帶著爸爸行富士山3 - 夢之日出! 惡夢之下山!

攻頂!



日本時間早上02:15,我地正式開始攻上富士山頂了!

但實在係太多人啦!!!!!!!!!

基本上攻頂就係傳聞一樣排隊買iphone一個個貪食蛇上山!

如果閣下體力足夠,的確係有「左邊快線」可以衝上去,只要唔介意有某d路段要插返隊比人”啤”就得ga la~

其實都少人咁做,因為大隊其實行得唔算慢屬正常步伐,塞車情況亦不多,緩緩一步一步上最終都會輕鬆上到山頂的~







 




之不過我仍然係高估左阿爸的體力

起行後約3個Z佢已開始步履不穩,高山反應+睡眠休息不足,令他每行3-4分鐘就不停氣喘要休息

到達9合目後情況更差,我只能緊貼阿爸後方,右手金剛杖支撐自己,左手渣電筒兼打Rugby式掂住佢backpack,一有咩ee郁就捉實頂住!

縱然係咁,佢都仍數次向後倒下! 有次甚至連我都扶唔住差d一齊碌落he is falling!~~~~~

如果唔係有途人幫手捉實,如果唔係有阿哥做back backup支援,後果真係不堪設想

由細到大,一直都係阿爸照顧我地兩兄弟,今次掉轉到我地照顧返佢竟然差d出事,真係嚇到嘔電......

終於明白阿爸當年睇住我地兩隻馬騮有幾辛苦了.........













Btw,當阿爸完全行唔到坐左埋旁邊休息一陣時,負責登山指路的工作人員竟然以「果個位唔比坐要繼續行」為理由要我地行上去another高處

一來阿爸岩岩係正佢面前向後失足暫時再行唔到,佢亦見到 ;

二來我地個位無阻人,亦無人話我地阻住地球轉,大隊仍然暢通地魚貫而上,佢竟然發脾氣大喝我地????

需知道自細日本漫畫就教曉我地「保護重要既人時會發揮120%力量」,估唔到我今日先第一次親自實踐到呢一點

發火鬧人呢家野,我地兩兄弟本來就唔係善男信女,而家仲係戴志偉+麥泰來雙人射球full power轟落去,對方真係死得好慘.......

總之只能夠講,日本人係變通與規矩既平衡點似乎仲有改善空間呢......





 

 



 







總之九合目開始一路上,我地兩兄弟全程心驚膽顫全力護住老父,體力比平常消耗得更快

一路走來,天已由黑轉藍,雲層中已有微弱的黃光透射而出 -------

終於,始終都係趕唔切,要日出了嗎?

























抬頭一望 ------- 等等先! 上面果個咪十合目鳥居??????

就到啦老豆! 頂住呀!!!! 見到啦! 仲有幾步路就到!! 慢慢嚟唔好急!!! (但我地把聲好急)













當時阿爸已經係行多步都想死,但行山老手即係行山老手,心理質素仍然一流,竟能靠意志力死撐過去!

終於!!!!! 終於!!!!!!!!!!!

2019-07-21早上4點35分,步行逾10小時,我地終於到達富士山頂啦!!!!!!!!!!!!!!!!!!!!

















與此同時,天空突然轉亮....... 喂喂唔係咁準時ar??? 原來太陽已掃開雲層,現出其黃金色的真身!

雲色剎時變幻無定,時而湛藍,時而暗灰,突然射出一片血紅,替雲海與登山者掃上一抹赤霞~































(唔同既相機影出嚟真係差好遠,以上都係阿爸既Sony大機)





(呢張係阿哥的華為P20廣角鏡mode)





(呢張係我既Sony Xperia Z5手機廢柴mode.........)





 (講真,我超鐘意呢張相~)









真係好似做戲夾埋咁,個太陽係我地一坐低就蒲頭! 真係遲多1分鐘都會錯過係富士山頂睇日出呢!

我知道因天氣關係,唔係個個人到頂都可以睇到日出,所以可以成功完成此行既終極目標又無穿無爛,真係超級好彩!!!!!亦不枉我地辛苦左咁耐!

個日出真係靚到癲呀!!!!!!!!!!!!

















至於山頂上既事就無乜好講了~

天寒地凍食個熱辣辣烏冬(真係辣的),幫金剛杖烙返個山頂印,買張postcard寄比愛人,去火山口影張相,享受下辛苦過後成功登頂既快感.........

o下? 行個圈去最高點「劍閣」?

我都好想呀,不過阿爸阿哥姨丈都未必再行到多一粒鐘呢,總要有d缺憾美ge~

所以去鳥居影張相,hea左陣........落山了!~~~













































(呢張相又係好鐘意,有d「上路啦!」or「伯母我嚟啦既感覺」)




吉田線無盡地獄下山道


其實,寫到呢度,三篇夾埋成5千幾字,其實我最想講既就係呢一part!

