大埔三門仔,零難度的全海景輕遠足【香港郊遊6】

大埔三門仔至馬屎洲呢條路其實都唔係咩隱世路線,之不過成日被人忽略!

一來去得三門仔多數都係釣魚,二來其中一段路有d問題……….

之不過呢條遠足路線真係又輕鬆又方便,左望八仙嶺,右眺吐露港,風景美麗程度及簡單程度比起上次介紹由沙田行去九龍的「慈沙古道」又勝一籌!

見無咩朋友提及,就等小弟簡單分享下呢條又係「食飽飯無野做,皮鞋著裙都攪得掂」既正爆路線啦~

 

 

 


 

 

由大埔墟巴士站坐20K小巴到三門仔總站落車,全程約20分鐘

舊墟街市or市中心Market Place外都有站上車~

落車後,落小斜路入三門仔村就ok了~

 

 

 

 

 

 

 

沿村大街行到近公廁位(村內果個公廁唔係村口果個),見到下圖呢個指示牌就上樓梯轉右啦~

 

 

 

 

 

上幾步斜+十零廿級樓梯後就係樹林中的石屎平路,前進啦~

 

 

 

 

 

行約15分鐘便會穿過樹林,Y字型分叉路轉右,一片豁然開朗 ------- 點止吐路港,係成個馬鞍山同中大盡收眼底呀!!!!

 

 

 

 

 

 

 

唔好驚訝住! 望埋左邊先 --------- 大尾篤、慈山寺、八仙嶺一炮過殺哂! 仲有無漁船漁排在海灣內作點綴,會唔會太靚ar??

呢條嶺上小路,簡直就好似迷你輕鬆版的龍脊,左右兩邊絕景同時夾擊!

講真,我覺得比龍脊更靚law~

 

 

 

 

 

 

再行多15分鐘落埋樓梯,彎腰穿過埋樹枝洞 ------ 到馬屎州了~

成條路都係半個鐘,係咪輕鬆到妳唔信呢~

 

 

(如果呢個位唔係超多蚊,一定勁多人塞係度打卡…….)

 

 

呢個三門仔連接馬屎州的地段,其實同西貢橋咀島一樣係連島沙州,潮漲時會完全被海水截斷,之不過呢處地勢較橋咀高,除非大潮時節否則要過去都無咩問題~

享受下沙州清澈透底既海水和眼前廣闊無際的吐露港先啦~

 

 

 

 

 

 

 

 

回頭一望,後方太陽漸漸西下,間中有耶穌光穿透而出,景色又係一絕~

 

 

 

 

 

多數朋友行到呢度都會休息陣先繼續前進入馬屎州的

其實行半個鐘又有咩需要休息呢…….之不過多數有個婆婆係度賣野飲,比佢問多句又口痕買罐冰涼汽水g ma

而我眼前所見又有Bra Top小姐除衫擺pose影返百零二百張

我成日都唔明果d女生,去海灘就笠實件衫,係山上就除剩個bar,打保齡唔脫得咩? BBQ唔剥得咩? 點解係要行山先嚟大解放?

當我望望手臂上紅色的一舊舊………….忽然暮鼓晨鐘,大徹大悟!

古有如來佛祖割血餵鷹,現有山系女生除衫餵蚊! 佢地行緊大功德也!!! 善哉善哉!

 

 

(起碼要脫到咁嚟影相la)

 

 

繼續前行進入馬屎州了~

馬屎州個名係難聽,實只因此島形狀與馬屎相似而得名~

咁如果個島形係好長好長呢? 咁應該叫馬x州、馬x州定係馬州………..

好啦anyway~

呢個島屬係世界地質公園範圍,有多種奇石及多元化的海陸生物,海參青口蝴蝶等一地都係,要玩真係可以有排玩~

 

 

 

 

 

 

 

 

 

 

 

 

不過如果只係想睇風景,輕鬆寫意行下的話就時間自便啦~

馬屎州只能沿右方海灘前進,風景大致上都係差不多,去到盡處沙灘都只會見到大尾篤大壩only,反而頭兩個灣的沙灘仲能左眼睇馬鞍山樓盤右眼睇日落

而對我嚟講,在此良辰美景下,除低口罩渣支啤酒聽下海,已是無比的輕鬆寫意~

 

(前行風景都係差不多樣ga la)

 

 

 

 

 

 

 

 

路程就暫時講到呢度~

講風景,我夠膽講大埔三門仔至馬屎洲呢段路個View真係香港絕頂! 但點解一直都無咩人講ga呢?

有無發現,我山脊小路上d相全部囉得好高,幾乎無咩影到山邊位?

有無諗過,靚風景=靚風水,靚風水就自然多朋友住係度?

……………………………………….

無錯,山脊路上,沿路兩旁都係先人家宅,仲要唔係幾十個係一百幾十個,同平時拜山無咩分別!

一來唔想過多次清明重陽,二來呢度好難打卡影相,好大機會獨照變成群體照

當然妳想張相個效果係前面性感bra top後面萬千星輝賀台慶都無問題,不過我就會選擇落到馬屎洲先盡情影到夠呢~

咁多制肘又難呃Like,各位KOL梗係唔行唔介紹啦!

 

(其實呢張相都影到人地屋企,對唔住呀........)

 

 

 

最後有兩件事想講下~

 

1. 如果路上有咩事or唔想原路行返轉頭的,汽水阿婆其實係主力做街渡生意的

用艇送妳返三門仔村索價約$25至$250,視乎有幾多人坐而定

 

 

 

2. 係馬屎洲唔好留到太晏,記得5點幾好走人,早d返三門仔唔好等到天黑

需知道回程路=原路,係並無街燈的,一陣成群朋友出嚟Remember Me就唔係幾好啦~

要睇日落ge,返三門仔村碼頭啦~ 攝影熱點嚟,一樣靚到爆!

 

 

 

 

 

=======================

 

相關篇章 :

 

 

=================================


我既Youtube Channel正式開通啦!!!!

快d Click入 「鋒加西亞 / 旅人瘋語」Subscribe 睇片再禁個like啦!~

岩岩開始,完全未有人睇呀~

 



=================================


IG果邊間中會有d和Blog及fb page不一樣的相片和story,大家有興趣既去follow下支持下啦~


Instagram : https://www.instagram.com/fung_garcia_backpacker/


 



Email : funggarcia@gmail.com

 

My Facebook Page : www.facebook.com/Garcia.in.Germany

 

 

 


另外文章同時刊於UBlog、 DC Fever Travel、 Blogspot 、遊牧爆谷,請各位繼續多多支持呀!!!!!!!!!!!!!









 

我的遊記