格魯吉亞背包行Day3.2 - 冰川獨行@Mestia

續上回,坐上民宿主人Yuri的古老吉普車,在雨中經過千山重重美景,我地嚟到Mestia的重要景點Chalaati Glacier

去Chalaati Glacier好多backpacker都會選擇行路,因為沿途風景真係好風靚,除左不知名及不同顏色的巨木山林,轉角遇到雪的感覺亦非常有feel~

不過下晝兩點幾先出發既我再行3粒鐘先到冰川入口真係蚊都訓,都係乖乖課金50 gel = $156比Yuri車我來回算啦

係有d貴,不過渣車都要近40分鐘係算耐的,有d錢係要比人賺的

 

 

 


 

 

 

 

 

 

來到冰川入口就開始自己一個上路了~

聽Yuri講只需行一小時左右,而且只有一條路非常易行,極能滿足我呢d又想行又怕辛苦既懶人~

Hey咁嚟到山區當然就係要行山去感受大自己既魅力ga啦~

總之,開波了!

 

 

 

(睇我著成咁就知有幾凍啦,零度呀!!!)

 

 

 

大致上將呢條往冰川既路可分成4部份~ (非offical,我自己分的~)

第一部份的路段坡幅較高,碎石亦多,仍少量未融積雪及倒塌大樹阻路,天陰有雨又凍,假如熱身不足可能會有d辛苦

加上被四周的參天巨樹包圍,景觀上無乜野睇,仲要熊蛇出沒注意

但放心,20分鐘左右ga ja,我邊行邊唱兩句「woo~~~~冷雨夜我好想xx」好快就捱過~

 

 

 

 

 

第二部份是沿河邊慢行~

雖然地下較濕且多泥,但樹根較多加上地勢上落不大,個人覺得相對好行~

有條冰水河係旁邊又感覺上輕快d呢~

但記住唔好發癲靠近條河,沖左落去玩人肉激流真係魂斗羅30條命都唔夠死……

 

 

 

 

 

 

第三部份都係最危險既部份,係一片高低起伏既亂石群

亂石中路標不清,容易行錯路都算,最慘係d石舊舊都三尖八角唔大唔細,石罅都一樣唔大唔細,即係一差錯腳分分鐘就要係度hea返127小時

而且每一步都係大幅度的上上落落凹凸不平,對我呢d傷膝中年嚟講絕對係一份負擔! 如果無運動開既更會有抽筋既危機!

講到好危險咁,其實只係為左掩飾我勁focus咁爬呢度唔記得影相既mistakes je~

一個人行係驚死d ga la~ 比下面啦~

 

 

 

穿過亂石群後會是一小片小樹林,再行5分鐘左右就會豁然開朗 ---- 冰川係我眼前啦!!!!! 但係無冰呀!!!!!!!!!!

 

 

 

都唔算無ge,但個感覺似係屋企冰格積雪咁得果少少law

而且雪都有分靚同唔靚,就好似林雪同覓雪咁,呢度就灰灰紅紅污污糟糟咁,絕對唔係冰島加拿大果d一大片藍白色冰原既夢幻

之不過,無雪有無雪既睇法

站在碎石平原上,眼前是浪濤般的疊疊山巒 ; 山色尚黑,荒涼冷漠,寸草不生,目光盡處卻是純白絕嶺,在烏雲深雪之中形成磅礡森嚴之象,又或者簡單兩隻字講哂 ------- 氣勢!

 

 

 

 

 

 

(我見到咁大個交叉就無再前進了,聽聞仲可以向前行的,不過我覺得到呢個位已經好ok~)

 

呢個冰川,或者話呢個第四部份終點既最有趣既地方,就係前方冰川既霸氣係飛條巴哈姆特出嚟你都會覺得「好正常呀,等我搵返把大劍出嚟先!」但望返後面既幽深風景就會覺得「一定會有班骷髏骨失驚無神係地下標上嚟劈你ge」

雪山不遠在天邊而是在你眼前,碎岩散落山谷之中,冰河流轉,矮樹半禿而疏落,那種滄落孤寂的味道,千山我獨行的意景,又是另一番醉人風光

 

(呢張係我成個trip最鐘意既個人照,所以用左嚟做資料集既總topic photo la~)

 

 

 

按Yuri既預計來回應該兩個鐘攪掂,點知我咁邊行邊影相,去到終點又自拍玩一輪,回程時已經用左兩個鐘,finally遲左半個鐘有多先返到入口,累Yuri白等咁耐真係對唔住呢!

