漫遊保加利亞 - 出發前資訊總匯集

 

 

 

又開始新既長篇遊記啦!!!

呢個係我上年返新工後第一個長旅行，亦都係小弟誤墮塵網，被嚴重壓迫而出現精神問題後第一次去遊行，希望呢個旅行可以當係一種治療，再順便整理反思下腦內如山般既問題……

咁我個人有問題同大家有咩關係呢? 最大關係就係攪到我寫作不能，上個長篇「格魯吉亞背包行」total寫左一年有多! 於是保加利亞呢個我2018聖誕去既旅行要而家2019年中先得閒寫law……

不過放心啦，嚟緊應該會快返d，因為post blog既呢個moment我已經離開高壓地獄進入失業地獄了~~~~ 大把時間寫野ar~

 

 

 

 

好啦anyway，呢d私人野都係唔好講咁多，入正題~

唔知大家對保加利亞既認識有幾多呢?

好老實，呢個地方一直都唔係我既旅行to go list上，我唯一認識就係世界杯史代哲哥夫，細個仲以為佢係哥爾巴喬夫個細佬

唔係去完working holiday對歐洲國家有返d概念，根本都唔會知呢個國家係南歐洲巴爾幹半島東邊~

而係上年ViuTV既《嚮導玩》比賽，我就答錯左一題關於保加利亞既題目，間接導致我同Yuki後來追唔返慘敗

咁岩我今年好想睇雪 ; 又咁岩見到Qatar聖誕都有平機票 ; 又真係咁岩保加利亞我又未去過!

於是，4年之後，我再次踏上巴爾幹半島的土地啦!!!!!

 (上一次既巴爾幹之旅，可參閱標題下既旅程分類 「南歐 - 巴爾幹半島+地中海之旅」)

 

等等!!!!!!!!!!!!出發前都要做功課ga!

介紹香港人不常到的冷門地方一向係我呢個Blog既宗旨~

保加利亞雖然係歐洲國家，但對香港人嚟講都唔係一個好common既背包旅遊地點，資料唔算好多。

所以我就整理一下我d功課，希望呢個總匯篇可以幫到想去既朋友啦~ 保加利亞真係好正ga!!

 

 

---

 

 

 

(同時呢個trip係「Share積fund去旅行」第四回，善款全數捐左比無國界醫生，詳情可參考呢度，最終籌得善款既Post係呢度)

 

========================

 

簡單Background

保加利亞位處巴爾幹半島東方，北鄰羅馬尼亞，西接塞爾維亞和北馬其頓，南為希臘、土耳其，東望黑海

國家形狀可大致理解為一個長方形，政治經濟重心在於西邊的首都索菲亞Sofia，係一個可追溯到七千年前已存在的古城，四面環山，以溫泉聞名，但其實係俄土戰爭結束獨立後先成為保加利亞首都，之前的政治文化中心一直係其東面約一小時車程的普羅夫迪夫Plovdiv。

 

 

 

 

時差 :　UTC+3，即係慢香港4小時

 

貨幣 : 主要使用「列弗Lev」 (BGN) ，網上話「列弗」係獅子咁解，事實上保加利亞亦都幾常用獅子作為佢地國家既象徵。

大約1 lev = $4.5港幣，最簡單既心算計法係「歐元除以2」! 而家歐元對港幣大約係1euro = $9，即係10euro = $90，我地將個保加利亞幣除2 --> 打9折 --> 後面加個0，就係港幣了~

 

e.g. 20 lev --> (除2) =10 --> (打9折) =9 --> (後面加個0) = $90

 

比多一兩次錢就唔會發現唔難計ga la~

 

 

 

語言 : 保加利亞語屬於斯拉夫語係旁支，文法上大致同俄文、波蘭文相似 ------- 以上都係維基講ge，連德文都唔識既我唔通會識呢d野咩~

同埋又會有幾多backpacker會識保加利亞語ar~ 所以重點都只係當地英文是否流通je

又估唔到ok ga wor! 基本溝通、餐廳落單、街邊問路……..一d問題都無~

但由於保加利亞既女仔一般都比較纖瘦，樣子亦頗為清秀，所以我問路既次數係多左的~

 

 

機票

香港並無直航，主要都係靠中東三寶或其他歐洲航空公司轉機過去

由於我當時係聖誕節，去歐洲機票一般都由8千蚊起跳，1萬蚊係正常價!

