沙田行去慈雲山,原來超級簡單【香港郊遊005】

由沙田行去九龍的「慈沙古道」,我細細個就聽過呢個名~

其實仲行過tim,不過係廿幾年前6歲果陣,記得當時係非常不情願地比阿爸捉去,覺得條路又斜又長,幾乎一邊行一邊喊!

邊會估到近三十年後再行一次,竟然係一條風景優美,而且輕鬆簡單的一兩小時短途路線~

如果大家好似我咁 ------ 某日訓到黃朝百晏,撻係張床見天氣幾好,想囉支水熱下身就行個簡單靚山ge,呢條聽落嚇親人,實際好親民既「沙田至慈雲山」古道,絕對誠意推荐!

 

 


 

 


呢條慈沙古道,係百幾年前已經係九龍人往來沙田的主要道路

呢條路傳統上起點係慈雲山北巴士站or法藏寺,古時九龍旺過新界嗎

但居所較近終點,所以今次介紹既路線係逆行 ----------- 由沙田博康村至沙田坳道落慈雲山~ 一條路非常簡單~

去博康村只需坐馬鐵至沙田圍站,D出口左行數步,右邊斜路上山就係ga啦!

巴士方面,港九新界有超勁多巴士去到,站名只要有博康村or沙田圍站就ok了~

如果想再慳水慳力既,可以巴士直上水泉澳村,慳返由博康村行上去果段路仔,不過行埋都係5分鐘only,超簡單無難度啦~



 

 

 

 

(博康村行至通往水泉澳村的天橋電梯,我當係呢處開始啦~)



沿水泉坳街直上至博泉街交界,轉左再轉右,沿水泉澳村旁邊一斜石屎路直上就岩ga la~

呢段又闊又平坦的長命斜路應該係附近一帶小朋友的嬉戲場地,沿路見不少family係度散步追逐,玩下小朋友又比小朋友玩~ 彷彿回到以前細個同阿哥落屋村樓下公園玩既感覺~

而家大個就會諗,如果有架單車可以直衝落嚟就爽啦!!!

但推架車上去果下囉左你命先呢………

 



行唔夠10分鐘,就會見到馬鞍山郊野公園入口~ 正式開波啦~

但係…….乜馬鞍山咁惡ga咩,霸地霸到呢個位? 即係陳浩南話唔止銅鑼灣連筲箕灣係佢地頭……..

wei個距離咁遠,飛地嚟ga?………

 

 

 

(一般認知既馬鞍山郊野公園係呢度,而我而家係呢度……..)



好啦Anyway開波啦~

初段都係石級數步就有一小段平路,就這樣緩緩而上一d都唔辛苦~

旁邊仲有亂石小溪流,悅耳的淙淙水聲令人心曠神怡,行步路都快d~ (wa呢d文筆真係好小學生ar……..)

 

 

 

 



一直行15分鐘左右有一開揚飲水位,可以坐低遠眺道風山和寶福山~

 



繼續行繼續行,行多15分鐘就會到達燒烤場~

呢個位於深山中間的燒烤場竟然非常乾淨企理! 四周巨樹環繞,環境清幽地方又大,理論上係個唔錯既BBQ勝地!

但妳叫我囉住袋炭行半個幾鐘上山燒腸仔?? 我睬妳都傻呀!

加上呢度一支街燈都無,夜晚一定黑到黑洞咁,我會覺得似偷情勝地or撞野勝地多d………..

 

 



休息左陣就繼續gogogo啦~

過左燒烤場之後就以斜路為主,但放心唔使驚,因為行多廿幾分鐘呢段路就會完結~

恭喜大家來到沙田坳,代表就嚟到九龍啦!!!!

 

 



去士多食返個豆腐花先啦~ 

呢日有好耐歷史的「恒益商店」,豆腐花雖然豆味不濃,但勝在夠滑,薑糖水都夠味,最重要係可以坐外面望住成個九龍嚟食豆腐花,剩係個風味都殺哂啦~

 

 

 



根據地圖,由獅子亭再落斜路,唔夠廿分鐘已經到達慈雲山,可以收工啦yeah~~~

咁快?????????????????????????

望下錶 ------- 行左一個鐘左右ja???

重點係 ------- 唔夠喉呀!!!! 岩岩行起個人就要收工!

人就係犯賤,明明想輕鬆行快d完,到要走果陣又唔捨得~

距離日落5點幾仲有個幾鐘,於是我決定改變路線! 由獅子亭轉右再次上山行麥理浩徑五段,進入獅子山郊野公園!

 



呢段路就大挑戰了! 不論係石級同斜度都比岩岩果段勁好多! 行左一陣已經喘哂氣!