好多人都話吉田下山線「落山比較耐,路上全部碎石,記得帶口罩襪套」,就此簡單帶過

從來無人講過呢條落山路線根本就係一個無盡地獄!!!!!!!!!! 係成個登富士山過程中最辛苦最討厭最乞人憎同最容易令人受傷既部份!



其實條路好簡單,同上山一樣係Z型碎石路,之不過比上山段更為陡斜,更多碎石甚至係沙灘咁既泥沙路

聽落好似無咩問題,但請細心想一想,本身碎石沙泥路已經容易冼腳,仲要落約2-30度既大斜坡,為左唔向前仆就需要膝蓋、腳裸、腳掌等用力抓地制止前衝,長期重複動作就會令關節碰撞受傷,即係要食x海健骼,即係要我使錢!?? Wtf!!!!!???????

而呢條咁惡劣既下山路你係要行5個半鐘呀!!!!!!!!!!!!!!!!!!!!!!!!!!!













 

 



(八格耶魯你話,落左兩個鐘都只係到本八合目..........)





如果係10年前,我都仲可以好似其他後生仔咁彈下彈下跳躍下山,但10年後既而家咁做既話就唔止係傷膝中年咁簡單,係分分鐘斷腳坐直昇機落山呢!

所以我地只能用行山杖苦苦支撐,又或側身行減輕雙腳負擔..........

行下抖下...........行下又抖下.............

沿途風景一d改變都無,沿路補給亦一支水都無..........

到後來已經唔係體力消耗咁簡單,而係5個幾鐘頭重複重複又重複,悶到嘔電既意志折磨呀!!!!!!!

你試下落5個鐘樓梯呀,包你以為自己入左結界行緊落去搵閻羅王飲茶呀!

仲要有班人囉住個大啷啷邊行邊搖邊嘈冤巴閉!

得啦個個男人都有個大啷啷ga啦! 你唔使話我知你有呀!

如果大家仍然唔明條落山路係咩樣子ge,妳搵張恆生指數打直佢睇就係ga啦

















 (來自明報的網上圖片)





到最後,我地行左6個幾鐘先返到五合目,時間係中午12:06,用左超過24小時,終於完成整個兩日一夜的富士山攻頂之旅!

我地4個人既膝頭全部傷哂,阿哥左腳更幾乎完全唔郁得

明明富士山吉田線係初心者都無問題既簡單登山路線,點會行到咁ga??









好啦,今次旅程雖然辛苦牙煙又囉命,但總算無穿無爛,平平安安地落返地面

呢兩日一夜24小時既登山的確係體力同意志既大考驗,但可以極好運地成功係十合目睇到真正既日出,真正既富士山御來光,總算不枉此行!

而可以成功圓到阿爸既心願,呢個先係我地最開心既事!

Yeah最重要果件事攪掂,以後無籍口再嚟了!~~~~~

日本人話睇到御來光代表好運,就睇下我呢個地獄黑仔王會唔會有咩進步呢~

不過又咁,我地整個上下山時段一直都係天陰陰涼風送爽既行山perfect weather,山頂就藍天雲海,但我地一返到五合目就開始落起大雨,都咪話唔邪.........

至於返到東京後,由於阿爸阿哥都謝哂,剩下既兩日行程都變為純粹係skytree附近行超市+返hostel煮飯仔,難得的family trip就此完結




 



 







(呢幾舊包都有d故仔,睇下有無機會係 #環球美食吐槽區 講下啦~)



好啦~ 帶爸爸登富士山既故事暫時就講到呢度啦~

最後,幾煩都要講多句 ------

富士山對年輕人嚟講要攻頂不難,但如果係30打後甚至老人家,就必須有體力透支的心理準備

登山前物質準備要非常充足,上山要慢慢行不能操之過急,上唔到唔好勉強,吉田線全程向東,唔一定要山頂先睇到日出的~

就算閣下係十八廿二,就都一定要行多幾次山做多幾次gym操fit下先好起行呀!

富士山唔係鑽石山,絕對唔係阿豬阿狗突然即興都可以上到的!

Btw, 假如我仲有機會上富士山,我死都唔要由吉田線落山呀!!!!!!

我要玩大砂走!!!!!!!!!!!!!



=================================







Email : funggarcia@gmail.com

























另外文章同時刊於UBlog、 DC Fever Travel、 Blogspot 、遊牧爆谷,請各位繼續多多支持呀!!!!!!!!!!!!!



 

更多富士山旅遊攝影資訊

我的遊記