但有趣地，Qatar竟然反其道而行係呢d high season出特價機票，我由保加利亞Sofia入希臘Thessaloniki走都只係6千幾，世界top3航空公司係旺季做到呢個價真心好抵啦!

當然，我後來就知道因為呢兩個地方冬季都係low season ……

 

(Qatar有時d機票都真係幾抵的~)

 

 

不過最大既問題似乎都係飛行時間。

本身香港直航去歐洲都已經係10個鐘起跳，加埋轉機閒閒地都要15個鐘以上

而我呢d貧窮神專用平機票，轉機時數更加係7小時起跳，過份既甚至成15個鐘都有!

我當你係機場訓到8個鐘，都仲有7個鐘比妳玩UNO! 牌都爛啦!

 

 

 

但都唔使太擔心，卡塔爾為左刺激當地旅遊業，如果轉機時間為5小時以上，會提供付費的轉機city-tour比大家自由參與 ;

最早果場8點，最遲果場係21:30，如果好似我咁夜晚11點到埗等轉機既，都係搵定張靚梳化啦~

 

 

 

 

其實上年做緊優惠，轉機over 12小時，會好似我坐Air Astana果陣咁提供一晚住宿，上次係阿拉木圖就1美金住4星Holiday-inn   ，呢次係卡塔爾仲癲，免費住5星The Westin!

我落筆果陣仲有呢個”Discover Qatar”既優惠，點知我post前再fact check竟然變左最平都優惠價廿幾美金一晚，感覺無咁抵玩了，希望佢嚟緊會做返啦

(轉機住宿我會係呢個長篇系列既最後一篇講到，希望唔會係一年後先寫啦…….)

 

 

(間Westin係我呢個窮鬼住過最靚最大既酒店，一諗到係免費既就真係爽…….希望快d做返優惠啦!)

 

 

而如果大家有時間又想慳錢，係的確可以極端d，到步後歐洲後先坐Ryan air飛到保加利亞首都Sofia，做特價時單程可以百零蚊有交易~

比較方便既可以飛左去米蘭先，當老婆好開心買緊Prada，你就可以靜雞雞飛去Sofia~ 聽到都覺得爽ar呢~

 

 

 

簽證

而家全個歐洲特區護照都免簽證，我出入境時都非常暢順，無問題~呢一part就唔多講了~

 

 

天氣及衣物

假假地都係德國working holiday起家既旅遊blogger，我非常清楚12月尾既歐洲凍成點!

但南歐一般都比較暖d，天氣預報寫溫度都係零下2度左右，我又唔係非常怕凍既人，所以有羽絨有頸巾有手套應該都無咩問題ga la~

但我計少左一樣野，原來保加利亞係濕凍…………咁我咪濕滯law………

凍到嘔泡呀!!!!!!!!!!!!!!!!!!!!!!!!!!!!!!!!!!!!

香港10度濕凍都已經嗌緊救命啦，我落機當日零下7度，一片白雪，下晝多雲有雨………………

喂………..邊度有火爐買ar，我想整返個抱住嚟backpack ar……..

 

(頭兩日唔識死著勁薄………)

 

即係話，如果係冬天時候，防水防風羽絨、內膽、heat-tec，手套、頸巾、冷帽唔少得，但有時出太陽都會熱，如果你願意一層一層去剥開你件衫的話，洋蔥式穿法係唔錯的~

注意天氣因出陽光時會突然變暖溶雪，到夜晚一收太陽又變返超凍，所以地面經常會結哂冰，著平底converse既話最好去又一城練定溜冰先，著高踭鞋就買定醫療保險啦

另外如果要上雪山滑雪，最好都係帶定防水雪褲，去到先租唔太便宜呢

 

 

 

(一去到山區即刻羽絨係我最好既朋友)

 

 

 

內外交通

由Sofia機場走人超容易，一出門口左邊盡處就係地鐵站，去counter買張1.6 lev = $7蚊既飛直去市中心Serdica站，或者係呢個站轉去National Palace of Culture或Lavov Most都得~