不過一路上能飽覽整個九龍及維港景色! 影相打卡位要幾多有幾多~

就算講過好多次都要講 ----- 香港真係好靚ga!!!

 

 

 

 

 

 

(我識用元氣彈又要話你知咩~)



風景真係太靚,1km約半小時既山路我竟然玩左成個鐘,上到山腰的「獅雉坳」已經4點幾,見到指向沙田坳村既路,就落山去吧~

落山都係輕鬆樓梯,雖然有d多有d密,但只要慢慢嚟就不成問題~ 或者咁講,我去完富士山之後真係好怕斜路落山……….

較岩時間,落山時仲可以睇到日落tim~

 

 

 

 



最後到達慈雲山的沙田坳村(係呀沙田坳村唔係沙田ga),正式結束今次行程~

話就話結束,但由沙田坳村行落黃大仙條大斜路原來都唔少野! 

又斜又長,如果可以有架單車衝落去既諗法又浮現啦!!!

但首先要抬架單車上山,慘過你囉炭呀~~~~~~~~~

 

 



行完山當然要醫肚~

嚟到好日都唔會經過既鳳凰新村,有間「英都燒味廚房」的「甜豉油叉燒炒滑蛋飯」做得非常出色!

炒蛋半熟滑溜富蛋香,叉燒軟腍唔乾有肉味,配埋甜豉油與白飯,絕對係行完山補充體力(及脂肪)的最佳選擇!

最重要係,英都呢碟飯,係至下晝6點既下午茶餐中只係$35 ja!!!!!

平民野就應該係平民價錢,良心呀~

Ee點解講講下行山突然轉左做飲食ge?

唉多人鍾意睇嗎…….. 而家d Blog收視咁差咪寫多兩句吸引下人law………..

 

 



好啦今次行山就係咁多~

純計路程,由沙田博康村出發至慈雲山,真係一個鐘多少少就攪得掂~

如果好似我咁到沙田坳唔夠喉再行一小段麥理浩徑五段,總共都係兩個鐘左右,中段仲有士多做補給點,沿路欣賞整個九龍及維港美景,真係非常唔錯!!

我亦慶幸今次對呢條路有個認知,萬一第日小弟山窮水盡無錢坐車,起碼知道邊條路返到屋企ar…………..

 



另外我想講多少少既係行山態度問題

行山唔係應該靜靜地聽下鳥語蟬鳴,最多同fd低聲談笑ga咩?

但最近幾次行山我都遇上不少人大聲叫囂吵鬧,更甚的是大聲播音樂當自己係山系DJ

嚟得郊遊都係想享受自然遠離煩囂je,要嘈既你地返旺角啦!

但如果真係遇到呢d粉腸,除左打鑊佢之外,唯有就係塞住耳仔自己聽歌啦……..

係呢個時候,瑞典品牌Sudio的石墨烯真無線藍芽耳機Tolv就大派用場了

單次叉電可以播放7小時,行4次慈沙古道都仲有剩呀!

音質乾淨加上瑞典簡約設計,樣子一流耳屎又唔大舊,買嚟襯衫都抵呀~

 

 

 

 

 

 

(我個樣同髮型係7 d,但個耳機正面睇一d都唔大舊,薄到好似無用到咁(!?))

 

 

 

而家到Sudio 香港官網:https://www.sudio.com/hk/earphones 訂購,除左可以用折扣代碼「funggarcia」獲全館商品85折外,係新年活動 6 Jan至14 Feb期間購買兩副耳機再享額外10% OFF優惠,再送鼠年包裝禮袋+迷你方包,與 Sudio 一起過好年。

如您在購買Sudio產品後3個月內在Sudio官方網站Sphere頁面註冊https://www.sudio.com/hk/sphere,保固期將延長至18個月。商品註冊guide,請點選這裏

 

希望大家使用愉快~

 

 

 

 



================================


 

=======================

 

相關篇章 :

 

 

=================================


我既Youtube Channel正式開通啦!!!!

快d Click入 「鋒加西亞 / 旅人瘋語」Subscribe 睇片再禁個like啦!~

岩岩開始,完全未有人睇呀~

 



=================================


IG果邊間中會有d和Blog及fb page不一樣的相片和story,大家有興趣既去follow下支持下啦~


Instagram : https://www.instagram.com/fung_garcia_backpacker/


 



Email : funggarcia@gmail.com

 

My Facebook Page : www.facebook.com/Garcia.in.Germany

 

 

 


另外文章同時刊於UBlog、 DC Fever Travel、 Blogspot 、遊牧爆谷,請各位繼續多多支持呀!!!!!!!!!!!!!









我的遊記