格魯吉亞背包行Day10 - Wine Tour@Sighnaghi




嚟到格魯吉亞之行既最後一日了!

原本只係想慢慢買下野休息下,但可惜,我份人真係太怕浪費時間了,格魯吉亞又真係太多野未睇了

一場嚟到葡萄酒大國,又點可以唔去酒莊參觀下呢~

於是,Wine Tour,我嚟啦!!!!
















 



 









廢事用腦既關係,我又去返尋日果間Holiday in Georgia,見tour選項有個wine字就篤落去,完全無理過中途會去d咩地方~

所以當第一站來到Kakheti呢座種滿柏樹既Bodbe Monastery of St. Nino時,係有少少驚喜的~

根據導遊所講,呢度建於公元9世紀,一直以來都係格魯吉亞既基督教聖地,啊~怪不得果座教堂幾舊幾靚啦~

導遊 : 「呢座野起左唔夠10年ja~ 格魯吉亞有法例規定,所有教堂都必須look old ga!」

D建築物老鬼扮童黨就見得多je,調轉扮老野都真係少見…….

原來蘇聯時期呢度被迫改建成醫院,直到03年左右先開始起返,Anyway,唔計坐教堂,呢個莊園都幾特別ge~

缺點係好多大媽,no matter大陸韓國定日本,都係好多大媽

































第2站去到Sighnaghi的市中心~

講真我對呢個地方一d概念都無,導遊只係話我地會徒步穿過呢個小鎮

可能因為係車訓到迷迷糊糊,又可能因為我呢之前9日已經見得太多,對呢個小鎮真係興致缺缺……………………





























以上感受謹限前半部份~

上到鎮內最高點開始,眼前一片豁然開朗,原來呢個小鎮係一個位於高山之上的前軍事重鎮,建有格魯吉亞其中一列最重要的長城,一直防犯著蘇聯同阿塞拜疆的入侵

導遊仲同我講笑 :「係無你地中國個萬里長城咁大ga la~ 比下面啦~」

規模當然係無咁大啦,但如果長城無呢d正到爆既無死角天空餐廳呢!

痴線ga間餐廳d地理位置優越到咁,只係為左係度食個飯而得登走嚟都抵啦!

我可唔可以唔跟tour仲度飲返杯啤酒hea返幾粒鐘ar????







































(如果再嚟格魯吉亞一定要係度食飯!!!)











來到山腰位一間餐廳自費dinner~

同枱有來自瑞士既紋身辣妹空姐,芬蘭的退休女教師,同分別來自菲律賓及芬蘭but work in杜拜既情侶~

大家講起格魯吉亞,都不約而同話係一個靚地方,但總覺得略有所欠。空姐話係太商業化,芬蘭情侶話d人唔夠友善,而我就覺得係欠缺驚喜太意料之中。

有趣既係,除左我之外,大家都話阿美尼亞比格魯吉亞有趣得多!

我唔覺得係既理由好簡單je,我都無去過阿美尼亞!

睇嚟要搵個機會一到了!

















(我個烤豬肉唔夠食,好彩其他人既太大碟分d比我~ 味道ok的~)



話咁快就去到最後一站 --------- 酒呀!!!! 我話酒呀!!!!!!!!

呢間我唔記得亦唔知係咩名既酒廠,產品分別會外銷去世界各地包括香港,不過香港真係心好少見wor…….

有紅酒專家朋友話 : 「係靚ge,就周街都係啦~」

聽落都有d道理呀,不過一場嚟到,話知佢呀,我未病好哂都要照飲呀!













其實本身我係想去葡萄園果d酒廠,即係可以玩下揪葡提子,再係個草坪上開張枱fing下玻璃杯unun腳

但結果只係氣溫零度既貨倉內,由一個個不锈鋼大酒筒開水喉fer落隻膠杯度,個feel真係好比情人節天橋底食車仔麵呢……..

不過又咁,feel呢樣野全在主觀的心,個重點無偏離到就得啦~

原來格魯吉亞的葡萄酒同其他歐洲國家既出產唔同,佢地大概會將酒簡單分為Dry, semi-dry, sweet, semi-sweet,兼且唔會陳釀,鐘意飲新鮮兼凍ge! 所以格魯吉亞人唔單止無隔夜錢,仲無隔夜酒tim!

唔知係咪酒精作用,各位原本全程拘謹既團員轉眼個個陶傑上身談笑風生,連個導遊都忍唔住笑「早知唔使去咁多地方直嚟呢度算啦!」

咁又係ge~ 試想下,外面26-27度咁熱,可以縮係個冰冷既酒倉內飲住冰凍既葡萄酒,人生一樂呀~





































Wine Tour到此正式結束~ 而我為期10日既格魯吉亞/阿塞拜疆背包行亦都步入尾聲。

返到hostel執埋野,係職員幫手叫的士之下,我再次來到第比利斯機場~

食個包hea一hea就坐返Air Astana走人了~









































總括嚟講格魯吉亞既靚風景真係非常非常之多,我去既其實只係一小部份,要認真去理了解其他歷史文化古蹟,真係無多一星期不可

不過與此同時,我都係覺得呢個trip係我近年都無驚喜的。

唔係話唔好、唔靚,只係完全同我做資料搜集時所知既一模一樣,唔似得伊朗時每一個moment都可以surprise you,又或係日本無意中走進一間隱世食店果種驚喜

Anyway,點都好啦,格魯吉亞始終都係一個有趣既國家~

好啦走啦~ 再見啦高加索! 為左阿美尼亞,我會再返嚟的!



===================





更多歐洲旅遊攝影資訊