放心啦Sofia的鐵路系統超級簡單，站與站之間的距離亦不遠，當然如果閣下係香港都坐錯站既話我好難幫到妳的………

同埋Sofia市內scale唔大，觀光點一般都係步行範圍之內，如果只打算停留2-3日係絕對無需要比銀兩買鐵路卡，因為充值左既金額係唔會退返比妳的~

 

 

 

 

 

岩岩都講左，係市內就book間市中心既住宿，用11號車或租架單車周圍走啦~

如果真係要去遠d既地方，除左地鐵，Tram都係一個選擇，但同東歐南歐地區一樣，大家都係唔好旨意有咩好清晰既到站指示，甚至呢架車會停係邊個站都未必有

所以一般都係你要去果個地方，網上check好有人講左係坐邊架車去ge妳先上啦

不過我都中過伏，就係網上講果個車站根本就無果架number既電車，我要夾硬跳左上車問車長先確定係岩方向….…….

 

 

 

至於由Sofia去其他城市or國家，就可以坐地鐵or行去Sofia市中心北邊的Central Railway Station，果度有齊火車站以及兩個國內外巴士站

同格魯吉亞以及部份東歐國家一樣，巴士係比火車平價而需時一樣的，一兩個鐘車程既城市單程約10lev = $45左右，好平啦!

 

 

 

但係Sofia Central Bus Station呢度買長途巴士車飛既難處係，左右兩個車站的汽車公司加埋有成40間以上，唔同公司會有唔同既發車時間、地點同價格，更煩既係過半公司display出嚟既城市名都唔係英文!

就算Google translate左做保加利亞文，你都要係果個文字海度搵返出嚟ga! 而巴士站內既詢問處阿姐係無禮貌到我想爆佢樽………….

所以最好既方法，都係下面呢個website搵定岩妳心水既路線，網上有講埋邊間巴士公司發車的，就求其搵一間巴士公司show個cap screen比職員不恥下問啦~

 

 

http://www.bgrazpisanie.com/en/mobile

 

另外注意3樣野 :

1. 保加利亞山路甚多，有時城市之間地圖目測距離雖近，卻有機會返Sofia再轉車會更快更方便

2. 如果要去著名既世界遺產Rila Monastery，巴士站會係西南方的Bus and Coach Station Zapad - Ovcha Kupel;

3. 仲有除非來回Sofia，否則夜晚7點後其他城市之間的巴士係非常少的! 我旅途中就係check少左一次，攪到要坐的士………..

 

 

 

 

至於的士，全世界d的士佬都係想昆妳水ga la~ 記得講價ar!!!

一般嚟講都係街上截車，正常既距離價格應該係同香港差不多，半個鐘既距離約20lev = 90蚊左右，以呢個概念殺價就差不多了

 

 

 

Sim card與找換店

機場出閘會有大約2-3間找換店，匯率各有不同，大家最好行哂先決定~

至於sim卡，由於我今次一早係香港買左，所以無理到~

不過我見入境大堂都好似有得買，可以試下問information centre的，係中間幾易搵，don’t worry~

 

 

 

住宿

保加利亞住宿最大特點，就係有大量hostel式的apartment獨立房!

即係將一間超大apartment分成幾間獨立房租出，有reception有大廳有廚房有common area，即係短期既share house

既有hostel識到朋友既長處，又有酒店具私人空間既優點，仲要間間都各有得色鬼死咁靚，我住果間直情文青café咁款，都唔知幾想係度hea返一兩日ar~

價錢方面，我係Sofia住果間算貴，都係兩舊水一晚，有d甚至百零蚊就有交易，簡直就係M記既價錢Burgerroom既享受! 怪不得d hostel咁少啦!

