伏我中一世都願呀!!!!!!!!!!!!! 有無靚得咁誇張ar???????

白色的高加索杜鵑盛放於花園中，以翠綠山嶺及白雪高峰為背景，銀灰流水與木屋古塔作襯托，牛群在腳下靜靜吃草，鳥兒如妖精般於花間穿插歌唱…… 簡直就係仙境一樣!

多年來我寫過好多世界各地既住宿，如果話汶萊果間係我既dream house，咁Mestia呢間就一定我夢想中起床最想見到既窗外風景~

雖然我平時起身都係合埋眼爬去馬桶……

 

 

 

 

 

 

 

至於房間，一開始我係expect 同人share既，特別係我入屋前見到有個青春韓國少女，唉我份人好無所謂，唔介意辛苦d孖鋪ga

不過Yuri對我太好，竟然比間獨立孖床房我呢個獨行旅客!?

間房乾淨企理，衣架及暖氣齊哂，仲有窗外靚view，一舊水唔使，去邊度搵呀~

 

 

 

 

 

(呢張係房內望窗外~ 仍然正到爆~)

 

settle down左再沖個靚涼後(尋晚坐火車鬼有得沖咩)，學呀有為話齋 : 我有d餓呀!

出去搵民宿推薦既”Sunset”餐廳~ 正確地點Yuri佢地講唔出，只係話一過橋就係，唔會見唔到，咁應該係呢間啦~ (呢度又有段故，下回先講)

對住個餐牌一d概念都無，交比店員幫我揀道格魯吉亞既signature dishes，結果就來左呢道著名既Khachapuri，我叫佢做「芝士薯蓉老婆餅」

 

 

 

Khachapuri係格魯吉亞民間最常見食品，差不多周圍都買得到

一般會用大量鹽、大量芝士、大量牛油及大量薯仔加大量麵粉，攪攪攪攪攪均做餡料填入麵包，再用烤爐新鮮焗出，有d版本係整到碗麵包湯咁再加雞蛋及一舊磚頭咁大既牛油，齋睇d食材都覺食一個就爆兩日膽固醇quota!

之不過真係好香好滑，新鮮熱辣! 死就死啦!

但好味還好味，個老婆餅差不多10寸普通批咁大，我又唔係小林尊，撐到盡半個已經收皮……

我都唔明，呢d pizza type既食物，同樣size，外國30幾蚊一個極高質，香港2舊幾一個what the fxck

又平又靚既美食，香港真係咁難做到咩?

 

(最後囉走左當後備糧食，點知幾日後係車上比太陽曬到變壞左…… 對唔住呀)

 

回到民宿，幾乎就對住個靚view唔想走! 但無理由咁浪費時間ga，係Yuri既安排下，向冰川前進啦!

下回繼續Day3~

 

===================