赤徑與鹹田灣,宛如沙巴的美麗海灣 【香港郊遊004】

11月,又係郊遊既季節,呢個封塵左成年既系列又出動返了~

前兩日去左行赤徑至鹹田灣,風景竟然靚到嚇親人!

赤徑的紅樹林淺灘步道,鹹田灣的水清沙超超超極幼,令我以為自己去左沙巴tim!

就同大家介紹下呢條我認為係香港最美風景的行山路線吧~

 

 

 

 

 


 

 

說穿了呢條其實就係「麥理浩徑二段」,跑開毅行者既朋友真係當返屋企咁啦~

但對於我呢個渣馬10k都係walking dead既弱雞嚟講,地圖、指南針,再問屋企人囉埋無線電話tim!

仲要以防萬一帶定兩支行山杖in case拗到變廢柴~

 

 

 

至於步行路線,一般行赤徑鹹田灣都係由西灣亭出發,經大浪西灣鹹田灣赤徑北潭凹,網上搵到的路線教學都主要係咁

但我仔細研究過,傳統路線雖然確保行到好夜都有車坐返西貢 (黃石碼頭開的94巴士尾班21:35),但補給位都係哂初段兩個海灣,尾段赤徑上北潭凹仲要不停斜路上山近成個鐘,先甜後苦,對於體能唔太強既我地可能有d吃力

 

 

 

 

所以我選擇左「逆行」!

 

// 由西貢市中心坐94小巴至北潭凹,由北潭凹公廁出發 ----- > 赤徑  ----- > 大浪坳 ----- > 鹹田灣  ----- > 大浪西灣  ----- > 西灣亭,村巴返西貢 //

 

呢條路線既好處係落斜較多易行d,可以襯體力充沛時先走辛苦d既路,補給點鹹田灣及大浪西灣係後段,先苦後甜,感覺開心d~

壞處係假如行得太慢or計唔岩時間,走左18:00西灣亭尾班車就大檸樂了

所以,早d出發啦~

 

 

 

其實我都唔係好早,食埋早餐,成11點半先去到北潭凹

如果再懶d,可以唔使約西貢,係馬鐵烏溪沙站坐綠的都係半個鐘$120左右,幾個人share都係幾廿蚊,唔使咁頻撲花時間啦~

好啦廢話少講~ 開波啦!

落巴士見到右前方既北潭凹公廁,果度就係起點了~

點都要影張相打個卡ge~

 

 

 

 

北潭凹至赤徑一段以暗斜向下為主,行不數步已見遠處的中學旅行勝地黃石碼頭,差不多係香港讀得書既都去過BBQ ga la~

 

 

 

行廿分鐘可見呢個分叉路牌,轉右吧~

 

 

 

繼續輕輕鬆鬆廿分鐘,見到左邊灌木突然有個窿,話咁快就到赤徑了!

 

 

 

赤徑有三大亮點~

第一是兩個離遠成90度角,延伸到海中心的長碼頭,影遠距離扮有型是必需的~

 

 

 

 

 

 

 

 

 

第二是樹蔭下的沿海步道~

海水清澈透底,映照天空的無盡蔚藍 ; 悠然輕步,乘著秋意涼風,一時彷如置身外國呢~

 

 

 

 

 

 

 

 

 

再往前行,便是第三點紅樹林淺灘~

那一望無際的玻璃水,以綠意小樹數株點綴,構圖簡單,卻絕對令人心擴神怡~

如果有機會係度露營睇下星,應該浪漫無比呢~

 

 

 

 

 

 

 

 

行到第一個分叉路仍可繼續沿海,但到第二分叉路就應該回到正軌,唔好走左去白普理營呀!

 

 

 

回到「麥理浩徑二段」,歡樂既時光過去了,咬緊牙關,上山啦baby!

 

 

 

衝左半小時大斜路,到達大浪坳~

呢度係十字路口,覺得體力過盛既可以轉左向上改行蚺蛇尖,無咩事既就飲啖水繼續大路向前鹹田灣啦~

 

 

 

行多幾步就見到目的地大海~ 立刻精神一振~ 再向前見到左方的蚺蛇尖…….算啦呢d地方都係無我既事~

 

 

(蚺蛇尖)

 

大浪坳頂落鹹田灣一段過半小時的落大斜路,時間唔長,但總有種非常討厭既感覺湧出嚟…….點解呢……..