不過Yuri又好似已經習慣哂咁,仲講笑話佢係室內嘆咖啡sor fu,我係出面淋雨辛苦d wor~

總之呢個trip比我想像中更為精彩,成個行程由出發至回到Mestia需時約4個鐘,岩岩好消磨一個下晝~

 

(走人~)

 

仲有時間未天黑既話,可以好似我咁拜託Yuri扔我去Mestia山上果堆古塔,在山腰中漫步細味古村風光~

 

 

 

 

 

 

 

 

 

 

 

 

由於我越行越開心,得意忘形地越行越遠,係山腰牧場中無路直落返市中心,攪到原本打算hea半粒鐘變左勁行兩粒鐘,仲要無啦啦比牛追!

乜料呀~~~~ 我以後唔飲牛奶啦!!! 放過我啦!!!!!!

 

 

 

 

 

 

 

 

 

 

 

 (唔知做乜追住我勁耐,我行佢又行,我停佢又停.......)

 

 

 

 

好不容易係天黑前落返山,都差不多成8點,去食飯lu~~~~~~~

諗住去返下晝hostel推薦河邊果間sunset,但當我行到市中心大街時 -------- ee點解有間餐廳好多人,招牌仲大大隻字寫住”Sunset” ge……..

我頂!!! 原來一過橋見到果間餐廳個「日落」(sunset) logo係啤酒牌子嚟ga!!! 眼前呢間先係千足純金Yuri同佢老婆既強烈推薦餐廳!!!!

我實在太白痴啦!!!!!!!!!

 

 

 

 

(對於主大街條路可以爛成咁表示非常佩服!)

 

 

(果然大大個招牌寫住Sunset.......)

 

咁我當然係試下呢間當地人口中既Mestia no.1餐廳啦~

點左格魯吉亞既首本名菜,蒜蓉汁燒雞~

係我地既印象,呢個係茶餐廳頹飯經常出現既名詞,不外乎都係煎燶塊急凍雞扒再落pat啡色既漿糊獻汁,塊皮仲有少少脆已經阿彌陀佛! 最多最多都係山東燒雞咁炸完隻雞放一大團生蒜上去

但格魯吉亞version既蒜蓉汁燒雞Chkmeruli則係一個你估都估唔到既樣ge~~~~~

 

 

呢兜野係蒜蓉汁燒雞?????

無錯! Chkmeruli既傳統做法係先燒好隻雞到9成熟,再劈到佢大大舊,扔落裝有奶白色芝士牛奶蒜味汁既砵仔內滾住上~

醬汁只比水略杰,但非常香濃,食唔到蒜頭但蒜味極重! 雞肉無煮過火,連胸肉都仍然香滑~ 配埋本地自釀白葡萄酒,超好味呀!!!!

一般嚟講呢味菜都會配薯條or麵包醮汁食,但Sunset呢度會落哂成隻燒雞,我一個大男人行完6粒鐘山既狀態齋食雞都飽到嘔! 細食既朋友小心呀!

至於價錢,雞+酒都只係22gel = $70,抵到喊! 聽晚再encore!!!

 

 

 

 

食完飯,好應該行多陣睇下Mestia夜景的,但唔知係食太飽、飲左酒定太疲倦,出發前幾日先病好既我出店行左兩步就非常非常唔舒服!

成晚都又暈又作嘔,連訓覺都心緒不寧,又冷又熱醒左十幾次……..

希望聽日可以無事啦..............

 

 

 

===================