 

 

 

 

https://www.booking.com/hotel/bg/5-vintage.zh-tw.html?aid=304142;label=gen173nr-1FCAEoggI46AdIM1gEaGKIAQGYATC4ARjIAQzYAQHoAQH4AQuIAgGoAgS4ArnFxesFwAIB;sid=777af591df688fdcdcdf063049cbf918;all_sr_blocks=137741311_200334873_0_0_0;checkin=2019-12-23;checkout=2019-12-24;dest_id=-838489;dest_type=city;dist=0;group_adults=1;group_children=0;hapos=1;highlighted_blocks=137741311_200334873_0_0_0;hpos=1;no_rooms=1;req_adults=1;req_children=0;room1=A;sb_price_type=total;sr_order=popularity;srepoch=1567713108;srpvid=8e308ba90b17011b;type=total;ucfs=1&#hotelTmpl

 

 

 

不過…….我係呢間超級鐘意既5 Vintage Guest House遇上兩個大問題 :

第一係我見間屋咁靚想extend，點知職員話聖誕節佢地要閉門10日放大假，連行李都唔比我keep係度，於是我Day3去Plovdiv時就要全程孭個背囊full gear上山落山…………

 

 

 

第二個問題就係呢間apartment既職員

你feel到佢友善helpful，但係豪邁粗魯，而且佢地係乜野travel information都唔知!

「交通、景點、特色餐廳等等有咩推薦? 唔知呀，都係咁無咩特別啦~」 原來佢地真係住係附近既當地人……….咁好正常呀，你突然問我沙田有咩野食我都話M記啦

而當時information centre亦因為聖誕節快到而收工放假，於是我係Sofia既travel information就完全靠係apartment剛認識既羅馬尼亞朋友了……..

 

 

 

如果真係要住Sofia的Hostel，我會推薦朋友介紹的Hostel Mostel

地理上不近市中心，周圍都無咩野食，乾淨程度還好，尚算企理，common area有氣氛，早餐既豐富程度更係嚇死人!

點解一間床位唔使一百蚊一晚既hostel會有免費自助早餐ga??

仲要種類同味道比大部份4星酒店更好! 炒蛋我都食左兩大碟ar! 只係呢個早餐既價值已令我覺得呢間野好抵~

不過對我嚟講，呢間hostel既最大好處始終都係…………平安夜死城都仲有床位比我訓呀!!!!!!

 

 

 

 

 

 

https://www.booking.com/hotel/bg/hostel-mostel.zh-tw.html?aid=304142;label=gen173nr-1FCAEoggI46AdIM1gEaGKIAQGYATC4ARjIAQzYAQHoAQH4AQuIAgGoAgS4ArnFxesFwAIB;sid=777af591df688fdcdcdf063049cbf918;all_sr_blocks=28478905_127993955_0_1_0;checkin=2019-09-12;checkout=2019-09-13;dest_id=-838489;dest_type=city;dist=0;group_adults=2;group_children=0;hapos=1;highlighted_blocks=28478905_127993955_0_1_0;hpos=1;no_rooms=1;room1=A%2CA;sb_price_type=total;sr_order=popularity;srepoch=1567713033;srpvid=f4248b8434860231;type=total;ucfs=1&#hotelTmpl

 

 

 

聽聞要搵好既hostel，Plovdiv果邊會好d，我無係果邊過夜唔太清楚了~

另外我係Bansko都住過一間民宿式酒店Campanella Boutique Hotel兩晚，我非常滿意，特別係屋主有個靚到暈既女兒呢方面~

美女相就無啦，但間hotel我都post定出嚟比大家啦，係Booking.com上成9.9分ga! (曾經)

 

 

 

https://www.booking.com/hotel/bg/campanella.zh-tw.html?aid=356980;label=gog235jc-1DCAsoF0IKY2FtcGFuZWxsYUgzWANoYogBAZgBMLgBGMgBDNgBA-gBAYgCAagCBLgC_pj66wXAAgE;sid=777af591df688fdcdcdf063049cbf918;dist=0&group_adults=2&group_children=0&keep_landing=1&no_rooms=1&sb_price_type=total&type=total&

 

 

飲食

大份! 味重! 多肉! 唔貴!

呢d都係保加利亞國菜既特色~ 即係話非常岩我啦!

但同格魯吉亞唔同，保加利亞菜相對無用咁多油，而且可能受其他俄系及西方國家影響，食材組合會比較多元化d，豬牛羊雞亦會配合蔬菜食用，除燒烤外亦會有燉煮。基本上你有選擇困難症既話都係唔好打開本menu好d

而某d傳統餐廳既裝修仲會好似去到獵人小木屋咁，載歌載舞非常好feel~ 非常值得去~

 

 

 

 

 

想簡單快捷飽肚的話，Kebab呢個歐遊好朋友仍然係不二之選~

保加利亞流行既kebab和其他巴爾幹國家相似，都係會落大量炸薯條連肉連菜用麵皮包住食，呢種食法我係斯洛文尼亞同阿爾巴尼亞都食過，聽聞係屬於希臘式好似係……..