………..係富士山落左6個鐘斷腳大斜路的後遺症呀!!!!!

(恐怖經歷詳見《帶著爸爸行富士山3 - 夢之日出! 惡夢之下山!》)

 

 

 

 

穿過上圖的大浪村,好快就會到達目的地鹹田灣!

Wa! 使唔使咁靚呀!

在陽光照射下,幼沙細滑閃亮,連綿數里連一粒細石都無,令整個鹹田灣彷如一塵不染!

加上向海的傾斜度甚低,令海水能既柔且深地掃上沙灘

如此無垢的清澈淺海,堪比沙巴的日落名灘「丹絨亞路」呢!

 

 

 

 

 

 

 

 

 

 

 

 

享受此等靚絕沙灘最好當然係撩個靚鬼妹曬個靚太陽啦~

不過已經肚餓,都係食個餐蛋麵實際d~

$40個大洋,有埋戶外海景,可接受啦~

 

 

 

 

(行山+餐蛋麵同牛歡喜+咸酸菜一樣,定律嚟ga嗎~)

 

 

鹹田灣士多設船隻接送返西貢服務,約$110一個人,但時間尚早,當然係去埋大浪西灣啦~

從沙灘右邊有路可過,需時約50分鐘,而果條急上山既斜路都有d辛苦呢

 

 

(上斜呢段太chur,竟然攰到唔記得影最signature既鹹田灣背靠蚺蛇尖.........)

 

 

 

 

 

終於來到被譽為香港最水清沙幼、最靚最靚海灘的大浪西灣了!

我有10年無來了! 遠睇真係超級正呀!!!

 

 

 

可惜既係,呢個香港最靚既海灘竟然已經受到污染.........

左邊的海灘還好,但主灘已面目全非..........

10年前,靚到我以為去左馬爾代夫!

10年後,竟然到處垃圾膠粒和油污!

唔理係因為工程、意外定係某個國家出名左,總之果個香港最美的後花園,已經不再存在了

 

 

 

(望海左邊沙灘的沙水還算不錯)

 

 

 

(正灘就慘了.........)

 

 

由大浪灣士多後方離開,又係超級長命斜既時候了………

臨尾段都要上山都有d折磨……..約廿分鐘到浪茄分叉路,之後就一直向下平路,好輕鬆了~

 

(唔好意思,呢張其實係上斜中回望大浪西,斜到妳ar.........)

 

(呢邊向上就係過小浪茄同浪茄再出東壩,要行多3個鐘呢)

 

 

岩時間既仲可以睇到萬宜水庫日落~

 

 

 

 

 

最後到西灣亭,行完!!! 安心等村巴or綠的走人啦~

 

 

 

 

 

總括嚟講赤徑至鹹田灣大浪西灣呢段路係易行的~

雖然不斷上山落山,但每次上山都只係行半個鐘左右,係會好喘但絕對唔算辛苦~

而且check point休息位多,沿途風景又靚到爆,不論係輕行定想運動下都絕對適宜~

不過有幾點要注意 :

1. 北潭凹至大浪村約兩個鐘沿路都無補及,體力不佳者需注意

2. 大浪西灣至西灣亭大約要行一小時,西灣亭的村巴尾班車為18:00,錯過左就行多兩個半鐘出北潭涌plz~

3. 沿路一個垃圾桶都無,謹記帶走所有廢物

 

今次行山介紹就講到呢度~

題外話 :

返到屋企,同阿爸開心share今日個行程有幾正,佢竟然話 :「果陣同你阿媽拍拖成日去赤徑露營ga啦~」

講緊既係40幾年前…………原來我係大鄉里扮哥倫布…….

不過古老當時興,扮係發現新大陸,多個話題同老父暢談都係開心事呀~

 

 

=======================

 

相關篇章 :

 

 

=================================

 

IG果邊間中會有d和Blog及fb page不一樣的相片和story,大家有興趣既去follow下支持下啦~

 

Instagram : https://www.instagram.com/fung_garcia/

 

 

 

 

Email : funggarcia@gmail.com

 

 

 

 


另外文章同時刊於UBlog、 DC Fever Travel、 Blogspot 、遊牧爆谷,請各位繼續多多支持呀!!!!!!!!!!!!!