我話知佢希臘式定自由式呀! 我只知我到步第一餐就係街店小店買左舊small既kebab嚟果腹，wa佢”small”到成筒品客薯片咁粗咁長，我係咪食一條已經爆一日卡路里攝取量啦?????

而之後我係Plovdiv食果舊更加恐怖，大過我塊面ar………

但兩舊都好好味ar…….. 10幾蚊飽足一日真係好抵ar……

 

 

 

 

 

想宵夜的話，Sofia市中心有不少開24小時的意粉店和pizza店，呢個係我係歐洲非常少見的! 平時係歐洲國家，搵到間餐廳收夜晚12點已經算你好運啦~

另外Sofia同Plovdiv的咖啡店同香港seven一樣總有一間係左近的，而且每間都非常有特色! 足以令你每一間都想入去hea一日~

好似我咁唔飲咖啡ge，都可以叫杯熱朱古力慢慢嘆~

冬天Sofia大街上吹著寒風堆著積雪，可以係室內暖爐下細嚐一杯泥漿咁杰既香濃熱朱古力，都咪話唔爽~

但首要係閣下唔怕煙味law…….好臭ar……..

 

 

 

 

 

 

其他小食嚟講，麵包都係又平又大份又好味，巴爾幹常見既羊奶芝士酥買1.5 Lev已經唔會食得哂 ;

另外保加利亞乳酪係國際有名的，好呢味野既朋友絕對應該一試~

我唔好~所以無介紹~係咁先~

 

 

 

最後講下我去過既城市啦~

 

Sofia ------- 保加利亞首都暨國際交通樞紐，千年古城兼政治中心，但一般保加利亞人都覺得真正既保加利亞文化其實保存左係Plovdiv，Sofia係一個冷漠而無特色既城市。

之不過我又覺得Sofia唔太差wor~ 有時間既我會願意留返3-4日係度細味下慢慢hea下law~

 

Plovdiv ------- 個個都話去保加利亞不能不去，去完之後我都超級同意呢個講法! 果種文化大城又係應該去hea去feel唔係趕景點的~

當然好似我咁無咩時間ge，1 day trip都無話唔得

 

Bansko ------- 位於山區既係滑雪勝地，但就算唔滑雪都值得去睇下風景~ 非常舒適，推薦~

 

Rila  ------- 保加利亞最著名既自然風景「七湖」Seven Rila Lakes本來係我極想去既地方，但因為冬天積雪無法成行，但附近既世界文化遺產Rila Monastery不能不到! 靚到嚇死人!

 

總之夏天時，係可以由Seven Rila Lakes -->  Rila Monastery --> Bansko咁順路玩落去的

另外聽聞保加利亞最東部的黑海海岸城市Varna都非常值得一去，但我今次去唔到咁遠了，留返比大家發掘啦~

至於附近既大城布拉戈耶夫格勒Blagoevgrad，對唔住我無理過佢~

 

(Sofia)

 

 

 (Plovdiv)

 

(Rila Monastery)

 

 

 

(Bansko)

 

=========================

 

好啦! 保加利亞既出發前入門簡介又試5千幾字咁完結啦! 真係簡到呢~~~~~

不過，好多人都話保加利亞係全歐洲物價最低既國家，我又真係唔係好覺wor……最多咪同匈牙利差不多，格魯吉亞咪仲平………

定係上次係高加索d野平得太誇張攪到我無哂感覺呢……..

但以玩樂同睇風景嚟講，保加利亞都真係幾surprise地好~ 就算係冬天呢個low season都仍然非常多野睇多野玩~ 物價又平到爆，絕對值得推薦!

無錯~ 冬天係無左七湖睇，但嚟緊會有我呢個七頭同大家講下有咩玩嗎~

長篇遊記「漫遊保加利亞」正式開始!!!!!

我都唔知會寫幾多篇呀~ 希望一年內寫得哂啦!!!!

請大家多d Like多d支持呀!!!!!!!!

更多保加利亞旅遊攝影資訊